ಪ್ರಿಯತಮ ನೇಣಿಗೆ ಶರಣು, ಮತ್ತೊಂದು ಕೋಣೆಯಲ್ಲಿ ಪ್ರೇಯಸಿ ಲಾಕ್: ನಕಲಿ ಆಧಾರ್ ಬಳಸಿ ಸಹೋದರ- ಸಹೋದರಿಯಂತೆ ವಾಸವಿದ್ದ ಜೋಡಿ!

ಬೇಗುಸರಾಯ್ (ಬಿಹಾರ): ಬಿಹಾರದ ಬೇಗುಸರಾಯ್ ಜಿಲ್ಲೆಯ ಬಾಡಿಗೆ ಮನೆಯೊಂದರಲ್ಲಿ 21 ವರ್ಷದ ಯುವಕನೊಬ್ಬ ಶವವಾಗಿ ನೇತಾಡುತ್ತಿದ್ದು, ಆತನ ಪ್ರೇಯಸಿ ಮತ್ತೊಂದು ಕೋಣೆಯಲ್ಲಿ ಲಾಕ್ ಆಗಿರುವ ಆಘಾತಕಾರಿ ಘಟನೆ ಬೆಳಕಿಗೆ ಬಂದಿದೆ.

ಮೃತರನ್ನು ಅಮೃತ್ ಶರ್ಮಾ ಎಂದು ಗುರುತಿಸಲಾಗಿದೆ. ಈ ಜೋಡಿಯು ತಾವು ಒಡಹುಟ್ಟಿದ ಸಹೋದರ-ಸಹೋದರಿ ಎಂದು ನಂಬಿಸಿ ನಕಲಿ ಆಧಾರ್ ಕಾರ್ಡ್‌ಗಳನ್ನು ನೀಡಿ ಮನೆ ಬಾಡಿಗೆಗೆ ಪಡೆದಿರುವುದು ತನಿಖೆಯಿಂದ ಬಹಿರಂಗವಾಗಿದೆ.

ಪ್ರಾಥಮಿಕ ತನಿಖೆಯ ಪ್ರಕಾರ ಆತ್ಮಹತ್ಯೆ ಎಂದು ಶಂಕಿಸಲಾಗಿದ್ದು, ವಾಗ್ವಾದದ ಬಳಿಕ ಅಮೃತ್ ತನ್ನ ಪ್ರೇಯಸಿ ಅರ್ಚನಾ ಕುಮಾರಿಯನ್ನು ಕೊಠಡಿಯಲ್ಲಿ ಕೂಡಿಹಾಕಿ ಈ ಕೃತ್ಯವೆಸೆಗಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ಘಟನೆ ಸಂಬಂಧ ಅರ್ಚನಾಳನ್ನು ವಶಕ್ಕೆ ಪಡೆದು ವಿಚಾರಣೆ ಮುಂದುವರಿಸಲಾಗಿದೆ.

ನಕಲಿ ಆಧಾರ್ ಕಾರ್ಡ್‌ ಬಳಕೆ: ಮನೆ ಮಾಲೀಕರಿಗೆ ತಮ್ಮ ನಿಜವಾದ ಸಂಬಂಧವನ್ನು ಮುಚ್ಚಿಡಲು ನಕಲಿ ವಿಳಾಸ ಮತ್ತು ತಂದೆಯ ಹೆಸರಿನ ನಕಲಿ ಆಧಾರ್ ಕಾರ್ಡ್‌ಗಳನ್ನು ನೀಡಿ ವಂಚಿಸಲಾಗಿದೆ.

ಮಾಜಿ ಪ್ರೇಮಿಯಿಂದ ಬೆದರಿಕೆ ಆರೋಪ: ಅಮೃತ್ ಅವರ ಕುಟುಂಬದವರು ಅರ್ಚನಾಳ ಮಾಜಿ ಪ್ರೇಮಿ ತಮಗೆ ಬೆದರಿಕೆ ಹಾಕಿದ್ದನೆಂದು ಗಂಭೀರ ಆರೋಪ ಮಾಡಿದ್ದು, ಆ ಕೋನದಲ್ಲೂ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಪೊಲೀಸ್ ತನಿಖೆ ತೀವ್ರ: ಕುಟುಂಬದಿಂದ ಔಪಚಾರಿಕ ದೂರು ಸ್ವೀಕರಿಸಿದ ಬಳಿಕ ಮುಂದಿನ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಡಿಎಸ್‌ಪಿ ಪ್ರಶಾಂತ್ ಕುಮಾರ್ ತಿಳಿಸಿದ್ದಾರೆ.

ಪ್ರೇಮಿಗಳ ನಡುವಿನ ಭಿನ್ನಾಭಿಪ್ರಾಯ ಮತ್ತು ನಕಲಿ ದಾಖಲೆಗಳ ಹಗರಣದ ಕುರಿತು ಪೊಲೀಸರು ವಿವಿಧ ಆಯಾಮಗಳಲ್ಲಿ ತನಿಖೆ ಮುಂದುವರಿಸಿದ್ದಾರೆ.