ಮೊಬೈಲ್ ವಾಲ್‌ಪೇಪರ್‌ನಲ್ಲಿ ಗಣೇಶ ಫೋಟೋ: ‘ಶಾಜಿಯಾ’ ನಾಟಕವಾಡಿ ಪ್ರಿಯಕರನ ಜೊತೆ ಎಸ್ಕೇಪ್ ಆಗಲು ಯತ್ನಿಸಿದವಳು ಸಿಕ್ಕಿಬಿದ್ದಿದ್ದು ಹೇಗೆ?

ನವದೆಹಲಿನ: ಪ್ರಿಯಕರನ ಮಾತು ಕೇಳಿ ಮನೆಯಲ್ಲಿದ್ದ ಚಿನ್ನಾಭರಣ ಹಾಗೂ ನಗದಿನೊಂದಿಗೆ ಓಡಿಹೋಗಲು ಯತ್ನಿಸುತ್ತಿದ್ದ ಯುವತಿಯೊಬ್ಬಳನ್ನು ಸಾರ್ವಜನಿಕರೊಬ್ಬರ ಸಮಯಪ್ರಜ್ಞೆ ಮತ್ತು ಸೂಕ್ಷ್ಮ ವೀಕ್ಷಣೆ ರಕ್ಷಿಸಿರುವ ಘಟನೆಯೊಂದು ಬೆಳಕಿಗೆ ಬಂದಿದೆ. ಬುರ್ಖಾ ಧರಿಸಿ ತಮ್ಮ ನಿಜವಾದ ಗುರುತನ್ನು ಮರೆಮಾಚಲು ಯತ್ನಿಸಿದ್ದ ಯುವತಿಯ ಅಸಲಿ ಮುಖವಾಡ ಕಳಚಲು ಆಕೆಯ ಮೊಬೈಲ್ ವಾಲ್‌ಪೇಪರ್‌ನಲ್ಲಿದ್ದ ಶ್ರೀ ಗಣೇಶನ ಚಿತ್ರವೇ ಪ್ರಮುಖ ಸಾಕ್ಷಿಯಾಗಿದೆ.

ಉದ್ಯಾನವನದಲ್ಲಿ ಶಂಕಾಸ್ಪದ ವರ್ತನೆ:

ಉದ್ಯಾನವನವೊಂದರಲ್ಲಿ ಬುರ್ಖಾ ಧರಿಸಿದ್ದ ಯುವತಿಯೊಬ್ಬಳು ಏಕಾಂಗಿಯಾಗಿ ಕುಳಿತು ಮೊಬೈಲ್‌ನಲ್ಲಿ ಆತಂಕದಿಂದ ಮಾತನಾಡುತ್ತಿದ್ದಳು. ಆಕೆಯ ನಡವಳಿಕೆ ಹಾಗೂ ಹಾವಭಾವದಲ್ಲಿ ಅನುಮಾನ ವ್ಯಕ್ತವಾದ ಹಿನ್ನೆಲೆಯಲ್ಲಿ, ಅದೇ ಮಾರ್ಗವಾಗಿ ಸಾಗುತ್ತಿದ್ದ ದಾರಿಹೋಕರೊಬ್ಬರು ಆಕೆಯ ಬಳಿ ತೆರಳಿ ವಿಚಾರಿಸಲು ಯತ್ನಿಸಿದ್ದಾರೆ. ಸಾರ್ವಜನಿಕರು ಹತ್ತಿರ ಬರುತ್ತಿದ್ದಂತೆಯೇ ಗಾಬರಿಗೊಂಡ ಯುವತಿ, ಅಲ್ಲಿಂದ ತಕ್ಷಣ ಕಾಲ್ತೆಗೆಯಲು ಯತ್ನಿಸಿದ್ದಾಳೆ. ಇದರಿಂದ ಅನುಮಾನ ಮತ್ತಷ್ಟು ತೀವ್ರಗೊಂಡು ಆಕೆಯನ್ನು ತಡೆದು ಹೆಸರು ವಿಚಾರಿಸಿದಾಗ, ಆಕೆ ತನ್ನ ಹೆಸರು ‘ಶಾಜಿಯಾ’ ಎಂದು ತಿಳಿಸಿದ್ದಾಳೆ.

ಪ್ರಿಯಕರನ ವಂಚನೆಯ ಸುಳಿವು:

ಯುವತಿಯ ಗಾಬರಿ ಮತ್ತು ಹೇಳಿಕೆಯಿಂದ ಸಂಶಯಗೊಂಡ ಆ ವ್ಯಕ್ತಿ, ನಿಜವಾದ ಹೆಸರು ಮತ್ತು ಗುರುತು ಮರೆಮಾಚಿ ಕುಳಿತಿರುವ ಕಾರಣವನ್ನು ಖಡಕ್ ಆಗಿ ಪ್ರಶ್ನಿಸಿದ್ದಾರೆ. ಸಾರ್ವಜನಿಕರ ಸತತ ವಿಚಾರಣೆ ಮತ್ತು ಒತ್ತಡಕ್ಕೆ ಮಣಿದ ಯುವತಿ ಕೊನೆಗೆ ತಾನು ಯಾರೆಂಬ ಸತ್ಯವನ್ನು ಬಾಯಿಬಿಟ್ಟಿದ್ದಾಳೆ. ವಿಚಾರಣೆಯ ವೇಳೆ ಆಕೆ ಮನೆಯಲ್ಲಿದ್ದ ಬೆಲೆಬಾಳುವ ಚಿನ್ನಾಭರಣ ಹಾಗೂ ನಗದನ್ನು ಎಗರಿಸಿ ಪ್ರಿಯಕರನೊಂದಿಗೆ ಬಂದಿರುವುದು ತಿಳಿದುಬಂದಿದೆ. “ಬೆಲೆಬಾಳುವ ವಸ್ತುಗಳನ್ನು ಸುರಕ್ಷಿತ ಸ್ಥಳದಲ್ಲಿಟ್ಟು ಬರುವುದಾಗಿ ಹೇಳಿ ಪ್ರಿಯಕರ ತೆರಳಿದ್ದಾನೆ, ನನ್ನನ್ನು ಇಲ್ಲಿಯೇ ಕಾಯಲು ಹೇಳಿದ್ದಾನೆ” ಎಂದು ಯುವತಿ ತಿಳಿಸಿದ್ದಾಳೆ.

ಇದನ್ನು ಕೇಳಿದ ಸಾರ್ವಜನಿಕರು, “ನಿನ್ನ ಪ್ರಿಯಕರ ನಿನ್ನನ್ನು ನಂಬಿಸಿ ಹಣ ಹಾಗೂ ಒಡವೆಯೊಂದಿಗೆ ಪರಾರಿಯಾಗಿರಬಹುದು” ಎಂದು ಎಚ್ಚರಿಸಿದಾಗ ಯುವತಿಗೆ ಪರಿಸ್ಥಿತಿಯ ಗಂಭೀರತೆ ಅರ್ಥವಾಗಿ ಕಣ್ಣೀರಿಡಲು ಶುರುಮಾಡಿದ್ದಾಳೆ. “ಅಯ್ಯೋ, ಈಗ ನಾನಂತೂ ಮನೆಗೆ ಮರಳಲು ಸಾಧ್ಯವೇ ಇಲ್ಲ” ಎಂದು ಆತಂಕ ವ್ಯಕ್ತಪಡಿಸಿದ್ದಾಳೆ.

ಅನುಮಾನಕ್ಕೆ ಕಾರಣವಾಯ್ತು ಮೊಬೈಲ್ ವಾಲ್‌ಪೇಪರ್!

ವಿಷಯ ತಿಳಿದು ತಕ್ಷಣ ಘಟನಾ ಸ್ಥಳಕ್ಕೆ ಧಾವಿಸಿ ಬಂದ ಯುವತಿಯ ಪೋಷಕರು, ತಮ್ಮ ಮಗಳನ್ನು ಯಾವುದೇ ದೊಡ್ಡ ಅನಾಹುತಕ್ಕೆ ಸಿಲುಕದಂತೆ ರಕ್ಷಿಸಿದ ವ್ಯಕ್ತಿಗೆ ಹೃತ್ಪೂರ್ವಕ ಕೃತಜ್ಞತೆ ಸಲ್ಲಿಸಿದರು. ಜೊತೆಗೆ, “ಆಕೆ ಬುರ್ಖಾ ಧರಿಸಿದ್ದರೂ ನಿಮಗೇಕೆ ಅನುಮಾನ ಬಂತು?” ಎಂದು ಕುತೂಹಲದಿಂದ ವಿಚಾರಿಸಿದರು.

ಇದಕ್ಕೆ ಉತ್ತರಿಸಿದ ಆ ವ್ಯಕ್ತಿ, “ಆಕೆ ಸಂಪೂರ್ಣವಾಗಿ ಬುರ್ಖಾ ಧರಿಸಿದ್ದರೂ, ಆಕೆಯ ಕೈಯಲ್ಲಿದ್ದ ಮೊಬೈಲ್‌ನ ವಾಲ್‌ಪೇಪರ್‌ನಲ್ಲಿ ಶ್ರೀ ಗಣೇಶನ ಚಿತ್ರವಿತ್ತು. ಬುರ್ಖಾ ಧರಿಸಿದ್ದರೂ ಗಣೇಶನ ಫೋಟೋ ಇಟ್ಟುಕೊಂಡು ತನ್ನ ಹೆಸರು ‘ಶಾಜಿಯಾ’ ಎಂದು ಹೇಳಿದ್ದು ನನ್ನಲ್ಲಿ ಬಲವಾದ ಸಂಶಯ ಮೂಡಿಸಿತು. ಗಂಭೀರವಾಗಿ ವಿಚಾರಿಸಿದಾಗ ಆಕೆಯ ನಿಜವಾದ ಆಟ ಬಯಲಾಯ್ತು” ಎಂದು ವಿವರಿಸಿದ್ದಾರೆ. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. 

ಪೋಷಕರ ನಿರಾಳತೆ:

ತಮ್ಮ ಮಗಳು ಸುರಕ್ಷಿತವಾಗಿ ಸಿಕ್ಕಿದ್ದಕ್ಕೆ ನಿರಾಳರಾದ ಪೋಷಕರು, ಯುವತಿಗೆ ಬುದ್ಧಿವಾದ ಹೇಳಿ ತಮ್ಮೊಂದಿಗೆ ಮನೆಗೆ ಕರೆದೊಯ್ದಿದ್ದಾರೆ. ಪ್ರತಿಯೊಂದು ಸಣ್ಣ ಅಂಶವನ್ನೂ ಗಮನಿಸಿ ಅನಾಹುತವನ್ನು ತಪ್ಪಿಸಿದ ಸಾರ್ವಜನಿಕ ವ್ಯಕ್ತಿಯ ಸಮಯಪ್ರಜ್ಞೆ ಮತ್ತು ಸೂಕ್ಷ್ಮ ವೀಕ್ಷಣೆಗೆ ಸ್ಥಳೀಯ ಸಾರ್ವಜನಿಕರಿಂದ ವ್ಯಾಪಕ ಪ್ರಶಂಸೆ ವ್ಯಕ್ತವಾಗಿದೆ.