ಆಸ್ಪತ್ರೆ ಹೆಸರಲ್ಲಿ ಹೊಸ ನಮೂನೆಯ ಯುಪಿಐ ಸ್ಕ್ಯಾಮ್: ಬೆಂಗಳೂರಿನಲ್ಲಿ ರ್‍ಯಾಪಿಡೋ ರೈಡರ್‌ಗೆ ಶಾಕ್!

ಬೆಂಗಳೂರು: ತಾಯಿಯ ಮುಖದಲ್ಲಿ ನಗು ನೋಡಲು ದಿನವಿಡೀ ಕಷ್ಟಪಟ್ಟು ಸಂಪಾದಿಸಿದ್ದ ಹಣವನ್ನು ಕಾಲೇಜು ವಿದ್ಯಾರ್ಥಿಯೊಬ್ಬ ನೆರವು ನೀಡುವ ಭರದಲ್ಲಿ ಕಳೆದುಕೊಂಡ ಆಘಾತಕಾರಿ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ. ಆಸ್ಪತ್ರೆಯ ತುರ್ತು ಪರಿಸ್ಥಿತಿಯ ನೆಪವೊಡ್ಡಿ ರ್‍ಯಾಪಿಡೋ  ಚಾಲಕನಾಗಿದ್ದ 7ನೇ ಸೆಮೆಸ್ಟರ್ ವಿದ್ಯಾರ್ಥಿಗೆ ಸೈಬರ್ ವಂಚಕರು ₹1,000 ವಂಚಿಸಿದ್ದಾರೆ.

ಘಟನೆಯ ಹಿನ್ನೆಲೆ:

ಆರ್‌ಟಿ ನಗರದ ಲಕ್ಷ್ಮಿ ಆಸ್ಪತ್ರೆಯಿಂದ ಡೆಲಿವರಿ ವಿನಂತಿ ಸ್ವೀಕರಿಸಿದ ವಿದ್ಯಾರ್ಥಿಗೆ ವಂಚಕ ಕರೆ ಮಾಡಿದ್ದಾನೆ. ಆಸ್ಪತ್ರೆಯಲ್ಲಿ ರೋಗಿಯೊಬ್ಬರು ಡಿಸ್ಚಾರ್ಜ್ ಆಗಬೇಕಿದೆ, ಆದರೆ ತನ್ನ ಯುಪಿಐ (UPI) ಕೆಲಸ ಮಾಡುತ್ತಿಲ್ಲ ಎಂದು ಕಟ್ಟುಕಥೆ ಹೆಣೆದಿದ್ದಾನೆ. ವಿದ್ಯಾರ್ಥಿಯ ತಾಯಿಯ ಮೊಬೈಲ್ ಸಂಖ್ಯೆಗೆ ₹5,000 ಕಳುಹಿಸುವುದಾಗಿ ಮತ್ತು ಸಹಾಯ ಮಾಡಿದ್ದಕ್ಕೆ ₹300 ಹೆಚ್ಚುವರಿ ನೀಡುವುದಾಗಿ ನಂಬಿಸಿದ್ದಾನೆ.

ನಕಲಿ ಎಸ್‌ಎಂಎಸ್ ಜಾಲ:

ಅದರಂತೆ ವಂಚಕ ತಾಯಿಯ ಮೊಬೈಲ್‌ಗೆ ₹5,000 ಜಮೆಯಾಗಿದೆ ಎಂಬಂತೆ ನಕಲಿ ಬ್ಯಾಂಕ್ ಎಸ್‌ಎಂಎಸ್ ಕಳುಹಿಸಿದ್ದಾನೆ. ಅದನ್ನು ನಿಜವೆಂದು ನಂಬಿದ ತಾಯಿ ಮಗನ ಖಾತೆಗೆ ₹5,000 ವರ್ಗಾಯಿಸಿದ್ದಾರೆ. ತಕ್ಷಣವೇ ವಂಚಕ ಕಳುಹಿಸಿದ ಕ್ಯೂಆರ್ ಕೋಡ್ (QR Code) ಸ್ಕ್ಯಾನ್ ಮಾಡಿ ವಿದ್ಯಾರ್ಥಿ ₹1,000 “ಡೆಸ್ಕ್ ಫೀ” ಪಾವತಿಸಿದ್ದಾನೆ.

ಇನ್ನೂ ಹೆಚ್ಚಿನ ಹಣ ರವಾನಿಸುವಂತೆ ವಂಚಕ ಒತ್ತಡ ಹೇರಿದಾಗ ಅನುಮಾನಗೊಂಡ ತಾಯಿ ಬ್ಯಾಂಕಿಂಗ್ ಆ್ಯಪ್ ಪರಿಶೀಲಿಸಿದಾಗ ಯಾವುದೇ ಹಣ ಜಮೆಯಾಗಿಲ್ಲದಿರುವುದು ಬೆಳಕಿಗೆ ಬಂದಿದೆ. ತಾನು ಮೋಸ ಹೋಗಿರುವುದು ತಿಳಿಯುತ್ತಿದ್ದಂತೆ ವಿದ್ಯಾರ್ಥಿ ಹಣ ಮರಳಿಸುವಂತೆ ಗಿಂಜಿದರೂ ವಂಚಕ ಕರೆ ಕಡಿತಗೊಳಿಸಿ ನಂಬರ್ ಬ್ಲಾಕ್ ಮಾಡಿದ್ದಾನೆ.

ಸಾಮಾಜಿಕ ಜಾಲತಾಣದಲ್ಲಿ ಈ ಘಟನೆಯನ್ನು ಹಂಚಿಕೊಂಡಿರುವ ವಿದ್ಯಾರ್ಥಿ, ಭಾವನಾತ್ಮಕವಾಗಿ ಆಟವಾಡುವ ಇಂತಹ ನಕಲಿ ಕರೆಗಳು ಹಾಗೂ ಎಸ್‌ಎಂಎಸ್‌ಗಳ ಬಗ್ಗೆ ಸಾರ್ವಜನಿಕರು ಮತ್ತು ರೈಡರ್‌ಗಳು ತೀವ್ರ ಎಚ್ಚರಿಕೆಯಿಂದಿರಬೇಕು ಎಂದು ಮನವಿ ಮಾಡಿದ್ದಾರೆ.