ಜಿಮ್‌ನಲ್ಲಿ ಮಹಿಳೆಯರು, ಯುವತಿಯರ ರಹಸ್ಯ ವಿಡಿಯೋ ಮಾಡಿ ಬ್ಲ್ಯಾಕ್‌ಮೇಲ್: ಮ್ಯಾನೇಜರ್ ಅಮೀನ್ ಮುಲ್ತಾನಿ ಬಂಧನ, ಜಿಮ್‌ಗಳು ಸೀಲ್‌!

ಸುರೇಂದ್ರನಗರ:ಜಿಮ್‌ಗೆ ಆಗಮಿಸುತ್ತಿದ್ದ ಯುವತಿಯರು ಹಾಗೂ ಮಹಿಳೆಯರ ಖಾಸಗಿ ಫೋಟೋ ಮತ್ತು ವಿಡಿಯೋಗಳನ್ನು ಇಟ್ಟುಕೊಂಡು ಬ್ಲ್ಯಾಕ್‌ಮೇಲ್ ಮಾಡುತ್ತಿದ್ದ ಆರೋಪದ ಮೇಲೆ ಸುರೇಂದ್ರನಗರದ ‘ಕ್ಲಬ್ 71’ ಜಿಮ್‌ನ ಮ್ಯಾನೇಜರ್ ಅಮೀನ್ ಮುಲ್ತಾನಿ ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ. ಪ್ರಕರಣದ ತನಿಖೆ ತೀವ್ರಗೊಳಿಸಿರುವ ಪೊಲೀಸರು ಜಿಮ್‌ನ ಮತ್ತೊಬ್ಬ ಸಿಬ್ಬಂದಿ ಸೇರಿದಂತೆ ಒಟ್ಟು ನಾಲ್ವರನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸುತ್ತಿದ್ದಾರೆ.

ಘಟನೆಯ ವಿವರ ಹಾಗೂ ಪೊಲೀಸ್ ದಾಳಿ:

ಸುರೇಂದ್ರನಗರದ ದುಧ್ರೇಜ್ ರಸ್ತೆ ಮತ್ತು 80 ಫೀಟ್ ರಸ್ತೆಯಲ್ಲಿ ಕಾರ್ಯಾಚರಿಸುತ್ತಿದ್ದ ‘ಕ್ಲಬ್ 71’ ಜಿಮ್‌ನಲ್ಲಿ ಅಕ್ರಮ ಚಟುವಟಿಕೆಗಳು ನಡೆಯುತ್ತಿವೆ ಎಂದು ಬಾಧಿತ ಮಹಿಳೆಯೊಬ್ಬರು ಹಿರಿಯ ಪೊಲೀಸ್ ಅಧಿಕಾರಿಗೆ ದೂರು ನೀಡಿದ್ದರು. ಜಿಮ್‌ಗೆ ಬರುವ ಯುವತಿಯರೊಂದಿಗೆ ಆತ್ಮೀಯತೆ ಬೆಳೆಸಿಕೊಂಡು, ಅವರ ಖಾಸಗಿ ಕ್ಷಣಗಳನ್ನು ರಹಸ್ಯವಾಗಿ ಚಿತ್ರೀಕರಿಸಿ ಬ್ಲ್ಯಾಕ್‌ಮೇಲ್ ಮಾಡಲಾಗುತ್ತಿದೆ ಎಂದು ದೂರಿನಲ್ಲಿ ಆರೋಪಿಸಲಾಗಿತ್ತು.

ದೂರು ಸ್ವೀಕರಿಸಿದ ಪೊಲೀಸರು ಸಾರ್ವಜನಿಕರಂತೆ ಜಿಮ್‌ಗೆ ತೆರಳಿ ತಡರಾತ್ರಿ ದಿಢೀರ್ ದಾಳಿ ನಡೆಸಿದ್ದಾರೆ. ಕಾರ್ಯಾಚರಣೆಯ ವೇಳೆ 5 ಮೊಬೈಲ್ ಫೋನ್‌ಗಳು, 4 ಪೆನ್ ಡ್ರೈವ್‌ಗಳು, ವಾಟ್ಸಾಪ್ ಚಾಟ್‌ಗಳು, ಸಿಸಿಟಿವಿ ಫೂಟೇಜ್ ಹಾಗೂ ಖಾಲಿ ಚೆಕ್‌ಗಳು ಮತ್ತು ಲೆಕ್ಕದ ಡೈರಿಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಡಿಜಿಟಲ್ ಸಾಕ್ಷ್ಯ ಹಾಗೂ ಕಾನೂನುಬಾಹಿರ ಚಟುವಟಿಕೆ:

ವಶಪಡಿಸಿಕೊಂಡ ಪೆನ್ ಡ್ರೈವ್‌ನಲ್ಲಿ ಯುವತಿಯರ ಆಕ್ಷೇಪಾರ್ಹ ಹಾಗೂ ಖಾಸಗಿ ಫೋಟೋಗಳು ಮತ್ತು ವಿಡಿಯೋಗಳು ಪತ್ತೆಯಾಗಿವೆ. ಇವು ನೈಜ ವಿಡಿಯೋಗಳೇ ಅಥವಾ ಕೃತಕ ಬುದ್ಧಿಮತ್ತೆ ಬಳಸಿ ಸೃಷ್ಟಿಸಲಾದ ನಕಲಿ ವಿಡಿಯೋಗಳೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ರವಾನಿಸಲಾಗಿದೆ. ಜೊತೆಗೆ, ಖಾಲಿ ಚೆಕ್‌ಗಳು ಮತ್ತು ಲೆಕ್ಕದ ಡೈರಿ ಪತ್ತೆಯಾಗಿರುವುದರಿಂದ ಆರೋಪಿಯು ಜಿಮ್‌ನ ಮರೆಯಲ್ಲಿ ಅಕ್ರಮ ಮೀಟರ್ ಬಡ್ಡಿ ದಂಧೆಯನ್ನೂ ನಡೆಸುತ್ತಿದ್ದನೇ ಎಂಬ ಶಂಕೆ ವ್ಯಕ್ತವಾಗಿದೆ.

ಆದಾಗ್ಯೂ, ಶೋಧ ಕಾರ್ಯದ ವೇಳೆ ಜಿಮ್ ಅಥವಾ ಚೇಂಜಿಂಗ್ ರೂಮ್‌ನಲ್ಲಿ ಯಾವುದೇ ಹಿಡನ್ ಕ್ಯಾಮೆರಾಗಳು ನೇರವಾಗಿ ಪತ್ತೆಯಾಗಿಲ್ಲ ಎಂದು ಪೊಲೀಸರು ಸ್ಪಷ್ಟಪಡಿಸಿದ್ದಾರೆ.

ಜಿಮ್‌ಗಳು ಸೀಲ್‌, ವಿದ್ಯುತ್ ಸಂಪರ್ಕ ರದ್ದು:

ತನಿಖೆಯ ವೇಳೆ ‘ಕ್ಲಬ್ 71’ ಜಿಮ್‌ನ ಎರಡೂ ಶಾಖೆಗಳು ಯಾವುದೇ ಅಧಿಕೃತ ಪರವಾನಗಿ (Licence) ಇಲ್ಲದೆ ಅಕ್ರಮವಾಗಿ ನಡೆಯುತ್ತಿರುವುದು ಬೆಳಕಿಗೆ ಬಂದಿದೆ. ಈ ಹಿನ್ನೆಲೆಯಲ್ಲಿ ಸ್ಥಳೀಯ ನಗರಸಭೆ ಅಧಿಕಾರಿಗಳು ಎರಡೂ ಜಿಮ್‌ಗಳನ್ನು ಸೀಲ್ ಮಾಡಿದ್ದು, ವಿದ್ಯುತ್ ಇಲಾಖೆ (PGVCL) ಜಿಮ್‌ನ ವಿದ್ಯುತ್ ಸಂಪರ್ಕವನ್ನು ಸಂಪೂರ್ಣವಾಗಿ ಕಡಿತಗೊಳಿಸಿದೆ. ಆರೋಪಿಯ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆಯ (BNS) ವಿವಿಧ ತೀವ್ರ ಸ್ವರೂಪದ ಸೆಕ್ಷನ್‌ಗಳಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.