ಆಧಾರ್ ಸಿಸ್ಟಂಗೆ ಸವಾಲಾದ ರಾಮ್‌ಪುರದ ಅವಳಿ ತಂಗಿಯರು: 4 ತಿಂಗಳ ನಂತರ ಬಗೆಹರಿದಿದ್ದೇಗೆ? ಬಯೋಮೆಟ್ರಿಕ್ ರಹಸ್ಯವಿದು!

ರಾಮ್‌ಪುರ : ಬಯೋಮೆಟ್ರಿಕ್ ತಂತ್ರಜ್ಞಾನ ವ್ಯವಸ್ಥೆಯನ್ನು ಅಬ್ಬೇಪಾರಿಯಾಗಿಸಿದ ಅಪರೂಪದ ಘಟನೆಯೊಂದು ಉತ್ತರ ಪ್ರದೇಶದ ರಾಮ್‌ಪುರದಲ್ಲಿ ಬೆಳಕಿಗೆ ಬಂದಿದೆ. 10ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿರುವ ಖಿಜ್ರಾ ಜುಬೇರ್ ಮತ್ತು ತುಬಾ ಜುಬೇರ್ ಎಂಬ ಅವಳಿ ಸಹೋದರಿಯರಿಗೆ ಆಧಾರ್ ಬಯೋಮೆಟ್ರಿಕ್ ವಿವರಗಳನ್ನು ಅಪ್‌ಡೇಟ್ ಮಾಡಲು ಹೊರಟಾಗ ತಾಂತ್ರಿಕ ಅಡಚಣೆ ಎದುರಾಗಿತ್ತು.

ಘಟನೆಯ ಸಂಪೂರ್ಣ ವಿವರ:

ಖಿಜ್ರಾ ಮತ್ತು ತುಬಾ ಇಬ್ಬರೂ ನೋಡಲು ಒಂದೇ ರೀತಿ ಕಾಣುವ ಸಮರೂಪಿ  ಅವಳಿ ಸಹೋದರಿಯರು. 10ನೇ ತರಗತಿಯ ಬೋರ್ಡ್ ಪರೀಕ್ಷೆಯ ನೋಂದಣಿಗೆ  ಆಧಾರ್ ಕಾರ್ಡ್ ಅಪ್‌ಡೇಟ್ ಕಡ್ಡಾಯವಾಗಿದ್ದರಿಂದ, ಕುಟುಂಬಸ್ಥರು ಇಬ್ಬರ ಬಯೋಮೆಟ್ರಿಕ್ ವಿವರಗಳನ್ನು ಅಪ್‌ಡೇಟ್ ಮಾಡಲು ಆಧಾರ್ ಕೇಂದ್ರಕ್ಕೆ ತೆರಳಿದ್ದರು.

ಮೊದಲ ಸಹೋದರಿಯ ಬೆರಳಚ್ಚು ಮತ್ತು ಐರಿಸ್ (ಕಣ್ಣಿನ ಪಾಪೆ) ಸ್ಕ್ಯಾನ್ ಮಾಡಿ ಸಿಸ್ಟಮ್ ಯಶಸ್ವಿಯಾಗಿ ನೋಂದಾಯಿಸಿಕೊಂಡಿತು. ಆದರೆ, ಎರಡನೇ ಸಹೋದರಿಯ ಬಯೋಮೆಟ್ರಿಕ್ ವಿವರಗಳನ್ನು ದಾಖಲಿಸಲು ಯತ್ನಿಸಿದಾಗ, ಆಧಾರ್ ಸಾಫ್ಟ್‌ವೇರ್ ಅದನ್ನು ‘ಡ್ಯುಪ್ಲಿಕೇಟ್ ಎಂಟ್ರಿ’ ಎಂದು ಗುರುತಿಸಿ ತಿರಸ್ಕರಿಸಲು ಪ್ರಾರಂಭಿಸಿತು. ಇದರಿಂದಾಗಿ ಇಬ್ಬರಲ್ಲಿ ಒಬ್ಬರ ಆಧಾರ್ ಮಾತ್ರ ಅಪ್‌ಡೇಟ್ ಆಗಿ, ಇನ್ನೊಬ್ಬರದ್ದು ಸ್ಥಗಿತಗೊಂಡಿತು.

ಕುಟುಂಬದ ಆತಂಕ ಹಾಗೂ ಅಧಿಕಾರಿಗಳ ಸ್ಪಂದನೆ:

ಶಾಲೆ ಹಾಗೂ ಬೋರ್ಡ್ ಪರೀಕ್ಷೆಯ ನೋಂದಣಿಗೆ ಆಧಾರ್ ಕಡ್ಡಾಯವಾಗಿದ್ದರಿಂದ, ಒಂದು ಶೈಕ್ಷಣಿಕ ವರ್ಷ ವ್ಯರ್ಥವಾಗಬಹುದು ಎಂಬ ಆತಂಕ ಕುಟುಂಬದಲ್ಲಿ ಮೂಡಿತು. ಸುಮಾರು 3-4 ತಿಂಗಳುಗಳ ಕಾಲ ಈ ಸಮಸ್ಯೆಗೆ ಪರಿಹಾರ ಸಿಗದೆ ಕುಟುಂಬಸ್ಥರು ಕಲೆಕ್ಟರೇಟ್ ಮತ್ತು ಸಂಬಂಧಿತ ಅಧಿಕಾರಿಗಳಿಗೆ ಅಲೆದಾಡಬೇಕಾಯಿತು.

ಅಂತಿಮವಾಗಿ, ವಿದ್ಯಾರ್ಥಿನಿಯರ ತಂದೆ ಜುಬೇರ್ ಇಲ್ಯಾಸ್ ಅವರು ರಾಮ್‌ಪುರ ಜಿಲ್ಲಾಧಿಕಾರಿ ಅಜಯ್ ಕುಮಾರ್ ದ್ವಿವೇದಿ ಅವರ ಬಳಿ ಸಮಸ್ಯೆ ತೋಡಿಕೊಂಡರು. ಜಿಲ್ಲಾಧಿಕಾರಿಗಳು ತಕ್ಷಣ ಸ್ಪಂದಿಸಿ, ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರ (UIDAI) ನವದೆಹಲಿ ಸಿಇಒ ಭುವನೇಶ್ ಕುಮಾರ್ ಮತ್ತು ಲಖನೌ ಪ್ರಾದೇಶಿಕ ಅಧಿಕಾರಿಗಳೊಂದಿಗೆ ಜಂಟಿಯಾಗಿ ಚರ್ಚಿಸಿದರು.

ತಾಂತ್ರಿಕ ದೋಷವೇ? ಅಥವಾ ಬಯೋಮೆಟ್ರಿಕ್ ಒಂದೇ ಇದೆಯೇ?:

ಆರಂಭದಲ್ಲಿ ಇಬ್ಬರ ಬೆರಳಚ್ಚು ಮತ್ತು ಐರಿಸ್ ಸಂಪೂರ್ಣ ಒಂದೇ ಆಗಿವೆ ಎಂಬ ವದಂತಿಗಳು ಹರಿದಾಡಿದ್ದವು. ಆದರೆ UIDAI ಅಧಿಕಾರಿಗಳು ಇದನ್ನು ಸ್ಪಷ್ಟಪಡಿಸಿದ್ದು, ಇದು ಬಯೋಮೆಟ್ರಿಕ್‌‌ಗಳ ಸಂಪೂರ್ಣ ಸಾಮ್ಯತೆಯಲ್ಲ, ಬದಲಿಗೆ ಸಾಫ್ಟ್‌ವೇರ್‌ನಲ್ಲಿ ಸಂಭವಿಸಿದ ತಾಂತ್ರಿಕ ದೋಷ ಹಾಗೂ ಅಪ್‌ಡೇಟ್ ಪ್ರಕ್ರಿಯೆಯಲ್ಲಾದ ಸಮಸ್ಯೆಯಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ವಿಶೇಷ ತಾಂತ್ರಿಕ ಪ್ರಕ್ರಿಯೆಗಳು ಮತ್ತು ಅಪವಾದ ನಿಯಮಗಳ ಅಡಿಯಲ್ಲಿ ಪರಿಶೀಲನೆ ನಡೆಸಿದ ಅಧಿಕಾರಿಗಳು, ಸುಮಾರು ನಾಲ್ಕು ತಿಂಗಳ ಸುದೀರ್ಘ ಪ್ರಯತ್ನದ ನಂತರ ಇಬ್ಬರಿಗೂ ಪ್ರತ್ಯೇಕ ಆಧಾರ್ ಕಾರ್ಡ್ ನೀಡುವಲ್ಲಿ ಯಶಸ್ವಿಯಾಗಿದ್ದಾರೆ. ಇದರಿಂದ ಸಹೋದರಿಯರ ಶೈಕ್ಷಣಿಕ ದಾಖಲಾತಿ ಪ್ರಕ್ರಿಯೆಗಳು ಸುಗಮವಾಗಿ ಮುಂದುವರಿದಿವೆ.