ಕ್ಯಾಲಿಫೋರ್ನಿಯಾದಲ್ಲಿ ನಾಪತ್ತೆಯಾಗಿದ್ದ 72 ವರ್ಷದ ಭಾರತೀಯ ಮೂಲದ ವೃದ್ಧೆ ಕಾಲುವೆಯಲ್ಲಿ ಶವವಾಗಿ ಪತ್ತೆ!

ಕ್ಯಾಲಿಫೋರ್ನಿಯಾ: ಅಮೆರಿಕದ ಕ್ಯಾಲಿಫೋರ್ನಿಯಾದಲ್ಲಿ ಕಳೆದ ಎರಡು ತಿಂಗಳಿಂದ ನಾಪತ್ತೆಯಾಗಿದ್ದ 72 ವರ್ಷದ ಭಾರತೀಯ ಮೂಲದ ಮಹಿಳೆ ಅಜಿತ್ ಕೌರ್ ಎಂಬುವವರ ಮೃತದೇಹವು ಕಾಲುವೆಯೊಂದರಲ್ಲಿ ಪತ್ತೆಯಾಗಿದೆ.

ಕಳೆದ ಆಗಸ್ಟ್‌ನಿಂದ ಕಾಣೆಯಾಗಿದ್ದ ವೃದ್ಧೆಗಾಗಿ ಪೊಲೀಸರು ತೀವ್ರ ಶೋಧ ನಡೆಸುತ್ತಿದ್ದರು. ಅಕ್ಟೋಬರ್ 24 ರಂದು ಕಾಲುವೆಯಲ್ಲಿ ಗಸ್ತು ತಿರುಗುತ್ತಿದ್ದ ಸಿಬ್ಬಂದಿಗೆ ಮೃತದೇಹ ಪತ್ತೆಯಾಗಿದ್ದು, ಅಕ್ಟೋಬರ್ 27 ರಂದು ಸ್ಟಾನಿಸ್ಲಾಸ್ ಕೌಂಟಿ ಕರೋನರ್ ಕಚೇರಿಯು ಶವವನ್ನು ಅಜಿತ್ ಕೌರ್ ಅವರದ್ದು ಎಂದು ಅಧಿಕೃತವಾಗಿ ಖಚಿತಪಡಿಸಿದೆ.

ಸೆರೆಸ್ (Ceres) ನಗರದ ಕಾಸಾ ಗ್ರ್ಯಾಂಡ್ ಅಪಾರ್ಟ್‌ಮೆಂಟ್ ಕಾಂಪ್ಲೆಕ್ಸ್‌ನಲ್ಲಿ ವಾಸವಿದ್ದ ಅಜಿತ್ ಕೌರ್, ಕಳೆದ ಆಗಸ್ಟ್ 23 ರಂದು ರಾತ್ರಿ ಕಾಣೆಯಾಗಿದ್ದರು. ಕೊನೆಯ ಬಾರಿಗೆ ಆಕೆಯನ್ನು ಅಂದೇ ಮುಂಜಾನೆ 1:45 ರ ಸುಮಾರಿಗೆ ವಿಟ್ಮೋರ್ ಅವೆನ್ಯೂ ಬಳಿ ನೋಡಲಾಗಿತ್ತು. ವೃದ್ಧೆ ನಾಪತ್ತೆಯಾದ ಹಿನ್ನೆಲೆಯಲ್ಲಿ ಕುಟುಂಬಸ್ಥರ ದೂರಿನ ಮೇರೆಗೆ ಪೊಲೀಸರು ಮತ್ತು ಸ್ಥಳೀಯ ಜಲಸಂಪನ್ಮೂಲ ಇಲಾಖೆಯ ಸಿಬ್ಬಂದಿ ವ್ಯಾಪಕ ಶೋಧ ಕಾರ್ಯಾಚರಣೆ ನಡೆಸಿದ್ದರು.

ಕಾಲುವೆಯಲ್ಲಿ ಪತ್ತೆಯಾದ ಶವ: ಟರ್ಲಾಕ್ ನೀರಾವರಿ ಜಿಲ್ಲೆಯ ಕಾಲುವೆಯಲ್ಲಿ ದಿನನಿತ್ಯದ ಗಸ್ತು ತಿರುಗುತ್ತಿದ್ದ ಸಿಬ್ಬಂದಿಗೆ ಕೆಳ ಲಾಟರಲ್ 3 ಕಾಲುವೆಯಲ್ಲಿ ಮಾನವನ ಅವಶೇಷಗಳು ಕಂಡುಬಂದಿವೆ.

ತೀವ್ರ ಶೋಧ ಕಾರ್ಯಾಚರಣೆ: ಸೆರೆಸ್ ಪೊಲೀಸ್ ಇಲಾಖೆ, ಮರ್ಸೆಡ್ ಕೌಂಟಿ ಶೆರಿಫ್ ಕಚೇರಿಯ ಕೆ9 ಶ್ವಾನ ದಳ ಹಾಗೂ ಸ್ಟಾನಿಸ್ಲಾಸ್ ಕೌಂಟಿ ಡೈವ್ ಯೂನಿಟ್‌ನ ಜಲಾನಯನ ನೀರಡಿ ಡ್ರೋನ್‌ಗಳ ಸಹಾಯದಿಂದ ಕಾಲುವೆಗಳಲ್ಲಿ ವ್ಯಾಪಕ ಶೋಧ ನಡೆಸಲಾಗಿತ್ತು.

ಪೊಲೀಸರ ಶಂಕೆ: ತನಿಖೆಯ ವೇಳೆ ಕೌರ್ ಅವರು ಅಪಾರ್ಟ್‌ಮೆಂಟ್ ಕಾಂಪ್ಲೆಕ್ಸ್‌ನ ಪೂರ್ವ ಭಾಗದಲ್ಲಿರುವ ಟಿಐಡಿ (TID) ಕಾಲುವೆಗೆ ಕಾಲಿಟ್ಟಿರಬಹುದು ಎಂದು ಪತ್ತೆಹಚ್ಚಲಾಗಿದೆ.

ಸಂತಾಪ ಸೂಚನೆ: ಈ ಕಷ್ಟದ ಸಮಯದಲ್ಲಿ ಮೃತ ಅಜಿತ್ ಕೌರ್ ಅವರ ಕುಟುಂಬಕ್ಕೆ ಸೆರೆಸ್ ಪೊಲೀಸ್ ಇಲಾಖೆ ತೀವ್ರ ಸಂತಾಪ ಸೂಚಿಸಿದ್ದು, ತನಿಖೆಗೆ ಸಹಕರಿಸಿದ ಎಲ್ಲಾ ಸಂಸ್ಥೆಗಳಿಗೆ ಕೃತಜ್ಞತೆ ಸಲ್ಲಿಸಿದೆ.