ರಿಲಾಯನ್ಸ್ ಜಿಯೋದಿಂದ ‘ಜಿಯೋಟ್ಯಾಗ್ 2’ ಬಿಡುಗಡೆ: ಬೆಲೆ ₹1,199, ಏನೆಲ್ಲಾ ಫೀಚರ್ಸ್‌ಗಳಿವೆ?

ನವದೆಹಲಿ: ಭಾರತದ ಪ್ರಮುಖ ಟೆಲಿಕಾಂ ಸಂಸ್ಥೆಯಾದ ರಿಲಾಯನ್ಸ್ ಜಿಯೋ, ತನ್ನ ಸ್ಮಾರ್ಟ್ ಆಕ್ಸೆಸರೀಸ್ ಶ್ರೇಣಿಯನ್ನು ವಿಸ್ತರಿಸಿದ್ದು, ನೂತನ ‘ಜಿಯೋಟ್ಯಾಗ್ 2’ (JioTag 2) ಅನ್ನು ಭಾರತದಲ್ಲಿ ಬಿಡುಗಡೆ ಮಾಡಿದೆ. ಈ ಎರಡನೇ ಪೀಳಿಗೆಯ ಸ್ಮಾರ್ಟ್ ಟ್ರ್ಯಾಕರ್ ಹೊಸ ಡಿಸೈನ್, ನೂತನ ಬಣ್ಣಗಳು ಮತ್ತು ಆಂಡ್ರಾಯ್ಡ್ ಹಾಗೂ ಐಫೋನ್ ಎರಡೂ ಪ್ಲಾಟ್‌ಫಾರ್ಮ್‌ಗಳಿಗೆ ಬೆಂಬಲ ನೀಡುವುದು ಇದರ ವಿಶೇಷತೆಯಾಗಿದೆ.

ಪ್ರಮುಖ ಫೀಚರ್‌ಗಳು ಮತ್ತು ತಾಂತ್ರಿಕ ವಿವರಗಳು:

ಕ್ರಾಸ್-ಪ್ಲಾಟ್‌ಫಾರ್ಮ್ ಬೆಂಬಲ: ಆಂಡ್ರಾಯ್ಡ್ ಬಳಕೆದಾರರಿಗಾಗಿ ‘ಗೂಗಲ್ ಫೈಂಡ್ ಹಬ್’ ಹಾಗೂ ಐಫೋನ್ ಬಳಕೆದಾರರಿಗಾಗಿ ‘ಆಪಲ್ ಫೈಂಡ್ ಮೈ’ ನೆಟ್‌ವರ್ಕ್ ಬೆಂಬಲಿಸುತ್ತದೆ.

120dB ಸ್ಪೀಕರ್: ಹತ್ತಿರದಲ್ಲಿರುವ ಸಾಮಾನನ್ನು (ಕೀಲಿ, ವಾಲೆಟ್, ಬ್ಯಾಗ್ ಇತ್ಯಾದಿ) ಹುಡುಕಲು ಇದರಲ್ಲಿ 120dB ಶಬ್ದ ಹೊರಡಿಸುವ ಸ್ಪೀಕರ್ ನೀಡಲಾಗಿದೆ.

ಬ್ಯಾಟರಿ ಸಾಮರ್ಥ್ಯ: ಬದಲಿ ಮಾಡಬಹುದಾದ (Replaceable) ಬ್ಯಾಟರಿ ಹೊಂದಿದ್ದು, 1 ವರ್ಷದವರೆಗೆ ಬಾಳಿಕೆ ಬರುತ್ತದೆ. ಜೊತೆಗೆ ರಿಟೇಲ್ ಬಾಕ್ಸ್‌ನಲ್ಲಿ ಹೆಚ್ಚುವರಿ ಒಂದು ಬ್ಯಾಟರಿಯನ್ನು ಜಿಯೋ ಉಚಿತವಾಗಿ ನೀಡುತ್ತಿದೆ.

ವಾಟರ್ ಅಂಡ್ ಡಸ್ಟ್ ರೆಸಿಸ್ಟೆನ್ಸ್: ಧೂಳು ಮತ್ತು ನೀರಿನ ಹನಿಗಳಿಂದ ರಕ್ಷಣೆ ಪಡೆಯಲು IP64 ರೇಟಿಂಗ್ ನೀಡಲಾಗಿದೆ.

ಸಿಮ್ ಕಾರ್ಡ್ ಅಗತ್ಯವಿಲ್ಲ: ಇದು ಬೀಕನಿಂಗ್ ತಂತ್ರಜ್ಞಾನದ ಆಧಾರದ ಮೇಲೆ ಕಾರ್ಯನಿರ್ವಹಿಸುವುದರಿಂದ ಸಿಮ್ ಕಾರ್ಡ್ ಅಥವಾ ಮೊಬೈಲ್ ಡೇಟಾ ಪ್ಯಾನ್ ಅಗತ್ಯವಿರುವುದಿಲ್ಲ.

ಬೆಲೆ ಮತ್ತು ಲಭ್ಯತೆ:

ಜಿಯೋಟ್ಯಾಗ್ 2 ಅಧಿಕೃತ ಬೆಲೆ ₹1,249 ಆಗಿದ್ದು, ಆಯ್ದ ಬ್ಯಾಂಕ್ ಕಾರ್ಡ್ ಆಫರ್‌ಗಳ ಮೂಲಕ ₹50 ಇನ್‌ಸ್ಟೆಂಟ್ ಡಿಸ್ಕೌಂಟ್ ಪಡೆದು ₹1,199 ಕ್ಕೆ ಖರೀದಿಸಬಹುದು. ಇದು ಕಪ್ಪು (Black), ಕೆಂಪು (Red) ಮತ್ತು ಹಸಿರು (Green) ಬಣ್ಣದ ಆಯ್ಕೆಗಳಲ್ಲಿ Amazon India ಮೂಲಕ ಖರೀದಿಗೆ ಲಭ್ಯವಿದೆ.