ಬಯಲಾಯ್ತು ಭೀಕರ ‘ಬೇಬಿ ಬಜಾರ್‌’ ಜಾಲ: ಗಂಡು ಮಗುವಿಗೆ 8 ಲಕ್ಷ, ಹೆಣ್ಣಿಗೆ ಅರ್ಧ ಬೆಲೆ, ಆಸ್ಪತ್ರೆ ವೈದ್ಯೆ ಸೇರಿ 13 ಮಂದಿ ಬಂಧನ!

ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಅತ್ಯಂತ ಆಘಾತಕಾರಿ ಮತ್ತು ಅಮಾನವೀಯ ಶಿಶು ಮಾರಾಟ ದಂಧೆ (Baby Trafficking Racket) ಜಾಲವನ್ನು ದೆಹಲಿ ಪೊಲೀಸರು ಭೇದಿಸಿದ್ದಾರೆ. ಬಡ ಕುಟುಂಬಗಳ ಹಸುಗೂಸುಗಳನ್ನು ಖರೀದಿಸಿ, ಮಕ್ಕಳಿಲ್ಲದ ದಂಪತಿಗಳಿಗೆ ಲಕ್ಷಾಂತರ ರೂಪಾಯಿಗೆ ಮಾರಾಟ ಮಾಡುತ್ತಿದ್ದ ಲೇಡಿ ಡಾಕ್ಟರ್ ಸೇರಿದಂತೆ ಒಟ್ಟು 13 ಜನರನ್ನು ಪೊಲೀಸರು ಬಂಧಿಸಿದ್ದು, 5 ನವಜಾತ ಶಿಶುಗಳನ್ನು ರಕ್ಷಿಸಿದ್ದಾರೆ.

ಈ ದಂಧೆಯಲ್ಲಿ ಗಂಡು ಮಗುವಿಗೆ 6 ರಿಂದ 8 ಲಕ್ಷ ರೂಪಾಯಿ ಹಾಗೂ ಹೆಣ್ಣು ಮಗುವಿಗೆ 3 ರಿಂದ 4 ಲಕ್ಷ ರೂಪಾಯಿ ನಿಗದಿಪಡಿಸಿ ಮಾರಾಟ ಮಾಡಲಾಗುತ್ತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಆಸ್ಪತ್ರೆಯೇ ಆಗಿತ್ತು ದಂಧೆಯ ಮುಖ್ಯ ಕೇಂದ್ರ!

ದೆಹಲಿಯ ರೋಹಿಣಿಯ ಬೇಗಂಪುರದಲ್ಲಿರುವ ‘ಹೀರಾ ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆ’ (Hira’s Multispeciality Hospital) ಈ ಇಡೀ ದಂಧೆಯ ಕೇಂದ್ರ ಕಚೇರಿಯಾಗಿತ್ತು. ಆಸ್ಪತ್ರೆಯ ಮಾಲೀಕರಾದ ಡಾ. ವಿವೇಕಿ ಎಂಬಾಕೆಯೇ ಈ ಕಳ್ಳಸಾಗಣೆ ಜಾಲದ ಪ್ರಮುಖ ಸೂತ್ರಧಾರಿಯಾಗಿದ್ದಳು. ರಾಜಸ್ಥಾನ ಮತ್ತು ಗುಜರಾತ್‌ನ ಬಡ ಕುಟುಂಬಗಳಿಂದ ಕೇವಲ 1 ರಿಂದ 2 ಲಕ್ಷ ರೂ. ನೀಡಿ ಕದಿಯಲಾದ ಅಥವಾ ಖರೀದಿಸಲಾದ 4-5 ದಿನದ ಹಸುಗೂಸುಗಳನ್ನು ಈ ಆಸ್ಪತ್ರೆಯಲ್ಲಿ ಬಚ್ಚಿಡಲಾಗುತ್ತಿತ್ತು. ಬಳಿಕ ಶ್ರೀಮಂತ ಗ್ರಾಹಕರಿಗೆ ನಕಲಿ ಜನನ ಪ್ರಮಾಣಪತ್ರ ಮತ್ತು ದಾಖಲೆಗಳನ್ನು ಸೃಷ್ಟಿಸಿ ಕಾನೂನುಬದ್ಧವಾಗಿ ದತ್ತು ಪಡೆದಂತೆ ನಂಬಿಸಿ ಮಾರಾಟ ಮಾಡಲಾಗುತ್ತಿತ್ತು.

ಆಪರೇಷನ್ ಬೇಬಿ ಬಜಾರ್: ದಂಧೆ ಬಯಲಿಗೆ ಬಂದಿದ್ದು ಹೇಗೆ?

ಸೆಂಟ್ರಲ್ ದೆಹಲಿಯ ಪಹಾರ್‌ಗಂಜ್ ನಿವಾಸಿಯೊಬ್ಬರು ನೀಡಿದ ಸಣ್ಣ ಸುಳಿವು ಈ ಇಡೀ ಜಾಲವನ್ನು ಧ್ವಂಸಗೊಳಿಸಿದೆ. ಮಹಿಳೆಯೊಬ್ಬಳು (ಜ್ಯೋತಿ ಅಲಿಯಾಸ್ ಕಮಲೇಶ್) ಪ್ರತಿ ಬಾರಿಯೂ ಬೇರೆ ಬೇರೆ ಹಸುಗೂಸುಗಳೊಂದಿಗೆ ಆ ಪ್ರದೇಶದಲ್ಲಿ ಕಾಣಿಸಿಕೊಳ್ಳುತ್ತಿರುವುದನ್ನು ಗಮನಿಸಿದ ಸ್ಥಳೀಯರು ಪೊಲೀಸರಿಗೆ ಮಾಹಿತಿ ನೀಡಿದ್ದರು.

ಕೂಡಲೇ ಅಲರ್ಟ್ ಆದ ಪೊಲೀಸರು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿ ಜಾಲವನ್ನು ಪತ್ತೆಹಚ್ಚಿದರು. ನಂತರ ಮಹಿಳಾ ಪೊಲೀಸ್ ಅಧಿಕಾರಿಯೊಬ್ಬರು ಗ್ರಾಹಕರಂತೆ ನಟಿಸಿ (Decoy Operation), ಮಗುವನ್ನು ಖರೀದಿಸುವ ನೆಪದಲ್ಲಿ ಜ್ಯೋತಿಯನ್ನು ಸಂಪರ್ಕಿಸಿ 20,000 ರೂ. ಮುಂಗಡ ಹಣ ನೀಡಿ ಜೂನ್ 5 ರಂದು ಆಕೆಯನ್ನು ರೆಡ್‌ಹ್ಯಾಂಡೆಡ್ ಆಗಿ ಬಂಧಿಸಿದರು.

30ಕ್ಕೂ ಹೆಚ್ಚು ಮಕ್ಕಳ ಮಾರಾಟದ ಶಂಕೆ

ಬಂಧಿತರ ವಿಚಾರಣೆಯಿಂದ ಗುಜರಾತ್‌ನ ಸಬರಕಾಂಠ ಮೂಲದ ಪ್ರಮುಖ ಸರಬರಾಜುದಾರ ಸಬಾಭಾಯ್ ಘಾಮರ್ ಅಲಿಯಾಸ್ ಕಾಲಿಯಾ ಎಂಬಾತನ ಪತ್ತೆಯಾಗಿದೆ. ಈ ಗ್ಯಾಂಗ್ ಕಳೆದ ಒಂದು ವರ್ಷದಲ್ಲಿ ಹರಿಯಾಣ ಮತ್ತು ಮಧ್ಯಪ್ರದೇಶದ ದಂಪತಿಗಳಿಗೆ ಕನಿಷ್ಠ 30 ಹಸುಗೂಸುಗಳನ್ನು ಮಾರಾಟ ಮಾಡಿದೆ ಎಂದು ಡಿಸಿಪಿ ರೋಹಿತ್ ರಾಜ್‌ಬೀರ್ ಸಿಂಗ್ ತಿಳಿಸಿದ್ದಾರೆ. ಮಕ್ಕಳನ್ನು ಖರೀದಿಸಿದ ಪಾನಿಪತ್ ಮತ್ತು ಗ್ವಾಲಿಯರ್ ಮೂಲದ ದಂಪತಿಗಳನ್ನೂ ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಮಕ್ಕಳನ್ನು ಮಾರಾಟ ಮಾಡಿದ ಹೆತ್ತವರೂ ಸಹ ಇದರಲ್ಲಿ ಶಾಮೀಲಾಗಿದ್ದರೆ ಅವರ ವಿರುದ್ಧವೂ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಪೊಲೀಸರು ಎಚ್ಚರಿಸಿದ್ದಾರೆ.

ಪ್ರಸ್ತುತ ರಕ್ಷಿಸಲಾದ ಐದು ಹಸುಗೂಸುಗಳನ್ನು ಮಕ್ಕಳ ಕಲ್ಯಾಣ ಸಮಿತಿಯ (CWC) ‘ಪಾಲ್ನಾ’ ಕೇಂದ್ರಕ್ಕೆ ಒಪ್ಪಿಸಲಾಗಿದ್ದು, ಸುರಕ್ಷಿತವಾಗಿ ಆರೈಕೆ ಮಾಡಲಾಗುತ್ತಿದೆ.