ವ್ಯಾಪಾರಕ್ಕಾಗಿ ಹೈದರಾಬಾದ್‌ಗೆ ಬಂದಿದ್ದ 41 ವರ್ಷದ ಅಮೆರಿಕನ್ ಪ್ರಜೆ ಕೊಠಡಿಯಲ್ಲಿ ಶವವಾಗಿ ಪತ್ತೆ!

ಹೈದರಾಬಾದ್: ಹೈದರಾಬಾದ್‌ನ ಪ್ರತಿಷ್ಠಿತ ಗಚಿಬೌಲಿ ಪ್ರದೇಶದಲ್ಲಿರುವ ಮ್ಯಾರಿಯಟ್ ಎಕ್ಸಿಕ್ಯುಟಿವ್ ಅಪಾರ್ಟ್‌ಮೆಂಟ್ಸ್ ಹೋಟೆಲ್ ಕೊಠಡಿಯಲ್ಲಿ 41 ವರ್ಷದ ಅಮೆರಿಕದ ಪ್ರಜೆ ನಿಗೂಢವಾಗಿ ಸಾವನ್ನಪ್ಪಿರುವುದು ಬೆಳಕಿಗೆ ಬಂದಿದೆ.

ಮೃತರನ್ನು ಮಿಚೆಲ್ ಬ್ರಿಯನ್ ಲೀ ಎಂದು ಗುರುತಿಸಲಾಗಿದ್ದು, ಇವರು ವ್ಯಾಪಾರ ಹಾಗೂ ವ್ಯವಹಾರಿಕ ಕೆಲಸಗಳ ನಿಮಿತ್ತ ಹೈದರಾಬಾದ್‌ಗೆ ಆಗಮಿಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಎಸ್‌ಎಲ್‌ಎನ್ ಟರ್ಮಿನಸ್‌ನಲ್ಲಿರುವ ಹೋಟೆಲ್‌ನಲ್ಲಿ ತಂಗಿದ್ದ ಅಮೆರಿಕನ್ ಪ್ರಜೆ ಕೊಠಡಿಯಿಂದ ಹೊರಬಾರದೆ, ಫೋನ್ ಕರೆಗಳಿಗೂ ಯಾವುದೇ ಪ್ರತಿಕ್ರಿಯೆ ನೀಡದಿದ್ದಾಗ ಹೋಟೆಲ್ ಸಿಬ್ಬಂದಿಗೆ ಅನುಮಾನ ಮೂಡಿದೆ. ಕೂಡಲೇ ಸಿಬ್ಬಂದಿ ಬಾಗಿಲು ತೆರೆದು ನೋಡಿದಾಗ ಅವರು ಹಾಸಿಗೆಯ ಮೇಲೆ ಅಚೇತನ ಸ್ಥಿತಿಯಲ್ಲಿ ಬಿದ್ದಿರುವುದು ಕಂಡುಬಂದಿದೆ. ತಕ್ಷಣ ಹೋಟೆಲ್ ಆಡಳಿತ ಮಂಡಳಿಯು ಗಚಿಬೌಲಿ ಪೊಲೀಸ್ ಠಾಣೆಗೆ ಮಾಹಿತಿ ನೀಡಿದ್ದು, ಸ್ಥಳಕ್ಕಾಗಮಿಸಿದ ಪೊಲೀಸರು ಪರಿಶೀಲನೆ ನಡೆಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಅಮೆರಿಕನ್ ಪ್ರಜೆ ಸಾವು: ಹೈದರಾಬಾದ್‌ನ ಗಚಿಬೌಲಿಯಲ್ಲಿರುವ ಹೋಟೆಲ್‌ನಲ್ಲಿ 41 ವರ್ಷದ ಯುಎಸ್ ಪ್ರಜೆ ಮಿಚೆಲ್ ಬ್ರಿಯನ್ ಲೀ ಮೃತಪಟ್ಟಿರುವುದು ಪತ್ತೆಯಾಗಿದೆ.

ವ್ಯಾಪಾರ ಪ್ರವಾಸ: ಅಮೆರಿಕದಿಂದ ಬ್ಯುಸಿನೆಸ್ ಕೆಲಸಗಳಿಗಾಗಿ ಅವರು ಹೈದರಾಬಾದ್‌ಗೆ ಬಂದಿದ್ದು, ಮ್ಯಾರಿಯಟ್ ಹೋಟೆಲ್‌ನಲ್ಲಿ ಉಳಿದುಕೊಂಡಿದ್ದರು.

ಸಿಬ್ಬಂದಿಯಿಂದ ಪತ್ತೆ: ಫೋನ್ ಕರೆಗಳಿಗೆ ಸ್ಪಂದಿಸದ ಕಾರಣ ಸಿಬ್ಬಂದಿ ಬಾಗಿಲು ತೆಗೆದು ನೋಡಿದಾಗ ಘಟನೆ ಬೆಳಕಿಗೆ ಬಂದಿದೆ.

ಮರಣೋತ್ತರ ಪರೀಕ್ಷೆ: ಸಾವಿಗೆ ನಿಖರವಾದ ಕಾರಣವೇನು ಎಂಬುದು ಮರಣೋತ್ತರ ಪರೀಕ್ಷೆಯ ವರದಿ ಬಂದ ಬಳಿಕವಷ್ಟೇ ತಿಳಿದುಬರಲಿದೆ ಎಂದು ಪೊಲೀಸರು ಸ್ಪಷ್ಟಪಡಿಸಿದ್ದಾರೆ.

ಸದ್ಯ ಪೊಲೀಸರು ಶವವನ್ನು ವಶಕ್ಕೆ ಪಡೆದು ಮುಂದಿನ ಕಾನೂನು ಪ್ರಕ್ರಿಯೆಗಳನ್ನು ಕೈಗೊಂಡಿದ್ದು, ಅಮೆರಿಕದ ದೂತವಾಸ ಕಚೇರಿಗೂ ಮಾಹಿತಿ ನೀಡುವ ಕಾರ್ಯ ನಡೆಯುತ್ತಿದೆ.