“ಎಲ್ಲ ಪುರುಷರೂ ಒಂದೇ ಅಲ್ಲ”: ರಸ್ತೆಯಲ್ಲಿ ಸೀರೆ ಧರಿಸಿ ಬೈಕ್ ಚಲಾಯಿಸಿದ ಯುವತಿ, ದಾರಿ ಬಿಟ್ಟು ಪ್ರೋತ್ಸಾಹಿಸಿದ ಸಾರ್ವಜನಿಕರು!

ದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯ ವಾಹನ ನಿಬಿಡ ರಸ್ತೆಗಳಲ್ಲಿ ಸೀರೆ ಉಟ್ಟು ಅತ್ಯಂತ ಆತ್ಮವಿಶ್ವಾಸದಿಂದ ಬೈಕ್ ಚಲಾಯಿಸಿದ ‘ಸಿಯಾ’ ಎಂಬ ಮಹಿಳಾ ಬೈಕರ್ ಹಂಚಿಕೊಂಡಿರುವ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದ್ದು, ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿದೆ.

ಸೌಜನ್ಯ ತೋರಿದ ಚಾಲಕರು ಹಾಗೂ ಸಾರ್ವಜನಿಕರು:

ಸಿಯಾ ಅವರು ದೆಹಲಿಯ ಗಿಜಿಗುಡುವ ಟ್ರಾಫಿಕ್‌ನಲ್ಲಿ ಮೋಟಾರ್‌ಸೈಕಲ್‌ನಲ್ಲಿ ಸಾಗುವಾಗ ತಮಗೆ ಎದುರಾದ ಧನಾತ್ಮಕ ಹಾಗೂ ಗೌರವಪೂರ್ವಕ ಅನುಭವಗಳ ವೀಡಿಯೊ ತುಣುಕುಗಳನ್ನು ಕ್ರೋಡೀಕರಿಸಿ ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದಾರೆ. ವಿಡಿಯೋದಲ್ಲಿ ಸಿಯಾ ಅವರು ಸೀರೆ ಧರಿಸಿ ಸುಲಭವಾಗಿ ಬೈಕ್ ಸವಾರಿ ಮಾಡುತ್ತಿದ್ದರೆ, ರಸ್ತೆಯಲ್ಲಿದ್ದ ಇತರ ವಾಹನ ಚಾಲಕರು ಮತ್ತು ಸಾರ್ವಜನಿಕರು ಅವರಿಗೆ ಯಾವುದೇ ತೊಂದರೆ ನೀಡದೆ ದಾರಿ ಮಾಡಿಕೊಟ್ಟಿರುವುದು ಸೆರೆಯಾಗಿದೆ.

ಅದರಲ್ಲೂ ಮುಖ್ಯವಾಗಿ ಆಟೋ-ರಿಕ್ಷಾ ಚಾಲಕರು ಸಿಯಾ ಅವರಿಗೆ ಸುಲಭವಾಗಿ ಸಾಗಲು ರಸ್ತೆ ಖಾಲಿ ಮಾಡಿಕೊಡುವುದು, ಕೆಲವು ವಾಹನ ಸವಾರರು ಸ್ಮೈಲ್ ಮಾಡಿ, ಹಸ್ತಲಾಘವ ಹಾಗೂ ಚಪ್ಪಾಳೆ ತಟ್ಟಿ ಪ್ರೋತ್ಸಾಹಿಸುವುದು ಮತ್ತು ಟ್ರಾಫಿಕ್‌ನ ನಡುವೆ ಸುರಕ್ಷಿತವಾಗಿ ಮುನ್ನುಗ್ಗಲು ಸಹಾಯ ಮಾಡುವುದು ವೀಡಿಯೊದಲ್ಲಿ ಎದ್ದು ಕಾಣುತ್ತದೆ.

“ಎಲ್ಲ ಪುರುಷರೂ ಒಂದೇ ಅಲ್ಲ” – ವೈರಲ್ ಆದ ಶೀರ್ಷಿಕೆ:

ಸಿಯಾ ಅವರು ತಮ್ಮ ಈ ಪೋಸ್ಟ್‌ಗೆ “Not all men are the same” (ಎಲ್ಲ ಪುರುಷರೂ ಒಂದೇ ತರಹ ಇರುವುದಿಲ್ಲ) ಎಂಬ ಅಡಿಬರಹ (caption) ನೀಡಿದ್ದಾರೆ. ಈ ಸಾಲು ನೆಟ್ಟಿಗರ ಗಮನ ಸೆಳೆದಿದ್ದು, ಕಾಮೆಂಟ್ ವಿಭಾಗದಲ್ಲಿ ಸಾವಿರಾರು ಜನರು ಆಶಾದಾಯಕರಾಗಿ ಸ್ಪಂದಿಸಿದ್ದಾರೆ. ಸಾರ್ವಜನಿಕ ಸ್ಥಳಗಳಲ್ಲಿ ಮಹಿಳೆಯರಿಗೆ ನೀಡುವ ಸಣ್ಣ ಸೌಜನ್ಯ ಹಾಗೂ ಗೌರವವು ಅವರು ಸುರಕ್ಷಿತವಾಗಿ ಮತ್ತು ಸ್ವತಂತ್ರವಾಗಿ ಸಂಚರಿಸಲು ಎಷ್ಟು ಸಹಾಯ ಮಾಡುತ್ತದೆ ಎಂಬುದನ್ನು ಈ ವಿಡಿಯೋ ಬಿಂಬಿಸುತ್ತದೆ ಎಂದು ನೆಟ್ಟಿಗರು ಶ್ಲಾಘಿಸಿದ್ದಾರೆ.

ವಿಶೇಷ ಹಿನ್ನೆಲೆ:

ಇತ್ತೀಚೆಗಷ್ಟೇ ಗುರುಗ್ರಾಮದ ಗಾಲ್ಫ್ ಕೋರ್ಸ್ ರಸ್ತೆಯಲ್ಲಿ ಮಹಿಳಾ ಬೈಕರ್‌ ಒಬ್ಬರಿಗೆ ವೇಗವಾಗಿ ಬಂದ ಕಾರು ಡಿಕ್ಕಿ ಹೊಡೆದು ಅಪಘಾತ ಎಸಗಿದ್ದ ಘಟನೆ ನಡೆದಿತ್ತು. ರಸ್ತೆ ಸುರಕ್ಷತೆ ಮತ್ತು ಮಹಿಳೆಯರ ರಕ್ಷಣೆ ಕುರಿತು ಚರ್ಚೆಗಳು ನಡೆಯುತ್ತಿರುವ ಈ ಸಂದರ್ಭದಲ್ಲಿ, ದೆಹಲಿ ರಸ್ತೆಯ ಈ ಧನಾತ್ಮಕ ಅನುಭವದ ವಿಡಿಯೋ ಸಾರ್ವಜನಿಕರಲ್ಲಿ ಹೊಸ ಭರವಸೆಯನ್ನು ಮೂಡಿಸಿದೆ