ಕರ್ನಾಟಕದಲ್ಲಿ ಏರುತ್ತಿರುವ ಬೆಲೆಗಳ ಸುಳಿಯಲ್ಲಿ ಜನಸಾಮಾನ್ಯರು: ಮದ್ಯದಿಂದ ಆನ್‌ಲೈನ್ ಫುಡ್‌ವರೆಗೆ ಎಲ್ಲವೂ ದುಬಾರಿ!

ಬೆಂಗಳೂರು: ಕರ್ನಾಟಕದಲ್ಲಿ ಕಳೆದ ಕೆಲವು ವರ್ಷಗಳಿಂದ ಜನ ಸಾಮಾನ್ಯರ ಮೇಲೆ ಆರ್ಥಿಕ ಹೊರೆ ನಿರಂತರವಾಗಿ ಹೆಚ್ಚುತ್ತಲೇ ಇದೆ. ಮದ್ಯ, ಪೆಟ್ರೋಲ್-ಡೀಸೆಲ್, ಆಟೋ ಮತ್ತು ಮೆಟ್ರೋ ಪ್ರಯಾಣ ದರ, ವಿದ್ಯುತ್ ಶುಲ್ಕದಿಂದ ಹಿಡಿದು ಹಾಲಿನ ಬೆಲೆ ಹಾಗೂ ಆನ್‌ಲೈನ್ ಫುಡ್ ಡೆಲಿವರಿ ವರೆಗೆ ಪ್ರತಿಯೊಂದು ವಲಯದಲ್ಲೂ ಬೆಲೆ ಏರಿಕೆಯ ಬಿಸಿ ತಟ್ಟಿದೆ. ರಾಜ್ಯದಲ್ಲಿ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಜೀವನ ವೆಚ್ಚದ ಸಮಗ್ರ ಚಿತ್ರಣವನ್ನು ವಿವರಿಸಲಾಗಿದೆ.

ಮದ್ಯ ಮತ್ತು ಇಂಧನ ದರ ಏರಿಕೆ: ಅಬಕಾರಿ ಶುಲ್ಕ ಹೆಚ್ಚಳದಿಂದ ಮದ್ಯದ ಬೆಲೆ ಏರಿದೆ. ಹಾಗೆಯೇ 2024 ಮತ್ತು 2025 ರಲ್ಲಿ ಸೇಲ್ಸ್ ಟ್ಯಾಕ್ಸ್ ಹೆಚ್ಚಳದಿಂದ ಪೆಟ್ರೋಲ್ ಹಾಗೂ ಡೀಸೆಲ್ ದರಗಳು ಗಗನಕ್ಕೇರಿವೆ.

ಸಾರಿಗೆ ಮತ್ತು ವಾಹನ ವೆಚ್ಚ: ಆಟೋ ರಿಕ್ಷಾ ಕನಿಷ್ಠ ಶುಲ್ಕ ರೂ. 36 ಕ್ಕೆ ಏರಿದೆ. ಮೆಟ್ರೋ ದರಗಳು ಶೇ. 71 ರವರೆಗೆ ಹೆಚ್ಚಾಗಿವೆ. ಕೆಎಸ್‌ಆರ್‌ಟಿಸಿ (KSRTC), ಬಿಎಂಟಿಸಿ (BMTC) ಬಸ್ ದರಗಳು 2025 ರ ಜನವರಿಯಲ್ಲಿ ಹೆಚ್ಚಾಗಿದ್ದು, 2026 ರ ನವೆಂಬರ್‌ನಲ್ಲಿ ಮತ್ತೊಂದು ಏರಿಕೆ ನಿರೀಕ್ಷಿಸಲಾಗಿದೆ.

ಆಹಾರ ಮತ್ತು ದಿನಸಿ ವಸ್ತುಗಳು: ನಂದಿನಿ ಹಾಲು ಲೀಟರ್‌ಗೆ ಒಟ್ಟು ರೂ. 17 ರಷ್ಟು (2023 ರಿಂದ ನಾಲ್ಕು ಬಾರಿ) ಹೆಚ್ಚಳ ಕಂಡಿದೆ. ಝೊಮಾಟೋ, ಅಮೆಜಾನ್ ಮತ್ತು ರ‍್ಯಾಪಿಡೋ ಮುಂತಾದ ಪ್ಲಾಟ್‌ಫಾರ್ಮ್‌ಗಳ ಮೇಲೂ ಗಿಗ್ ಕಾರ್ಮಿಕರ ಕಲ್ಯಾಣಕ್ಕಾಗಿ ಶೇ. 5 ರಷ್ಟು ಪ್ರಸ್ತಾವಿತ ಸೆಸ್ ಬೀಳುವ ಸಾಧ್ಯತೆಯಿದೆ.

ಮನೆ ಹಾಗೂ ಆಸ್ತಿ ತೆರಿಗೆ: ಆಸ್ತಿಗಳ ಮಾರ್ಗದರ್ಶಿ ಮೌಲ್ಯವು (Guidance Value) ಶೇ. 30 ರವರೆಗೆ ಹೆಚ್ಚಾಗಿದ್ದು, ನೋಂದಣಿ ವೆಚ್ಚ ಅಧಿಕವಾಗಿದೆ. ಬೆಂಗಳೂರಿನಲ್ಲಿ ನೀರಿನ ಶುಲ್ಕವು ಏಪ್ರಿಲ್ 1, 2026 ರಿಂದ ವಾರ್ಷಿಕ ಶೇ. 3 ರಷ್ಟು ಹೆಚ್ಚಾಗುತ್ತಿದೆ. ಬಿಡಿಎ (BDA) ಲೇಔಟ್‌ಗಳಲ್ಲಿ ವಾರ್ಷಿಕ ಆಸ್ತಿ ತೆರಿಗೆಯು ಶೇ. 9 ರಿಂದ 51 ರಷ್ಟು ಹೆಚ್ಚಳವಾಗಿದೆ.

ವೈದ್ಯಕೀಯ ಹಾಗೂ ಇತರ ಶುಲ್ಕಗಳು: ಎಕ್ಸ್‌ರೇ, ಹೊರರೋಗಿ ಸಮಾಲೋಚನೆ  ಮತ್ತು ಪ್ರಯೋಗಾಲಯದ ಪರೀಕ್ಷಾ ಶುಲ್ಕಗಳು ಶೇ. 50 ರಿಂದ 100 ರಷ್ಟು ಹೆಚ್ಚಾಗಿವೆ. ಇವಿ  ವಾಹನಗಳ ಮೇಲೂ ರೂ. 25 ಲಕ್ಷಕ್ಕಿಂತ ಹೆಚ್ಚಿನ ಬೆಲೆಯುಳ್ಳವುಗಳಿಗೆ ಶೇ. 10 ರಷ್ಟು ಲೈಫ್‌ಟೈಮ್ ರಸ್ತೆ ತೆರಿಗೆ ವಿಧಿಸಲಾಗಿದೆ.

ಸರ್ಕಾರದ ವಿವಿಧ ತೆರಿಗೆಗಳು, ಸೆಸ್‌ಗಳು ಹಾಗೂ ಶುಲ್ಕಗಳ ಪರಿಷ್ಕರಣೆಯಿಂದಾಗಿ ರಾಜ್ಯದ ಜನಸಾಮಾನ್ಯರ ಮೇಲೆ ಆರ್ಥಿಕ ಬಿರುಗಾಳಿ ಬೀಸುತ್ತಿದ್ದು, ಬಜೆಟ್ ನಿರ್ವಹಣೆ ಕಷ್ಟಕರವಾಗುತ್ತಿದೆ.