ಚುನಾವಣೆ ಆಯೋಗದಲ್ಲಿ ಭಿನ್ನಾಭಿಪ್ರಾಯ ಸತ್ಯಕ್ಕೆ ದೂರ: ಸಿಇಸಿ ಜ್ಞಾನೇಶ್ ಕುಮಾರ್ ವಿರುದ್ಧದ ವಿಪಕ್ಷಗಳ ಆರೋಪಕ್ಕೆ ‘ಇಸಿಐ’ ತಿರುಗೇಟು!

ನವದೆಹಲಿ: ಭಾರತೀಯ ಚುನಾವಣೆ ಆಯೋಗದ  ಮುಖ್ಯ ಆಯುಕ್ತ ಜ್ಞಾನೇಶ್ ಕುಮಾರ್ ಹಾಗೂ ಇತರ ಚುನಾವಣೆ ಆಯುಕ್ತರ ನಡುವೆ ಯಾವುದೇ ರೀತಿಯ ಭಿನ್ನಾಭಿಪ್ರಾಯಗಳಿಲ್ಲ ಎಂದು ಆಯೋಗದ ಮೂಲಗಳು ಸ್ಪಷ್ಟಪಡಿಸಿವೆ.

ಚುನಾವಣೆ ಆಯುಕ್ತರಾದ ಸುಖ್‌ಬೀರ್ ಸಿಂಗ್ ಸಂಧು ಮತ್ತು ವಿವೇಕ್ ಜೋಶಿ ಅವರು ಮತದಾರರ ಪಟ್ಟಿ ಪರಿಷ್ಕರಣೆ (SIR) ಪ್ರಕ್ರಿಯೆ ಹಾಗೂ ‘ಫಾರ್ಮ್ 6’ ಬದಲಾವಣೆ ಸೇರಿದಂತೆ ಪ್ರಮುಖ ನಿರ್ಧಾರಗಳ ಕುರಿತು 10 ತಿಂಗಳಲ್ಲಿ 14 ಬಾರಿ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ ಎಂಬ ಮಾಧ್ಯಮ ವರದಿಗಳ ಬೆನ್ನಲ್ಲೇ ಈ ಸ್ಪಷ್ಟನೆ ಹೊರಬಿದ್ದಿದೆ.

ವಿಪಕ್ಷಗಳ ವಾಗ್ದಾಳಿ ಹಾಗೂ ಮಹಾಭಿಯೋಗದ ಆಗ್ರಹ:

ವರದಿ ಬಹಿರಂಗಗೊಳ್ಳುತ್ತಿದ್ದಂತೆಯೇ ಕಾಂಗ್ರೆಸ್, ಶಿವಸೇನೆ (ಯುಬಿಟಿ), ಸಮಾಜವಾದಿ ಪಾರ್ಟಿ ಹಾಗೂ ತೃಣಮೂಲ ಕಾಂಗ್ರೆಸ್ ಸೇರಿದಂತೆ ವಿರೋಧ ಪಕ್ಷಗಳ ನಾಯಕರು ಕೇಂದ್ರ ಸರ್ಕಾರ ಮತ್ತು ಚುನಾವಣೆ ಆಯೋಗದ ವಿರುದ್ಧ ಹಾಯ್ದು ಬಿದ್ದಿದ್ದಾರೆ. ಮುಖ್ಯ ಚುನಾವಣೆ ಆಯುಕ್ತ ಜ್ಞಾನೇಶ್ ಕುಮಾರ್ ಅವರನ್ನು ಪೀಠದಿಂದ ವಜಾಗೊಳಿಸಲು ‘ಮಹಾಭಿಯೋಗ’ (Impeachment) ನಿರ್ಣಯ ಮಂಡಿಸಬೇಕು ಎಂದು ನಾಯಕರು ಒತ್ತಾಯಿಸಿದ್ದಾರೆ.

ಆಯೋಗದ ಸ್ಪಷ್ಟನೆ ಏನು?

• ಯಾವುದೇ ವಿರೋಧವಿಲ್ಲ: ಇಸಿಐ ನಿಯಮಗಳ ಪ್ರಕಾರ, ಯಾವುದೇ ತೀರ್ಮಾನಗಳನ್ನು ಮೂವರು ಆಯುಕ್ತರು ಸರ್ವಾನುಮತದಿಂದ ಅಥವಾ ಬಹುಮತದಿಂದ ಕೈಗೊಳ್ಳುತ್ತಾರೆ. ಆಯುಕ್ತರು ಕೇವಲ ಕೆಲವು ಸಲಹೆ/ಗಮನಾರ್ಹ ಅಂಶಗಳನ್ನು ಹಂಚಿಕೊಂಡಿದ್ದರೇ ಹೊರತು ಆಡಳಿತಾತ್ಮಕವಾಗಿ ಯಾವುದೇ ಭಿನ್ನಾಭಿಪ್ರಾಯ ದಾಖಲಿಸಿಲ್ಲ.

• ಸರ್ವಾನುಮತದ ಸಹಿ: ಆಯೋಗ ತೆಗೆದುಕೊಂಡಿರುವ ವಿಶೇಷ ಸಾಂದ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯ ನಿರ್ಧಾರಗಳು ಸೇರಿದಂತೆ ಪ್ರತಿಯೊಂದು ಆದೇಶಕ್ಕೂ ಮೂವರೂ ಆಯುಕ್ತರ ಅಂಕಿತವಿದೆ ಎಂದು ಸ್ಪಷ್ಟಪಡಿಸಲಾಗಿದೆ.