ಐಆರ್‌ಡಿಎಐ ನಿಂದ ಬಿಗ್ ರಿಫಾರ್ಮ್ಸ್: ಇನ್ಶೂರೆನ್ಸ್ ಪಾಲಿಸಿದಾರರಿಗೆ ಸಿಗಲಿದೆ ಈ 4 ದೊಡ್ಡ ಲಾಭ!

ಭಾರತೀಯ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (IRDAI) ತನ್ನ 137ನೇ ಪ್ರಾಧಿಕಾರ ಸಭೆಯಲ್ಲಿ ಗ್ರಾಹಕರ ಹಿತರಕ್ಷಣೆ ಮತ್ತು ವಿಮಾ ವಲಯದಲ್ಲಿ ಪಾರದರ್ಶಕತೆ ತರಲು ‘ಸಬ್ಕಾ ಬಿಮಾ ಸಬ್ಕಿ ರಕ್ಷಾ ಕಾಯ್ದೆ-2025’ ರಡಿ ಹಲವು ಪ್ರಮುಖ ಸುಧಾರಣೆಗಳಿಗೆ ಅನುಮೋದನೆ ನೀಡಿದೆ.ಈ ಬದಲಾವಣೆಗಳು ಪಾಲಿಸಿದಾರರಿಗೆ ಹೇಗೆ ಪ್ರಯೋಜನಕಾರಿಯಾಗಲಿವೆ ಎಂಬ ವಿವರ ಇಲ್ಲಿದೆ:

ಪಾಲಿಸಿ ಮಾರಾಟ ಮಾಡಿದವರ ಹೆಸರು ಕಡ್ಡಾಯವಾಗಿ ಶೇಖರಣೆ (ಪಾರದರ್ಶಕತೆ)

ಇನ್ಶೂರೆನ್ಸ್ ಪಾಲಿಸಿ ನೀಡುವಾಗ ಅದನ್ನು ಮಾರಾಟ ಮಾಡಿದ ಅಧಿಕೃತ ಏಜೆಂಟ್ ಅಥವಾ ಬ್ರೋಕರ್ ಅವರ ಹೆಸರನ್ನು ಪ್ರತಿಯೊಂದು ಪ್ರಸ್ತಾಪ (Proposal) ಮತ್ತು ಪಾಲಿಸಿ ಪತ್ರದಲ್ಲಿ ಕಡ್ಡಾಯವಾಗಿ ನಮೂದಿಸಬೇಕಾಗುತ್ತದೆ.

ಪ್ರಯೋಜನ: ತಪ್ಪಾದ ಮಾಹಿತಿ ನೀಡಿ (Mis-selling) ಪಾಲಿಸಿ ಮಾರಾಟ ಮಾಡಿದ್ದರೆ, ಸುಲಭವಾಗಿ ಆಯಾ ವಿಮಾ ಪ್ರತಿನಿಧಿಯನ್ನು ಹೊಣೆಗಾರರನ್ನಾಗಿ ಮಾಡಬಹುದು.

ಗ್ರಾಹಕರ ಶಿಕ್ಷಣ ಮತ್ತು ರಕ್ಷಣೆ ನಿಧಿ (PEPF) ಆರಂಭ

ಪಾಲಿಸಿದಾರರ ಹಿತರಕ್ಷಣೆಗಾಗಿ ವಿಮಾ ಪಾಲಿಸಿದಾರರ ಶಿಕ್ಷಣ ಮತ್ತು ರಕ್ಷಣಾ ನಿಧಿ (Policyholders’ Education and Protection Fund) ಯನ್ನು ಕಾರ್ಯಾಚರಣೆಗೆ ತರಲಾಗಿದೆ.

ಪ್ರಯೋಜನ:

ಇನ್ಶೂರೆನ್ಸ್ ಕಂಪನಿಗಳಲ್ಲಿ ಕ್ಲೈಮ್ ಆಗದೆ ಉಳಿದಿರುವ (Unclaimed Money) ಕೋಟ್ಯಂತರ ರೂಪಾಯಿ ಹಣವನ್ನು ಸರಿಯಾದ ವಾರಸುದಾರರಿಗೆ ಪತ್ತೆಹಚ್ಚಿ ತಲುಪಿಸಲು ತಂತ್ರಜ್ಞಾನ ಬಳಸಲಾಗುತ್ತದೆ.

ದೂರು ಪರಿಹಾರ ವ್ಯವಸ್ಥೆಯನ್ನು (Grievance Redressal) ಇನ್ನಷ್ಟು ಬಲಪಡಿಸಲಾಗುತ್ತದೆ.

ಮಧ್ಯವರ್ತಿಗಳಿಗೆ ಕಟ್ಟುನಿಟ್ಟಿನ ನಿಯಮ

ವಿಮಾ ಮಧ್ಯವರ್ತಿಗಳು, ಥರ್ಡ್ ಪಾರ್ಟಿ ಅಡ್ಮಿನಿಸ್ಟ್ರೇಟರ್‌ಗಳು (TPA) ಹಾಗೂ ಸರ್ವೇಯರ್‌ಗಳಿಗೆ ಕಟ್ಟುನಿಟ್ಟಿನ ಶಿಸ್ತು ಕ್ರಮಗಳನ್ನು ಜಾರಿಗೊಳಿಸಲಾಗಿದೆ. ದೂರುಗಳು ಬಂದರೆ ಕಟ್ಟುನಿಟ್ಟಿನ ದಂಡ ವಿಧಿಸುವ ಏಕರೂಪದ ಪ್ರಕ್ರಿಯೆ ಜಾರಿಗೆ ಬರಲಿದೆ.

ನಿರಂತರ ನೋಂದಣಿ (Perpetual Registration)

ವಿಮಾ ಮಧ್ಯವರ್ತಿಗಳ ನೋಂದಣಿಯನ್ನು ಪದೇ ಪದೇ ನವೀಕರಿಸುವ (Renewal) ಬದಲು ನಿರಂತರ ನೋಂದಣಿ ವ್ಯವಸ್ಥೆಯನ್ನು ಜಾರಿಗೆ ತರಲಾಗಿದೆ. ಇದರಿಂದ ಪೇಪರ್ ವರ್ಕ್ ಕಡಿಮೆಯಾಗಿ ಗ್ರಾಹಕರಿಗೆ ವೇಗವಾಗಿ ಸೇವೆ ನೀಡಲು ಕಂಪನಿಗಳಿಗೆ ಸಾಧ್ಯವಾಗುತ್ತದೆ.