ಪ್ರೇಮಿಯೊಂದಿಗೆ ವಾಸಿಸಲು ಅಡ್ಡಿಯಾಗಿದ್ದ 13 ವರ್ಷದ ಅವಳಿ ಮಕ್ಕಳ ಕೊಲೆಗೈದ ತಾಯಿ ಹಾಗೂ ಪ್ರೇಮಿ ಬಂಧನ!

ಭಾರತಪುರ/ದೀಗ್:ರಾಜಸ್ಥಾನದ ದೀಗ್  ಜಿಲ್ಲೆಯಲ್ಲಿ ನಡೆದ ಅತ್ಯಂತ ಭೀಕರ ಹಾಗೂ ಹೃದಯ ವಿದ್ರಾವಕ ಘಟನೆಯೊಂದರಲ್ಲಿ, ತನ್ನ ಪ್ರೇಮಿಯ ಮಾತಿಗಾಗಿ 13 ವರ್ಷದ ಸ್ವಂತ ಅವಳಿ ಮಕ್ಕಳನ್ನು ಕೊಲೆ ಮಾಡಿದ್ದ ತಾಯಿಯನ್ನು ಪೊಲೀಸರು ಕೇವಲ 6 ಗಂಟೆಗಳ ಒಳಗೆ ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ದಸರಾ ಹಬ್ಬದ ದಿನದಂದೇ ಈ ಕೃತ್ಯ ಬೆಳಕಿಗೆ ಬಂದಿದ್ದು, ಇಡೀ ಪ್ರದೇಶದಲ್ಲಿ ಆಘಾತ ಮೂಡಿಸಿದೆ.

ಮಕ್ಕಳೇ ಅಡ್ಡಿಯಾಗಿದ್ದಾರೆಂಬ ಕಾರಣಕ್ಕೆ ಕೃತ್ಯ:

ಮಕ್ಕಳು ತಮ್ಮ ಪ್ರೇಮ ಸಂಬಂಧಕ್ಕೆ ದೊಡ್ಡ ಅಡ್ಡಿಯಾಗಿದ್ದಾರೆ ಎಂದು ಭಾವಿಸಿದ ತಾಯಿ, ತನ್ನ ಮತ್ತೊಬ್ಬ ಮಗ ಹಾಗೂ ಪ್ರೇಮಿಯ ಸಹಾಯದಿಂದ ಮಕ್ಕಳನ್ನು ಕೊಲೆ ಮಾಡಲು ಸಂಚು ಹೂಡಿದ್ದಾಳೆ. ಮನೆಯೊಳಗೆಯೇ ಮಕ್ಕಳ ಗಂಟಲು ಸೀಳಿ, ನಂತರ ಶವಗಳನ್ನು ಹತ್ತಿರದ ಜಮೀನು ಹಾಗೂ ಪ್ಲಾಟ್‌ಗೆ ಎಸೆದಿದ್ದರು.

ಆರು ಗಂಟೆಗಳಲ್ಲಿ ಭೇದಿಸಿದ ಪೊಲೀಸರು:

ಮಕ್ಕಳು ಕಾಣೆಯಾಗಿ ಶವಗಳು ಪತ್ತೆಯಾಗುತ್ತಿದ್ದಂತೆ ಎಚ್ಚೆತ್ತ ಪೊಲೀಸರು, ದೀಗ್ ಪೊಲೀಸ್ ವರಿಷ್ಠಾಧಿಕಾರಿ  ಕಾಂಬಳೆ ಶಾನ್ ಗೋಪಿನಾಥ್ ನೇತೃತ್ವದಲ್ಲಿ ಶ್ವಾನದಳ ಹಾಗೂ ವಿಧಿವಿಜ್ಞಾನ ಪ್ರಯೋಗಾಲಯ ತಂಡವನ್ನು ಕಳುಹಿಸಿ ತೀವ್ರ ತನಿಖೆ ನಡೆಸಿದರು. ಕೇವಲ ಆರು ಗಂಟೆಗಳ ಕಾರ್ಯಾಚರಣೆಯಲ್ಲಿ ತಾಯಿ ಹಾಗೂ ಈ ಕೃತ್ಯದಲ್ಲಿ ಭಾಗಿಯಾಗಿದ್ದ ಇತರರನ್ನು ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ಮುಂದುವರೆಸಿದ್ದಾರೆ.