ಫ್ಲೈಓವರ್ ಮೇಲೆ ಮಹಿಳಾ ಪೊಲೀಸ್ ಅಧಿಕಾರಿಯಿಂದ ಹುಟ್ಟುಹಬ್ಬ ಆಚರಣೆ: ವಿವಾದದ ಕಿಡಿ, ನಾಲ್ವರು ಮೃತಪಟ್ಟ ಸ್ಥಳದಲ್ಲೇ ರೀಲ್ಸ್ ಹಂಗಾಮ!

ಮಹಾರಾಷ್ಟ್ರ: ಮಹಾರಾಷ್ಟ್ರದ ಕರಾಡ್‌ನಲ್ಲಿ ಮಹಿಳಾ ಪೊಲೀಸ್ ಅಧಿಕಾರಿಯೊಬ್ಬರು ರಸ್ತೆ ಅಪಘಾತದಲ್ಲಿ ನಾಲ್ವರು ಯುವಕರು ದುರ್ಮರಣಕ್ಕೀಡಾಗಿದ್ದ ಅದೇ ಫ್ಲೈಓವರ್ ಮೇಲೆ ತಮ್ಮ ಹೊಸ ಕಾರಿನ ಮೇಲೆ ಕೇಕ್ ಕತ್ತರಿಸಿ, ಪೈರೋ ಗನ್ ಬಳಸಿ ಹುಟ್ಟುಹಬ್ಬ ಆಚರಿಸಿಕೊಂಡಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುವ ಮೂಲಕ ತೀವ್ರ ವಿವಾದಕ್ಕೆ ಕಾರಣವಾಗಿದೆ.

ಕಾನೂನು ಪಾಲಿಸಬೇಕಾದ ಪೋಲೀಸ್ ಸಿಬ್ಬಂದಿಯೇ ಸಾರ್ವಜನಿಕ ರಸ್ತೆಯಲ್ಲಿ ಟ್ರಾಫಿಕ್ ನಿಯಮಗಳನ್ನು ಉಲ್ಲಂಘಿಸಿ ಹುಚ್ಚಾಟ ಮೆರೆದಿರುವುದಕ್ಕೆ ಸಾರ್ವಜನಿಕರಿಂದ ಆಕ್ರೋಶ ವ್ಯಕ್ತವಾಗಿದೆ.

ಅಧಿಕಾರಿ ಸೋನಲ್ ಪಾಟೀಲ್ ಅವರು ಅಕ್ಟೋಬರ್ 31ರ ರಾತ್ರಿ ಕೊಲ್ಹಾಪುರ ನಕಾ-ನಂದ್ಲಾಪುರ್ ಫ್ಲೈಓವರ್ ಮೇಲೆ ರಾತ್ರಿ ವೇಳೆ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದಾರೆ. ಕಾರಿನ ಬಾನೆಟ್ ಮೇಲೆ ಕುಳಿತು ಪೋಸ್ ನೀಡುವುದು, ಕೇಕ್ ಕತ್ತರಿಸುವುದು ಮತ್ತು ಪೈರೋ ಗನ್‌ನಿಂದ ಚಿಮ್ಮಿದ ಚಿನ್ನದ ಕಿಡಿಗಳೊಂದಿಗೆ ಸಂಭ್ರಮಿಸಿ ರೀಲ್ಸ್ ಮಾಡಲಾಗಿದೆ.

ವಿಶೇಷವೆಂದರೆ, ಕೆಲವೇ ದಿನಗಳ ಹಿಂದೆ ಇದೇ 3.5 ಕಿ.ಮೀ ಉದ್ದದ ಫ್ಲೈಓವರ್‌ನಲ್ಲಿ ನಡೆದ ಭೀಕರ ಕಾರು ಅಪಘಾತದಲ್ಲಿ ನಾಲ್ವರು ಸ್ಥಳದಲ್ಲೇ ಮೃತಪಟ್ಟಿದ್ದರು ಹಾಗೂ ಇಬ್ಬರು ಗಂಭೀರವಾಗಿ ಗಾಯಗೊಂಡಿದ್ದರು. ಅಂತಹ ದುರ್ಘಟನೆ ನಡೆದ ಸ್ಥಳದಲ್ಲೇ ಪೋಲೀಸ್ ಅಧಿಕಾರಿಯೊಬ್ಬರು ಈ ರೀತಿಯ ಅಸಮರ್ಪಕ ವರ್ತನೆ ತೋರಿರುವುದು ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ವಿವಾದಾತ್ಮಕ ಜನ್ಮದಿನಾಚರಣೆ: ಕರಾಡ್‌ನ ಫ್ಲೈಓವರ್ ಮೇಲೆ ಮಹಿಳಾ ಪೊಲೀಸ್ ಅಧಿಕಾರಿ ಸೋನಲ್ ಪಾಟೀಲ್ ತಮ್ಮ ಹೊಸ ಕಾರಿನ ಬಳಿ ಕೇಕ್ ಕತ್ತರಿಸಿ ಪೈರೋ ಗನ್ ಸಿಡಿಸಿ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದಾರೆ.

ಅಪಘಾತ ಸಂಭವಿಸಿದ ಸ್ಥಳದಲ್ಲೇ ಸಂಭ್ರಮ: ಕೆಲ ದಿನಗಳ ಹಿಂದಷ್ಟೇ ನಾಲ್ವರು ಯುವಕರು ಭೀಕರ ರಸ್ತೆ ಅಪಘಾತದಲ್ಲಿ ಜೀವ ಕಳೆದುಕೊಂಡಿದ್ದ ಅದೇ ರಸ್ತೆಯಲ್ಲಿ ಈ ರೀತಿ ಹುಟ್ಟುಹಬ್ಬ ಆಚರಿಸಿಕೊಳ್ಳುವುದು ಎಷ್ಟು ಸರಿ ಎಂದು ನೆಟ್ಟಿಗರು ಪ್ರಶ್ನಿಸಿದ್ದಾರೆ.

ಟ್ರಾಫಿಕ್ ನಿಯಮ ಉಲ್ಲಂಘನೆ ಆರೋಪ: ಸಾರ್ವಜನಿಕ ರಸ್ತೆ ಹಾಗೂ ಮೇಲ್ಸೇತುವೆ ಮೇಲೆ ವಾಹನ ನಿಲ್ಲಿಸಿ ರೀಲ್ಸ್ ಮಾಡಿರುವುದು ಮತ್ತು ಕಾನೂನು ರಕ್ಷಿಸಬೇಕಾದವರೇ ನಿಯಮ ಮೀರಿ ವರ್ತಿಸಿರುವುದು ವ್ಯಾಪಕ ಟೀಕೆಗೆ ಗುರಿಯಾಗಿದೆ.