ಕೇತನ್ ಅಗರ್ವಾಲ್ ಕೊಲೆಗೂ ಮುನ್ನ ಸಿಯಾ-ಚೇತನ್ ರಹಸ್ಯ ಮದುವೆ: ಆರೋಪಪಟ್ಟಿಯಲ್ಲಿ ಸ್ಫೋಟಕ ವಿಚಾರಗಳು ಬಯಲು!

ಪುಣೆ: 26 ವರ್ಷದ ರಿಯಲ್ ಎಸ್ಟೇಟ್ ಉದ್ಯಮಿ ಕೇತನ್ ಅಗರ್ವಾಲ್ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪುಣೆ ಗ್ರಾಮಾಂತರ ಪೊಲೀಸರು ವಡಗಾಂವ್ ಮಾವಲ್ ನ್ಯಾಯಾಲಯಕ್ಕೆ 5,053 ಪುಟಗಳ ಬೃಹತ್ ದೋಷಾರೋಪಣ ಪಟ್ಟಿಯನ್ನು ಸಲ್ಲಿಸಿದ್ದಾರೆ. ಈ ಭೀಕರ ಹತ್ಯೆಯ ಹಿಂದೆ ಆತನ ನಿಶ್ಚಿತಾರ್ಥಿ ಸಿಯಾ ಗೋಯಲ್ (20), ಆಕೆಯ ಪ್ರಿಯಕರ ಚೇತನ್ ಚೌಧರಿ (22) ಮತ್ತು ಸ್ನೇಹಿತ ರಿತೇಶ್ ಹಾಂಗೇ (22) ನಡೆಸಿರುವ ಮಾಸ್ಟರ್‌ಪ್ಲಾನ್‌ನ ರೋಚಕ ವಿವರಗಳು ಹೊರಬಂದಿವೆ.

ರಾಜಸ್ಥಾನ ಪ್ರವಾಸ: ಸಿಯಾ ಮತ್ತು ಚೇತನ್ 2025ರ ಡಿಸೆಂಬರ್‌ನಲ್ಲೇ ರಹಸ್ಯವಾಗಿ ರಾಜಸ್ಥಾನಕ್ಕೆ ತೆರಳಿದ್ದರು. ಖಾಟು ಶ್ಯಾಮ್ ದೇವಾಲಯದಲ್ಲಿ ಮದುವೆಯಾಗಿದ್ದಾರೆ ಎನ್ನಲಾದ ಜಾಗಕ್ಕೆ ಪೊಲೀಸರು ತೆರಳಿದಾಗ ಅಧಿಕೃತ ನೋಂದಣಿ ಸಿಗಲಿಲ್ಲವಾದರೂ, ಆರೋಪಿಗಳ ಮೊಬೈಲ್ ಫೋನ್‌ನಿಂದ ಇಬ್ಬರೂ ಹೂವಿನ ಹಾರ ಧರಿಸಿರುವ ಫೋಟೋ ಹಾಗೂ ರೈಲು ಪ್ರಯಾಣದ ದಾಖಲೆಗಳನ್ನು ಪೊಲೀಸರು ವಶಪಡಿಸಿಕೊಂಡು ಕೋರ್ಟ್‌ಗೆ ಸಲ್ಲಿಸಿದ್ದಾರೆ.

ಕುಟುಂಬದ ಒತ್ತಡ: ಸಿಯಾ ಕುಟುಂಬಕ್ಕೆ ಈ ಪ್ರೇಮ ಪ್ರಕರಣದ ಬಗ್ಗೆ ವಿರೋಧವಿದ್ದ ಕಾರಣ, ಫೆಬ್ರವರಿ 19, 2026 ರಂದು ಕೇತನ್ ಅಗರ್ವಾಲ್ ಜೊತೆ ನಿಶ್ಚಿತಾರ್ಥ ಮಾಡಿಸಲಾಗಿತ್ತು. 2026 ರ ನವೆಂಬರ್‌ನಲ್ಲಿ ಮದುವೆ ನಿಗದಿಯಾಗಿತ್ತು.

ಸುಪಾರಿ ಪ್ಲಾನ್ ರದ್ದು: ಆರಂಭದಲ್ಲಿ ಕೇತನ್‌ನನ್ನು ಮಹಾರಾಷ್ಟ್ರದ ಹೊರಗಿನ ಜನರನ್ನು ಬಳಸಿ ತೀವ್ರವಾಗಿ ಗಾಯಗೊಳಿಸಲು (ಹೊಡೆಯಲು) ಯೋಜನೆ ರೂಪಿಸಿದ್ದರು. ಆದರೆ, ಸುಪಾರಿ ಆಸಾಮಿ ಪೊಲೀಸರಿಗೆ ಸಿಕ್ಕಿಬಿದ್ದರೆ ತೊಂದರೆಯಾಗುತ್ತದೆ ಎಂದು ಆ ಪ್ಲಾನ್ ಕೈಬಿಟ್ಟರು.

ಸ್ಥಳ ಪರಿಶೀಲನೆ : ಲೋನಾವಲಾದ ಟೈಗರ್ ಪಾಯಿಂಟ್ ಸೇರಿದಂತೆ ಹಲವು ಬೆಟ್ಟದ ಪ್ರದೇಶಗಳನ್ನು ಪರಿಶೀಲಿಸಿದರು. ಕೊನೆಗೆ 2025ರ ಮಾರ್ಚ್‌ನಲ್ಲಿ ಲೋಹಗಡ್ ಕೋಟೆಯಲ್ಲಿ ಯುವತಿಯೊಬ್ಬಳು ಬಿದ್ದು ಮೃತಪಟ್ಟಿದ್ದ ಘಟನೆಯನ್ನು ಗಮನಿಸಿ, ಕೇತನ್ ಸಾವನ್ನು ಕೂಡ “ಸೆಲ್ಫಿ ತೆಗೆಯುವಾಗ ಆಕಸ್ಮಿಕವಾಗಿ ಬಿದ್ದು ಸಾವು” ಎಂದು ಬಿಂಬಿಸಲು ಲೋಹಗಡ್ ಕೋಟೆಯನ್ನು ಆಯ್ಕೆ ಮಾಡಿಕೊಂಡರು.

ಜೂನ್ 4 ರಂದು ಸಿಯಾ, ಕೇತನ್‌ನನ್ನು ಲೋಹಗಡ್‌ಗೆ ಕರೆಯೊಯ್ದು ಅಲ್ಲಿಯೇ ಕೊಲ್ಲಲು ಯತ್ನಿಸಿದ್ದಳು. ಜೂನ್ 6 ರಂದು ಬಾಲಿಗೆ ಪ್ರಿ-ವೆಡ್ಡಿಂಗ್ ಶೂಟ್‌ಗೆ ಹೋಗಬೇಕಿತ್ತು. ಆದರೆ ಕೊಲೆ ಪ್ಲಾನ್ ಮುಗಿಯದ ಕಾರಣ, ಏರ್‌ಪೋರ್ಟ್‌ಗೆ ಹೋಗುವ ದಾರಿಯಲ್ಲಿ ಖಾಲಾಪುರದ ಕೆಫೆಯೊಂದರ ವಾಶ್‌ರೂಮ್‌ನಲ್ಲಿ ಕೇತನ್ ಪಾಸ್‌ಪೋರ್ಟ್ ಹರಿದುಹಾಕಿ ಪ್ರವಾಸ ರದ್ದಾಗುವಂತೆ ಮಾಡಿದ್ದಳು.

ಜೂನ್ 14 ರಂದು ಮತ್ತೆ ಲೋಹಗಡ್‌ಗೆ ಕರೆದೊಯ್ದು ಕಂದಕಕ್ಕೆ ತಳ್ಳಲು ಯತ್ನಿಸಿದಾಗ ಕೇತನ್ ಪೊದೆಯೊಂದನ್ನು ಹಿಡಿದು ಬಚಾವಾಗಿದ್ದನು. ಆಗ ಸಿಯಾ “ಹಾವಿದೆ!” ಎಂದು ಸುಳ್ಳು ಹೇಳಿ ನಾಟಕವಾಡಿದ್ದಳು.

 ‘ಮಾಹಿ’ ಹೆಸರಿನ ನಕಲಿ ಇನ್‌ಸ್ಟಾಗ್ರಾಮ್ ಐಡಿ ಸಂಚು

ಕೇತನ್‌ಗೆ ಅನುಮಾನ ಬಾರದಿರಲಿ ಎಂದು ರಿತೇಶ್ ಹಾಂಗೇ ‘ಮಾಹಿ’ (Mahi) ಎಂಬ ಹೆಸರಿನ ನಕಲಿ ಇನ್‌ಸ್ಟಾಗ್ರಾಮ್ ಐಡಿ ಸೃಷ್ಟಿಸಿದ್ದನು.

ಜೂನ್ 19 ರಂದು ಸಿಯಾ ಹುಟ್ಟುಹಬ್ಬವಿದ್ದ ಕಾರಣ, “ಸಿಯಾಗೆ ಸರ್ಪ್ರೈಸ್ ಬರ್ತ್‌ಡೇ ಪಾರ್ಟಿ ಕೊಡಲು ಜೂನ್ 18 ರಂದು ಲೋಹಗಡ್ ಕೋಟೆಗೆ ಕರೆದುಕೊಂಡು ಬಾ” ಎಂದು ಮಾಹಿ ಐಡಿಯಿಂದ ಕೇತನ್‌ಗೆ ಮೆಸೇಜ್ ಕಳುಹಿಸಿ ಬಲೆಗೆ ಕೆಡವಲಾಯಿತು.

ಕೋಟೆಯ 400 ಅಡಿ ಎತ್ತರದ ಕಂದಕದ ಅಂಚಿನಲ್ಲಿ ಕೇತನ್ ನಿಂತಾಗ, ಸಿಯಾ ಆತನ ಹೆಗಲಿಗೆ ತಳ್ಳಿದಳು, ಚೇತನ್ ಆತನ ಕಾಲಿಗೆ ಒದ್ದನು. ಕೇತನ್ ಆಳವಾದ ಕಂದಕಕ್ಕೆ ಬಿದ್ದು ಸ್ಥಳದಲ್ಲೇ ಮೃತಪಟ್ಟನು.

ಪ್ರತ್ಯಕ್ಷದರ್ಶಿಗಳು: ಪ್ರಕರಣದಲ್ಲಿ ಒಟ್ಟು 85 ರಿಂದ 100 ಸಾಕ್ಷಿಗಳನ್ನು ಹೆಸರಿಸಲಾಗಿದ್ದು, ಅದರಲ್ಲಿ 5 ಪ್ರತ್ಯಕ್ಷದರ್ಶಿಗಳು ಸಿಯಾ ಮತ್ತು ಚೇತನ್ ಕೃತ್ಯ ಎಸಗುವುದನ್ನು ಕಂಡಿದ್ದಾರೆ.

ಡಿಜಿಟಲ್ ಸಾಕ್ಷಿ: ಸಿಯಾ ಮತ್ತು ಚೇತನ್ ನಡುವಿನ ಸಾವಿರಾರು ವಾಟ್ಸಾಪ್ ಕಾಲ್‌ಗಳು, ನಕಲಿ ಇನ್‌ಸ್ಟಾಗ್ರಾಮ್ ಐಡಿಯ ಚಾಟ್‌ಗಳು, ಮತ್ತು ಗೂಗಲ್ ಸರ್ಚ್ ಹಿಸ್ಟರಿಯನ್ನು ಸೈಬರ್ ತಜ್ಞರ ಮೂಲಕ ಮರುಪಡೆಯಲಾಗಿದೆ.

ಪ್ರಸ್ತುತ ಮೂವರೂ ಆರೋಪಿಗಳು (ಸಿಯಾ, ಚೇತನ್, ರಿತೇಶ್) ಪುಣೆಯ ಯರವಾಡ ಮಧ್ಯವರ್ತಿ ಕಾರಾಗೃಹದಲ್ಲಿದ್ದು, ಜಾಮೀನು ರಹಿತ ನ್ಯಾಯಾಂಗ ಬಂಧನದಲ್ಲಿದ್ದಾರೆ.