ಸೀತಾ ಪಾತ್ರಧಾರಿ ಸಾಯಿ ಪಲ್ಲವಿ ಹೇಳಿಕೆಯಿಂದ ವೈರಲ್ ಆದ ರಾವಣನ ಚರ್ಚೆ: ವಿವಿಧ ಸಂಸ್ಕೃತಿಗಳಲ್ಲಿ ರಾವಣನಿಗೆ ಸಿಕ್ಕ ಸ್ಥಾನಮಾನವೇನು?

ಬೆಂಗಳೂರು: ರಾಮಾಯಣ ಮಹಾಕಾವ್ಯದಲ್ಲಿ ಬರುವ ಲಂಕಾಧಿಪತಿ ರಾವಣನ ಪಾತ್ರದ ಕುರಿತು ನಟಿ ಸಾಯಿ ಪಲ್ಲವಿ ನೀಡಿರುವ “ರಾವಣ ಸಂಪೂರ್ಣ ಕೆಟ್ಟವನಲ್ಲ” ಎಂಬ ಹೇಳಿಕೆ ಇದೀಗ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.

ಅಮೆರಿಕದ ಲಾಸ್ ಏಂಜಲೀಸ್‌ನಲ್ಲಿ ನಡೆದ ‘ರಾಮಾಯಣ: ರೈಸ್ ಆಫ್ ಎ ಲೆಜೆಂಡ್’ ಚಿತ್ರದ ಜಾಗತಿಕ ಪ್ರೀಮಿಯರ್‌ನಲ್ಲಿ ಸೀತಾ ಪಾತ್ರಧಾರಿ ಸಾಯಿ ಪಲ್ಲವಿ, ರಾವಣನ ಉದಾಹರಣೆ ನೀಡಿ ಮನುಷ್ಯನ ಒಳಗೆ ಇರುವ ಒಳ್ಳೆಯದು ಮತ್ತು ಕೆಟ್ಟದ್ದನ್ನು ವಿಶ್ಲೇಷಿಸಿಕೊಳ್ಳಬೇಕು ಎಂದು ಅಭಿಪ್ರಾಯಪಟ್ಟಿದ್ದರು.

ಭಾರತ ಹಾಗೂ ಶ್ರೀಲಂಕಾದ ವಿವಿಧ ಸಮುದಾಯಗಳಲ್ಲಿ ರಾವಣನನ್ನು ಕೇವಲ ಖಳನಾಯಕನಾಗಿ ಮಾತ್ರವಲ್ಲದೆ, ವಿದ್ವಾಂಸ, ಶಿವಭಕ್ತ ಹಾಗೂ ಆಡಳಿತಗಾರನಾಗಿಯೂ ಸ್ಮರಿಸಲಾಗುತ್ತದೆ.

ಮಹಾಕಾವ್ಯದ ಜನಪ್ರಿಯ ಕಥೆಯ ಪ್ರಕಾರ ರಾವಣನು ಸೀತೆಯನ್ನು ಅಪಹರಿಸುವ ದುಷ್ಟ ರಾಕ್ಷಸ ರಾಜನಾಗಿದ್ದರೂ, ಆತನ ಪಾತ್ರಕ್ಕೆ ಸಾಹಿತ್ಯಿಕ, ಪ್ರಾದೇಶಿಕ ಹಾಗೂ ಧರ್ಮ ಗ್ರಂಥಗಳಲ್ಲಿ ಹಲವು ಆಯಾಮಗಳಿವೆ. ಸಂಶೋಧನಾ ಅಧ್ಯಯನಗಳ ಪ್ರಕಾರ ರಾವಣನು ವೇದಗಳಲ್ಲಿ ಪ್ರವೀಣನಾದ ಬ್ರಾಹ್ಮಣನಾಗಿದ್ದು, ಶಿವನ ಪರಮ ಭಕ್ತನಾಗಿ ಅಪಾರ ಬಲ ಮತ್ತು ವಿದ್ವತ್ ಪಡೆದಿದ್ದನು.

ಗ್ರಾಮವೊಂದರಲ್ಲಿ ರಾವಣನ ಪೂಜೆ: ಉತ್ತರ ಪ್ರದೇಶದ ಗ್ರೇಟರ್ ನೋಯ್ಡಾ ಬಳಿಯ ಬಿಸ್ರಾಖ್ ಗ್ರಾಮದಲ್ಲಿ ರಾವಣನ ಹುಟ್ಟೂರಾಗಿದೆ ಎಂದು ನಂಬಲಾಗಿದ್ದು, ಇಲ್ಲಿ ರಾವಣನ ಸಾವನ್ನು ದಸರಾದಲ್ಲಿ ದಹಿಸುವ ಬದಲು ಶಿವನ ಪರಮ ಭಕ್ತನೆಂದು ಸ್ಮರಿಸಲಾಗುತ್ತದೆ.

ಶ್ರೀಲಂಕಾದಲ್ಲಿ ಆರಾಧನೆ: ಶ್ರೀಲಂಕಾದಲ್ಲಿ ಸಿಂಹಳೀಯ ಬೌದ್ಧ ಸಮುದಾಯದ ಕೆಲವರು ರಾವಣನನ್ನು ಯೋಧ ರಾಜನಾಗಿ ಹಾಗೂ ವೈದ್ಯರಾಗಿ (ಹೀಲರ್) ಪೂಜಿಸುತ್ತಾರೆ. ಅಲ್ಲಿ ರಾವಣನ ಹೆಸರಿನಲ್ಲಿ ವಾರ್ಷಿಕ ಆಚರಣೆಗಳು ನಡೆಯುತ್ತವೆ.

ಹತ್ತು ತಲೆಗಳ ಸಾಂಕೇತಿಕ ಅರ್ಥ: ರಾವಣನ ಹತ್ತು ತಲೆಗಳು ಆತನ ಹತ್ತು ವಿಭಿನ್ನ ಕೌಶಲಗಳಾದ (ಭಾಷೆಗಳು, ಕಾನೂನು, ತತ್ವಶಾಸ್ತ್ರ, ಆಡಳಿತ, ತಾಂತ್ರಿಕ ಜ್ಞಾನ, ಆಧ್ಯಾತ್ಮಿಕ ಬುದ್ಧಿವಂತಿಕೆ, ಜ್ಯೋತಿಷ್ಯ, ವೈದ್ಯಕೀಯ, ಯುದ್ಧ ಮತ್ತು ಸೌಂದರ್ಯಶಾಸ್ತ್ರ) ಸಂಕೇತ ಎಂದು ಕೆಲ ಸಮುದಾಯಗಳು ನಂಬುತ್ತವೆ.

ವಿವಿಧ ಮರುಕಥನಗಳು: ರಾಮಾಯಣದ ನೂರಾರು ಆವೃತ್ತಿಗಳು ಕಾಲಕಾಲಕ್ಕೆ ಬಂದಿದ್ದು, ದ್ರಾವಿಡ ಚಳವಳಿಯ ಮುಖಂಡ ಇ.ವಿ. ರಾಮಸ್ವಾಮಿ (ಪೆರಿಯಾರ್) ಸೇರಿದಂತೆ ಹಲವರು ರಾವಣನ ಪಾತ್ರವನ್ನು ತಮ್ಮದೇ ಸಾಮಾಜಿಕ ಹಿನ್ನೆಲೆಯಲ್ಲಿ ವಿಶ್ಲೇಷಿಸಿದ್ದಾರೆ.