ಗೃಹ ಸಚಿವರ ತವರಿನಲ್ಲೇ ನಿಯಮ ಉಲ್ಲಂಘನೆ: ಬಿಸಿಎಂ ಮಹಿಳಾ ಹಾಸ್ಟೆಲ್ ಮದ್ಯದ ಪಾರ್ಟಿ ವಿವಾದ! ಅಧಿಕಾರಿಗಳ ಸ್ಪಷ್ಟನೆ ಏನು?

ಕಲಬುರಗಿ: ಹೆಣ್ಣುಮಕ್ಕಳಿಗೆ ಸುರಕ್ಷತೆ ನೀಡಬೇಕಾದ ಸರ್ಕಾರಿ ಹಾಸ್ಟೆಲ್‌ನಲ್ಲೇ ನಿಯಮಗಳನ್ನೆಲ್ಲ ಗಾಳಿಗೆ ತೂರಿ ಯುವಕ-ಯುವತಿಯರು ಒಟ್ಟಾಗಿ ಮದ್ಯಪಾನ ಪಾರ್ಟಿ ಮಾಡಿರುವ ಆಘಾತಕಾರಿ ಘಟನೆಯೊಂದು ಕಲಬುರಗಿ ಜಿಲ್ಲೆಯ ಆಳಂದ ತಾಲ್ಲೂಕಿನ ಕಡಗಂಚಿಯಲ್ಲಿ ಬೆಳಕಿಗೆ ಬಂದಿದೆ. ಇದು ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ತವರು ಜಿಲ್ಲೆಯದ್ದು. ಆದರೆ ಅಧಿಕಾರಿಗಳು ಸ್ಪಷ್ಟನೆ ನೀಡಿದ್ದಾರೆ. 

ಹಾಸ್ಟೆಲ್ ಕೊಠಡಿಯೊಳಗೆ ವಿದ್ಯಾರ್ಥಿನಿಯೊಬ್ಬಳು ಬೀರ್ ಕುಡಿಯುತ್ತಿರುವ ಹಾಗೂ ಇತರರೊಂದಿಗೆ ಪಾರ್ಟಿ ಮಾಡುತ್ತಿರುವ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದ್ದು, ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

ಪ್ರಕರಣದ ಮುಖ್ಯ ಮುಖ್ಯಾಂಶಗಳು:

ಹಾಸ್ಟೆಲ್‌ನಲ್ಲಿ ಬೀರ್ ಪಾರ್ಟಿ: ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಯ (BCM) ಸರ್ಕಾರಿ ವಿದ್ಯಾರ್ಥಿನಿಯರ ಹಾಸ್ಟೆಲ್‌ನಲ್ಲಿ ಹುಡುಗ-ಹುಡುಗಿಯರು ಸೇರಿ ಮದ್ಯದ ಪಾರ್ಟಿ ಮಾಡಿದ್ದಾರೆ ಎನ್ನಲಾದ ದೃಶ್ಯಗಳು ಹರಿದಾಡುತ್ತಿವೆ.

ವಾರ್ಡನ್‌ಗಳಿಂದಲೇ ಬ್ಲ್ಯಾಕ್‌ಮೇಲ್ ಆರೋಪ: ಈ ವೈರಲ್ ವಿಡಿಯೋವನ್ನೇ ದಾಳವಾಗಿ ಬಳಸಿಕೊಂಡು, ಪ್ರಕರಣ ಮುಚ್ಚಿಹಾಕಲು ಹಾಸ್ಟೆಲ್‌ನ 3-4 ಜನ ವಾರ್ಡನ್‌ಗಳು ವಿದ್ಯಾರ್ಥಿನಿಯರಿಂದ ಹಣ ವಸೂಲಿ (Extortion) ಮಾಡಲು ಯತ್ನಿಸಿದ್ದಾರೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ.

ಆಡಿಯೋ ವೈರಲ್: ವಿದ್ಯಾರ್ಥಿನಿಯರನ್ನು ದುರ್ಬಳಕೆ ಹಾಗೂ ಶೋಷಣೆ ಮಾಡಿರುವ ದೂರುಗಳ ಬೆನ್ನಲ್ಲೇ, ವಿದ್ಯಾರ್ಥಿನಿ ಮತ್ತು ವಾರ್ಡನ್ ನಡುವೆ ನಡೆದಿರುವ ಆಡಿಯೋ ಸಂಭಾಷಣೆಯೂ ಕೂಡ ಲೀಕ್ ಆಗಿದೆ. “ಮನೆಯಲ್ಲಿ ದುಡ್ಡು ಕೊಡಲ್ಲ, ದಯವಿಟ್ಟು ವಿಷಯ ತಿಳಿಸಬೇಡಿ” ಎಂದು ವಿದ್ಯಾರ್ಥಿನಿ ಅಳಲು ತೋಡಿಕೊಂಡಿರುವುದು ಆಡಿಯೋದಲ್ಲಿದೆ.

ಗೃಹ ಸಚಿವರ ತವರು ಜಿಲ್ಲೆಯಲ್ಲೇ ಉಲ್ಲಂಘನೆ!

ವಿಪರ್ಯಾಸವೆಂದರೆ, ಅಪ್ರಾಪ್ತ ವಯಸ್ಕರನ್ನು ಹಾಗೂ ಐಡಿ ಕಾರ್ಡ್ ಇಲ್ಲದವರನ್ನು ಪಬ್ ಹಾಗೂ ಬಾರ್‌ಗಳಿಗೆ ಸೇರಿಸದಂತೆ ಪೊಲೀಸರಿಗೆ ರಾಜ್ಯದ ಗೃಹ ಸಚಿವರಾದ ಪ್ರಿಯಾಂಕ್ ಖರ್ಗೆ ಅವರು ಕಟ್ಟುನಿಟ್ಟಿನ ಸೂಚನೆ ನೀಡಿದ ಕೇವಲ ಎರಡು ದಿನಗಳಲ್ಲೇ ಅವರದೇ ಸ್ವಂತ ಜಿಲ್ಲೆಯಲ್ಲಿ ಈ ಘಟನೆ ಸದ್ದು ಮಾಡಿದೆ. ಇದು ಹಾಸ್ಟೆಲ್ ಸಿಬ್ಬಂದಿ ಹಾಗೂ ಇಲಾಖೆಯ ನಿರ್ಲಕ್ಷ್ಯಕ್ಕೆ ಹಿಡಿದ ಕೈಗನ್ನಡಿಯಾಗಿದೆ ಎಂದು ಸ್ಥಳೀಯರು ಕಿಡಿಕಾರಿದ್ದಾರೆ.

ಅಧಿಕಾರಿಗಳ ಸ್ಪಷ್ಟನೆ:

ಈ ಕುರಿತು ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿರುವ ಜಿಲ್ಲಾ ಬಿಸಿಎಂ ಅಧಿಕಾರಿ ಈರಣ್ಣ ಆಶಾಪುರ ಅವರು, “ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಆಡಿಯೊ ಮತ್ತು ವಿಡಿಯೊಗಳು ಸುಮಾರು 3–4 ವರ್ಷಗಳಷ್ಟು ಹಳೆಯವು. ಸದ್ಯಕ್ಕೆ ಕಡಗಂಚಿ ಗ್ರಾಮದಲ್ಲಿ ಯಾವುದೇ ಹಾಸ್ಟೆಲ್ ಕಾರ್ಯನಿರ್ವಹಿಸುತ್ತಿಲ್ಲ, ಅದನ್ನು ಆಳಂದ ಪಟ್ಟಣಕ್ಕೆ ಸ್ಥಳಾಂತರಿಸಲಾಗಿದೆ. ಹಳೆಯ ವಿಡಿಯೋ ಇಟ್ಟುಕೊಂಡು ಬ್ಲ್ಯಾಕ್‌ಮೇಲ್ ಮಾಡಲು ಯತ್ನಿಸುತ್ತಿರುವ ಬಗ್ಗೆಯೂ ತನಿಖೆ ನಡೆಸಲು ತಾಲೂಕು ಅಧಿಕಾರಿಗೆ ಸೂಚಿಸಲಾಗಿದೆ” ಎಂದು ತಿಳಿಸಿದ್ದಾರೆ.