ಬ್ಯಾಂಕ್ ಅಕೌಂಟ್, ಆಧಾರ್ ಡಾಟಾ ಸುರಕ್ಷತೆಗೆ ಹೊಸ ಆಧಾರ್ ಆ್ಯಪ್ ಸೂಪರ್ ಫೀಚರ್: ಬಯೋಮೆಟ್ರಿಕ್ ಲಾಕ್/ಅನ್‌ಲಾಕ್ ಮಾಡೋದು ಹೀಗೆ!

ದಾವಣಗೆರೆ: ಇಂದಿನ ಡಿಜಿಟಲ್ ಯುಗದಲ್ಲಿ ಬ್ಯಾಂಕಿಂಗ್ ಸೇವೆಯಿಂದ ಹಿಡಿದು ಸರ್ಕಾರದ ವಿವಿಧ ಯೋಜನೆಗಳ ಲಾಭ ಪಡೆಯಲು ಆಧಾರ್ ಕಾರ್ಡ್ ಅತ್ಯಗತ್ಯ ದಾಖಲೆ. ಆದರೆ, ಆಧಾರ್ ಮಾಹಿತಿ ದುರ್ಬಳಕೆಯಾಗದಂತೆ ತಡೆಯಲು ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ (MeitY) ಹಾಗೂ ಯುಐಡಿಎಐ (UIDAI) ಬಳಕೆದಾರರಿಗೆ ವಿಶೇಷ ಸುರಕ್ಷತಾ ಸೌಲಭ್ಯವನ್ನು ನೀಡಿದೆ.

ಹೊಸ ‘ಆಧಾರ್ ಆ್ಯಪ್’ನಲ್ಲಿ ಲಭ್ಯವಿರುವ ‘ಬಯೋಮೆಟ್ರಿಕ್ ಲಾಕ್/ಅನ್‌ಲಾಕ್’ (Biometric Lock/Unlock) ವೈಶಿಷ್ಟ್ಯವನ್ನು ಇದುವರೆಗೆ ದೇಶಾದ್ಯಂತ 1.91 ಕೋಟಿಗೂ ಹೆಚ್ಚು ಬಾರಿ ಬಳಸಲಾಗಿದೆ ಎಂದು ಸಚಿವಾಲಯ ತಿಳಿಸಿದೆ. ಈ ಸೆಕ್ಯೂರಿಟಿ ಫೀಚರ್ ಅನ್ನು ಹೇಗೆ ಬಳಸುವುದು ಮತ್ತು ಇದರಿಂದ ಏನು ಪ್ರಯೋಜನ ಎಂಬುದನ್ನು ಇಲ್ಲಿದೆ ತಿಳಿಯಿರಿ.

ಏನಿದು ಆಧಾರ್ ಬಯೋಮೆಟ್ರಿಕ್ ಲಾಕ್?

ಬಯೋಮೆಟ್ರಿಕ್ ಲಾಕ್ ಎನ್ನುವುದು ಆಧಾರ್ ಕಾರ್ಡ್‌ದಾರರಿಗೆ ತಮ್ಮ ಬೆರಳಚ್ಚು (Fingerprint), ಕಣ್ಣಿನ ಪಾಪೆ (Iris) ಮತ್ತು ಮುಖದ ದೃಢೀಕರಣ (Face Authentication) ಮಾಹಿತಿಯನ್ನು ಸುರಕ್ಷಿತವಾಗಿಡಲು ನೀಡಲಾಗಿರುವ ಸೇವೆಯಾಗಿದೆ. ಒಮ್ಮೆ ನಿಮ್ಮ ಬಯೋಮೆಟ್ರಿಕ್ ಅನ್ನು ಲಾಕ್ ಮಾಡಿದರೆ, ನಿಮ್ಮ ಅನುಮತಿಯಿಲ್ಲದೆ ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆ ನಿಮ್ಮ ಬಯೋಮೆಟ್ರಿಕ್ ಬಳಸಿ ಆಧಾರ್ ದೃಢೀಕರಣ (Authentication) ಮಾಡಲು ಸಾಧ್ಯವಿಲ್ಲ.

ಗಮನಿಸಿ (Error Code 330): ನಿಮ್ಮ ಬಯೋಮೆಟ್ರಿಕ್ ಲಾಕ್ ಆಗಿರುವಾಗ ಯಾರಾದರೂ ಅದನ್ನು ಬಳಸಿ ದೃಢೀಕರಣ ಮಾಡಲು ಯತ್ನಿಸಿದರೆ, ವ್ಯವಸ್ಥೆಯು ತಕ್ಷಣವೇ ಅಪ್ಲಿಕೇಶನ್ ಅನ್ನು ತಿರಸ್ಕರಿಸಿ ‘ಎರರ್ ಕೋಡ್ 330’ (Error Code 330) ಎಂದು ತೋರಿಸುತ್ತದೆ.

ಹೊಸ ಆಧಾರ್ ಆ್ಯಪ್‌ನಲ್ಲಿ ಬಯೋಮೆಟ್ರಿಕ್ ಲಾಕ್/ಅನ್‌ಲಾಕ್ ಮಾಡುವ ವಿಧಾನ:

ನಿಮ್ಮ ಆಧಾರ್ ಸಂಖ್ಯೆಯೊಂದಿಗೆ ನೋಂದಾಯಿತ ಮೊಬೈಲ್ ಸಂಖ್ಯೆ (Registered Mobile Number) ಹೊಂದಿರುವವರು ಈ ಕೆಳಗಿನ ಸರಳ ಹಂತಗಳ ಮೂಲಕ ತಮ್ಮ ಬಯೋಮೆಟ್ರಿಕ್ ಲಾಕ್ ಮಾಡಬಹುದು:

1. ಆ್ಯಪ್ ಲಾಗಿನ್ ಮಾಡಿ: ನಿಮ್ಮ ಸ್ಮಾರ್ಟ್‌ಫೋನ್‌ನಲ್ಲಿ Aadhaar App ಓಪನ್ ಮಾಡಿ, ನಿಮ್ಮ 6-ಅಂಕಿಯ ಪಿನ್ (PIN) ನಮೂದಿಸಿ ಲಾಗಿನ್ ಆಗಿ.

2. ಆಯ್ಕೆ ಮಾಡಿ: ಹೋಮ್ ಸ್ಕ್ರೀನ್‌ನಲ್ಲಿ ನಿಮ್ಮ ಆಧಾರ್ ಕಾರ್ಡ್‌ ಕೆಳಗೆ ಕಾಣಿಸುವ ‘Biometric Lock/Unlock’ ಆಯ್ಕೆಯ ಮೇಲೆ ಟ್ಯಾಪ್ ಮಾಡಿ. (ಅಥವಾ ‘Security’ ಟ್ಯಾಬ್‌ಗೆ ಹೋಗಿ ‘Biometric Lock/Unlock’ ಆಯ್ಕೆ ಮಾಡಬಹುದು).

3. ಖಚಿತಪಡಿಸಿ (Confirm): ನೀವು ಲಾಕ್ ಮಾಡಲು ಬಯಸಿದರೆ ‘Lock’ ಮೇಲೆ ಕ್ಲಿಕ್ ಮಾಡಿ ದೃಢೀಕರಿಸಿ.

4. ಅನ್‌ಲಾಕ್ ಮಾಡಲು: ನಿಮಗೆ ಬ್ಯಾಂಕ್ ಅಥವಾ ಇತರ ಕೆಲಸಗಳಿಗೆ ಬಯೋಮೆಟ್ರಿಕ್ ಅಗತ್ಯವಿದ್ದಾಗ, ಮತ್ತೆ ಅದೇ ವಿಭಾಗಕ್ಕೆ ಹೋಗಿ ‘Unlock’ ಮೇಲೆ ಕ್ಲಿಕ್ ಮಾಡುವ ಮೂಲಕ ತಾತ್ಕಾಲಿಕವಾಗಿ ಅಥವಾ ಖಾಯಂ ಆಗಿ ಅನ್‌ಲಾಕ್ ಮಾಡಿಕೊಳ್ಳಬಹುದು.

ಬಯೋಮೆಟ್ರಿಕ್ ಲಾಕ್ ಮಾಡುವುದರಿಂದ ಏನು ಪ್ರಯೋಜನ?

• ಹಣಕಾಸಿನ ವಂಚನೆಗೆ ತಡೆ: ಆಧಾರ್ ಆಧಾರಿತ ಪಾವತಿ ವ್ಯವಸ್ಥೆ (AePS) ಮುಖಾಂತರ ನಡೆಯುವ ಸೈಬರ್ ವಂಚನೆಗಳಿಂದ ಬ್ಯಾಂಕ್ ಖಾತೆಯನ್ನು ರಕ್ಷಿಸಬಹುದು.

• ಸಂಪೂರ್ಣ ನಿಯಂತ್ರಣ: ನಿಮ್ಮ ಬಯೋಮೆಟ್ರಿಕ್ ಮಾಹಿತಿಯನ್ನು ಯಾವಾಗ ಬಳಸಬೇಕು ಮತ್ತು ಯಾವಾಗ ಮುಚ್ಚಿಡಬೇಕು ಎಂಬ ಸಂಪೂರ್ಣ ಹಕ್ಕು ನಿಮ್ಮ ಬಳಿಯೇ ಇರುತ್ತದೆ.

• ಒಟಿಪಿ ಸೇವೆ ಲಭ್ಯ: ಬಯೋಮೆಟ್ರಿಕ್ ಲಾಕ್ ಮಾಡಿದಾಗಲೂ ನಿಮ್ಮ ಮೊಬೈಲ್‌ಗೆ ಬರುವ OTP (One Time Password) ಆಧಾರಿತ ಆಧಾರ್ ಸೇವೆಗಳು ಯಥಾರೀತಿ ಕಾರ್ಯನಿರ್ವಹಿಸುತ್ತವೆ.