ಕೇರಳ ಟಿವಿ ಆಂಕರ್ ಅಪರ್ಣಾ ಕುರುಪ್ ವಿರುದ್ಧ ಪೊಲೀಸ್ ಕೇಸ್: ಮುಸ್ಲಿಂ ಧರ್ಮಗುರುಗಳ ವಿವಾದಿತ ಹೇಳಿಕೆ ಚರ್ಚೆಯೇ ಮುಳುವಾಯ್ತು!

ಕೇರಳ: ಪ್ರಸಿದ್ಧ ಮುಸ್ಲಿಂ ಧರ್ಮಗುರು ಕಾಂತಪುರಂ ಎ.ಪಿ. ಅಬೂಬಕ್ಕರ್ ಮುಸ್ಲಿಯಾರ್ ಅವರು ಮಹಿಳೆಯರ ಸ್ವಾತಂತ್ರ್ಯ ಮತ್ತು ಸಾರ್ವಜನಿಕವಾಗಿ ಓಡಾಡುವ ಕುರಿತು ನೀಡಿದ್ದ ವಿವಾದಿತ ಹೇಳಿಕೆಯು ದೊಡ್ಡ ಕೋಲಾಹಲಕ್ಕೆ ಕಾರಣವಾಗಿತ್ತು. ಈ ಕುರಿತು ‘ಬಿಗ್ ಟಿವಿ’ ನ್ಯೂಸ್ ಚಾನೆಲ್‌ನಲ್ಲಿ ನಡೆದ ರಾಜಕೀಯ ಚರ್ಚೆಯ ಸಂದರ್ಭದಲ್ಲಿ, ಚಾನೆಲ್‌ನ ಹಿರಿಯ ಸಂಪಾದಕಿ ಹಾಗೂ ಸುದ್ದಿ ನಿರೂಪಕಿ ಅಪರ್ಣಾ ಕುರುಪ್ ಮಾಡಿದ ಆರಂಭಿಕ ಹೇಳಿಕೆಗಳು ತೀವ್ರ ವಿವಾದಕ್ಕೆ ಎಡೆಮಾಡಿಕೊಟ್ಟವು.

ಚರ್ಚೆಯ ವೇಳೆ ಅಪರ್ಣಾ ಕುರುಪ್ ಅವರು, ಕುರಾನ್ ಬೋಧನೆಗಳ ಅಡಿಯಲ್ಲಿ ಮಾದಕ ದ್ರವ್ಯ ಸೇವನೆ, ಅಪರಾಧಗಳು ಅಥವಾ ಲೈಂಗಿಕ ದುಷ್ಕೃತ್ಯಗಳು ಸಮ್ಮತ ಎಂಬಂತೆ ಕೆಲವು ವ್ಯಕ್ತಿಗಳು ವರ್ತಿಸುತ್ತಿದ್ದಾರೆ ಎಂಬರ್ಥದಲ್ಲಿ ಮಾತನಾಡಿದ್ದಾರೆ ಎಂದು ಆರೋಪಿಸಿ ಕಾಸರಗೋಡಿನ ಅಬ್ದುಲ್ ಹಕೀಮ್ ಎಂಬುವವರು ಪೊಲೀಸರಿಗೆ ದೂರು ನೀಡಿದ್ದರು. ಈ ದೂರಿನ ಆಧಾರದ ಮೇಲೆ ಕೊಚ್ಚಿ ಸೈಬರ್ ಕ್ರೈಮ್ ಪೊಲೀಸರು ಅಪರ್ಣಾ ಕುರುಪ್ ವಿರುದ್ಧ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತಂದಿರುವುದು, ಗಲಭೆಗೆ ಪ್ರಚೋದನೆ ನೀಡುವುದು ಮತ್ತು ಗುಂಪುಗಳ ನಡುವೆ ದ್ವೇಷ ಬಿತ್ತುವ ಬಿ.ಎನ್.ಎಸ್ ಸೆಕ್ಷನ್‌ಗಳ ಅಡಿಯಲ್ಲಿ ಎಫ್‌ಐಆರ್ ದಾಖಲಿಸಿದ್ದಾರೆ.

ಈ ವಿವಾದದ ಬೆನ್ನಲ್ಲೇ ತೀವ್ರ ಸೈಬರ್ ಬೆದರಿಕೆಗಳು ಹಾಗೂ ಟೀಕೆಗಳು ಎದುರಾದ ಕಾರಣ, ಅಪರ್ಣಾ ಕುರುಪ್ ಮತ್ತು ಚಾನೆಲ್ ಮ್ಯಾನೇಜ್‌ಮೆಂಟ್ ಸಾರ್ವಜನಿಕವಾಗಿ ಬೇಷರತ್ ಕ್ಷಮೆ ಯಾಚಿಸಿ, ವಿವಾದಿತ ವೀಡಿಯೊವನ್ನು ಸಾಮಾಜಿಕ ಜಾಲತಾಣಗಳಿಂದ ಡಿಲೀಟ್ ಮಾಡಿದ್ದವು. ಇದರೊಂದಿಗೆ, ತಮ್ಮ ವಿರುದ್ಧ ಆನ್‌ಲೈನ್‌ನಲ್ಲಿ ಬೆದರಿಕೆ ಹಾಕಿದವರ ವಿರುದ್ಧ ಅಪರ್ಣಾ ಕೂಡ ಪ್ರತ್ಯೇಕ ದೂರು ದಾಖಲಿಸಿದ್ದರು.

ಆದರೆ, ಈ ವಿವಾದ ರಾಜಕೀಯ ತಿರುವು ಪಡೆದುಕೊಂಡಿದ್ದು, ಪತ್ರಕರ್ತೆಯನ್ನು ಟೀಕಿಸಿದ್ದ ‘ವಿಸ್ಡಮ್ ಇಸ್ಲಾಮಿಕ್ ಆರ್ಗನೈಸೇಶನ್’ ಮುಖಂಡ ಅಬ್ದುಲ್ಲಾ ಬಾಸಿಲ್ ವಿರುದ್ಧ ದಾಖಲಾಗಿದ್ದ ಪೊಲೀಸರ ಕ್ರಮವನ್ನು ಸರ್ಕಾರದ ಸೂಚನೆ ಮೇರೆಗೆ ತಡೆಹಿಡಿಯಲಾಯಿತು. ಇದು ಕಾಂಗ್ರೆಸ್ ನೇತೃತ್ವದ ಯುಡಿಎಫ್  ಸರ್ಕಾರದ ವಿರುದ್ಧ ಬಿಜೆಪಿಯಿಂದ ತೀವ್ರ ವಾಗ್ದಾಳಿಗೆ ಕಾರಣವಾಗಿದ್ದು, ರಾಜ್ಯದಲ್ಲಿ ಧರ್ಮೀಯ ಮೂಲಭೂತವಾದಿಗಳ ಪ್ರಭಾವ ಹೆಚ್ಚಾಗಿದೆ ಎಂದು ಬಿಜೆಪಿ ನಾಯಕರು ಆರೋಪಿಸಿದ್ದಾರೆ.

ಮತ್ತೊಂದೆಡೆ, ಧರ್ಮಗುರು ಕಾಂತಪುರಂ ಅವರು ತಮ್ಮ ಅನುಯಾಯಿಗಳು ಯಾವುದೇ ಭಾವನಾತ್ಮಕ ಪ್ರಚೋದನೆಗೆ ಒಳಗಾಗದೆ ಸಂಯಮದಿಂದ ವರ್ತಿಸಬೇಕು ಎಂದು ಮನವಿ ಮಾಡಿದ್ದಾರೆ.