ಮೈಕ್ರೋಸಾಫ್ಟ್‌ನಲ್ಲಿ ಆಘಾತಕಾರಿ ಬೆಳವಣಿಗೆ: ಕಂಪನಿಗೆ ಸೇರಿ ಕೇವಲ 3 ತಿಂಗಳಾದ ಭಾರತೀಯ ಟೆಕ್ಕಿಗೆ ‘ಸ್ವಯಂಪ್ರೇರಿತ ನಿರ್ಗಮನ’ ಮೇಲ್!

ನವದೆಹಲಿ: ಜಾಗತಿಕ ತಂತ್ರಜ್ಞಾನ ದೈತ್ಯ ಮೈಕ್ರೋಸಾಫ್ಟ್ ಕಂಪನಿಯು ಭಾರತ ಸೇರಿದಂತೆ ನಾಲ್ಕು ದೇಶಗಳಲ್ಲಿ ಸ್ವಯಂಪ್ರೇರಿತ ನಿರ್ಗಮನದ ಆಫರ್ ಅನ್ನು ಪ್ರಕಟಿಸಿದ್ದು, ಇದು ಟೆಕ್ ಲೋಕದಲ್ಲಿ ತೀವ್ರ ಆತಂಕಕ್ಕೆ ಕಾರಣವಾಗಿದೆ. ಸುಮಾರು 60,000 ಮಂದಿಗೆ ಈ ಅವಕಾಶ ನೀಡಲಾಗಿದ್ದು, ಮೈಕ್ರೋಸಾಫ್ಟ್ ಸೇರಿ ಕೇವಲ 3 ತಿಂಗಳು ಕಳೆದ ಭಾರತೀಯ ಸಾಫ್ಟ್‌ವೇರ್ ಡೆವಲಪರ್ ಒಬ್ಬರಿಗೆ ಈ ಮೇಲ್ ಬಂದಿರುವುದು ಭಾರೀ ಚರ್ಚೆಗೆ ಗ್ರಾಸವಾಗಿದೆ.

ರೆಡ್ಡಿಟ್ (Reddit) ವೇದಿಕೆಯಲ್ಲಿ ತಮ್ಮ ಆತಂಕ ಹಂಚಿಕೊಂಡಿರುವ ಟೆಕ್ಕಿ, ಹೊಸದಾಗಿ ಸೇರಿರುವ ಕಾರಣ ಕೋಡ್‌ಬೇಸ್ ಬಗ್ಗೆಯೂ ಸರಿಯಾಗಿ ತಿಳಿಯದ ತಮಗೆ ಈ ಆಫರ್ ಬಂದಿರುವುದು, ಒಂದು ವೇಳೆ ಒಪ್ಪಿಕೊಳ್ಳದಿದ್ದರೆ ಕಂಪನಿಯಿಂದ ಬಲವಂತವಾಗಿ ವಜಾಗೊಳಿಸಬಹುದು ಎಂಬ ಭೀತಿಯನ್ನು ಹುಟ್ಟುಹಾಕಿದೆ ಎಂದು ತಿಳಿಸಿದ್ದಾರೆ. ಡಿಸೆಂಬರ್ 1 ರೊಳಗೆ ನಿರ್ಧಾರ ಕೈಗೊಳ್ಳುವಂತೆ ಗಡುವು ನೀಡಲಾಗಿದ್ದು, ಯಾವುದೇ ಬ್ಯಾಕ್‌ಅಪ್ ಇಲ್ಲದೆ ಇಷ್ಟು ಬೇಗ ಇಂತಹ ಪರಿಸ್ಥಿತಿ ಎದುರಾಗಿರುವುದಕ್ಕೆ ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.

ಸ್ವಯಂಪ್ರೇರಿತ ನಿರ್ಗಮನ ಆಫರ್: ಮೈಕ್ರೋಸಾಫ್ಟ್ ಕೋಪೈಲಟ್, ಫೈನಾನ್ಸ್, ಹೆಚ್‌ಆರ್, ಎಕ್ಸ್‌ಬಾಕ್ಸ್ ಹಾಗೂ ವಿಂಡೋಸ್ ವಿಭಾಗಗಳಲ್ಲಿ ಸುಮಾರು 60,000 ಉದ್ಯೋಗಿಗಳಿಗೆ ಸ್ವಯಂಪ್ರೇರಿತ ನಿವೃತ್ತಿ/ನಿರ್ಗಮನದ ಆಫರ್ ನೀಡಿದೆ.

ಹೊಸ ಉದ್ಯೋಗಿಗೆ ಆಘಾತ: ಕಂಪನಿ ಸೇರಿ ಕೇವಲ 3 ತಿಂಗಳಷ್ಟೇ ಕಳೆದಿದ್ದರೂ, ತಮಗೆ ಈ ಮೇಲ್ ಬಂದಿರುವುದು ನೇರ ವಜಾದ ಎಚ್ಚರಿಕೆಯಂತೆ ಭಾಸವಾಗುತ್ತಿದೆ ಎಂದು ಟೆಕ್ಕಿ ಅಳಲು ತೋಡಿಕೊಂಡಿದ್ದಾರೆ.

ಪ್ರಮುಖ ದಿನಾಂಕಗಳು: ಉದ್ಯೋಗಿಗಳು ತಮ್ಮ ನಿರ್ಧಾರವನ್ನು ತಿಳಿಸಲು ಡಿಸೆಂಬರ್ 1, 2026 ಕೊನೆಯ ದಿನವಾಗಿದ್ದು, ಡಿಸೆಂಬರ್ 31 ರೊಳಗೆ ಕಂಪನಿಯಿಂದ ಹೊರನಡೆಯಬೇಕಾಗುತ್ತದೆ.

ನೆಟಿಗರ ಪ್ರತಿಕ್ರಿಯೆ: ಮೈಕ್ರೋಸಾಫ್ಟ್‌ನಂತಹ ದೊಡ್ಡ ಕಂಪನಿಯ ಹೆಸರು ರೆಸ್ಯೂಮಿಯಲ್ಲಿದ್ದರೆ ಸುಲಭವಾಗಿ ಬೇರೆ ಉದ್ಯೋಗ ಸಿಗಲಿದೆ ಎಂದು ಹಲವು ರೆಡ್ಡಿಟ್ ಬಳಕೆದಾರರು ಧೈರ್ಯ ತುಂಬಿದ್ದಾರೆ.