ಆಪಲ್ ಐಫೋನ್ ಡಿಯೋ ಬಳಕೆದಾರರಿಗೆ ಶಾಕ್: ಆಪಲ್ ಮೊದಲ ಫೋಲ್ಡಬಲ್ ಐಫೋನ್ ಡಿಯೋ ಡಿಸ್‌ಪ್ಲೇ ವೈಫಲ್ಯ, ತಾಂತ್ರಿಕ ದೋಷಕ್ಕೆ ಅಚ್ಚರಿ ಕಾರಣ ಬಹಿರಂಗ!

ಹೊಸ ದೆಹಲಿ: ಮಾರುಕಟ್ಟೆಗೆ ಭಾರಿ ನಿರೀಕ್ಷೆಯೊಂದಿಗೆ ಬಿಡುಗಡೆಯಾಗಿರುವ ಆಪಲ್‌ನ ಮೊಟ್ಟಮೊದಲ ಫೋಲ್ಡಬಲ್ ಸ್ಮಾರ್ಟ್‌ಫೋನ್ ‘ಐಫೋನ್ ಡಿಯೋ’ ಈಗ ಡಿಸ್‌ಪ್ಲೇ ಸಮಸ್ಯೆಗಳಿಂದಾಗಿ ಸುದ್ದಿಯಲ್ಲಿದೆ.

ಫೋನ್ ಖರೀದಿಸಿದ ಕೆಲವೇ ಗಂಟೆಗಳಲ್ಲಿ ಅಥವಾ ಬೆರಳೆಣಿಕೆಯಷ್ಟು ಬಾರಿ ಮಡಚಿದ ತಕ್ಷಣವೇ ಇನ್ನರ್ ಡಿಸ್‌ಪ್ಲೇ ಹಾಳಾಗುತ್ತಿರುವುದಾಗಿ ಗ್ರಾಹಕರಿಂದ ದೂರುಗಳು ಕೇಳಿಬಂದಿದ್ದು, ಪ್ರಸಿದ್ಧ ಟಿಯರ್‌ಡೌನ್ ವೆಬ್‌ಸೈಟ್ ‘iFixit’ ಈ ತಾಂತ್ರಿಕ ದೋಷಕ್ಕೆ ಸಂಭಾವ್ಯ ಕಾರಣಗಳನ್ನು ಪತ್ತೆಹಚ್ಚಿದೆ.

ಐಫೋನ್ ಡಿಯೋ ಫೋನ್ ಮಡಚುವಾಗ ಅಥವಾ ತೆರೆಯುವಾಗ ಬಳಕೆದಾರರು ಕರ್ಂಚ್ ಅಥವಾ ಪಾಪ್ ಶಬ್ದ ಕೇಳಿಸುತ್ತಿದೆ ಎಂದು ದೂರಿದ್ದಾರೆ. ಇದರ ಬೆನ್ನಲ್ಲೇ ಸ್ಕ್ರೀನ್ ಮೇಲೆ ಬಿರುಕುಗಳು ಅಥವಾ ಪ್ರಕಾಶಮಾನವಾದ ಬಿಳಿ ಗೆರೆಗಳು ಮೂಡುತ್ತಿವೆ. iFixit ತಂಡವು ಈ ಹಿನ್ನೆಲೆಯಲ್ಲಿ 3D ಹಿಂಜ್ ಮಾದರಿ (3D hinge model) ಹಾಗೂ ಸಿಟಿ ಸ್ಕಾನ್‌ಗಳನ್ನು ನಡೆಸಿ ವಿಶ್ಲೇಷಣೆ ನಡೆಸಿದ್ದು, ಫೋನ್‌ನ ಎರಡು ಭಾಗಗಳನ್ನು ಸಂಪರ್ಕಿಸುವ ಕೇಬಲ್ ಓಪನಿಂಗ್ ಹಾಗೂ ಸೆಂಟ್ರಲ್ ಹಿಂಜ್ ಸಪೋರ್ಟ್ ನಡುವಿನ ಭಾಗದಲ್ಲಿ ಈ ಸಮಸ್ಯೆ ಉಂಟಾಗುತ್ತಿರುವುದಾಗಿ ತಿಳಿಸಿದೆ.

ಹಿಂಜ್ ವಿನ್ಯಾಸದಲ್ಲಿ ದೋಷ: ಫೋನ್ ಮುಚ್ಚುವಾಗ ಸೆಂಟ್ರಲ್ ಸಪೋರ್ಟ್ ಬಾರ್ ಸಂಪೂರ್ಣವಾಗಿ ಒಳಗೆ ಸರಿಯದಿರುವುದು, ಡಿಸ್‌ಪ್ಲೇಯ ಬಾಗಿದ ಭಾಗದ ಮೇಲೆ ಅಧಿಕ ಒತ್ತಡ ಬೀಳಲು ಕಾರಣವಾಗಬಹುದು ಎಂದು ವರದಿ ತಿಳಿಸಿದೆ.

ಆಪಲ್‌ನಿಂದ ಉಚಿತ ಬದಲಾವಣೆ: ಈ ಸಮಸ್ಯೆಯನ್ನು ಎದುರಿಸುತ್ತಿರುವ ಗ್ರಾಹಕರಿಗೆ ಆಪಲ್ ಕಂಪನಿಯು ಉಚಿತವಾಗಿ ಫೋನ್ ಬದಲಿ ಘಟಕಗಳನ್ನು (replacement units) ಒದಗಿಸುತ್ತಿದೆ. ಆದರೆ ವಾರಂಟಿ ಮುಗಿದ ಬಳಿಕ ಡಿಸ್‌ಪ್ಲೇ ರಿಪೇರಿಗೆ ಬವಿ ಭಾರೀ ಮೊತ್ತ ತೆರಬೇಕಾಗುತ್ತದೆ.

ರಿಪೇರಿ ಸ್ಕೋರ್ ಮತ್ತು ಬಾಳಿಕೆ: ಐಫೋನ್ ಡಿಯೋ ಫೋನ್ ಧೂಳು ನಿರೋಧಕ IP68 ರೇಟಿಂಗ್ ಹೊಂದಿದ್ದು, ಇತರ ಫೋಲ್ಡಬಲ್ ಫೋನ್‌ಗಳಿಗೆ ಹೋಲಿಸಿದರೆ ಉತ್ತಮ ರಿಪೇರಿ ಸಾಮರ್ಥ್ಯವನ್ನು (5/10 ಸ್ಕೋರ್) ಹೊಂದಿದೆ.

ಭಾರತದಲ್ಲಿ ಗಗನಕ್ಕೇರಿದ ಬೆಲೆ: ಭಾರತದಲ್ಲಿ ಐಫೋನ್ ಡಿಯೋ ಆರಂಭಿಕ ಬೆಲೆ 2,99,900 ರೂಪಾಯಿಗಳಷ್ಟಿದ್ದು, 2TB ಮಾದರಿಯು 4,49,900 ರೂಪಾಯಿಗಳವರೆಗೆ ಇದೆ. ಮಾರುಕಟ್ಟೆಯಲ್ಲಿ ಬೇಡಿಕೆ ಹೆಚ್ಚಿರುವ ಕಾರಣ ಸಪ್ಲೈ ಕ್ರಂಚ್ ಉಂಟಾಗಿದೆ.

ಈ ದೋಷವು ಆಪಲ್‌ನ ಮೊದಲ ಫೋಲ್ಡಬಲ್ ಪ್ರಯೋಗದ ಯಶಸ್ಸಿನ ಮೇಲೆ ಸಣ್ಣದೊಂದು ಪ್ರಶ್ನಾರ್ಥಕ ಚಿಹ್ನೆಯನ್ನು ಮೂಡಿಸಿದೆ.