ಫ್ರಿಡ್ಜ್‌ನಲ್ಲಿ ಪತ್ನಿ ರುಂಡ ಇಟ್ಟಿದ್ದ ಕೇಸ್: ವೈದ್ಯಕೀಯ ತಪಾಸಣೆ ವೇಳೆ ಪೋಲೀಸರ ಕಣ್ಣು ತಪ್ಪಿಸಿ ಜಿಗಿದು ತಪ್ಪಿಸಿಕೊಳ್ಳಲು ಯತ್ನಿಸಿ ಪ್ರಾಣ ಬಿಟ್ಟ ಹಂತಕ!

ಅಸ್ಸಾಂ: ಗುವಾಹಟಿಯಲ್ಲಿ ನಡೆದ ದೋಣಿಮನೆ ಮಾದರಿಯ ಭೀಕರ ಕೊಲೆ ಪ್ರಕರಣದ ಪ್ರಮುಖ ಆರೋಪಿ, 30 ವರ್ಷದ ರಾಮಾನುಜ್ ಗೋಸ್ವಾಮಿ ಸೋಮವಾರ ಮುಂಜಾನೆ ಪೊಲೀಸ್ ವಾಹನದಿಂದ ಜಿಗಿದು ಸಾವನ್ನಪ್ಪಿದ್ದಾನೆ. ಈತ ತನ್ನ ಪತ್ನಿಯ ಶಿರಚ್ಛೇದನ ಮಾಡಿ, ಆಕೆಯ ಕತ್ತರಿಸಿದ ತಲೆ ಹಾಗೂ ಬೆರಳುಗಳನ್ನು ಫ್ರಿಡ್ಜ್‌ನಲ್ಲಿಟ್ಟಿದ್ದ ಆರೋಪ ಎದುರಿಸುತ್ತಿದ್ದ.

ಘಟನೆಯ ಪೂರ್ಣ ಹಿನ್ನೆಲೆ ಹಾಗೂ ವಿವರ:

ಭೀಕರ ಹತ್ಯೆ ಮತ್ತು ಕೃತ್ಯದ ರಹಸ್ಯ ಬಟಾಬಯಲು:

ಗುವಾಹಟಿಯ ಹತಿಯಾಗಾಂವ್ ವ್ಯಾಪ್ತಿಯ ಬಸಿಷ್ಠಪುರದಲ್ಲಿ ವಾಸವಿದ್ದ ರಾಮಾನುಜ್ ಗೋಸ್ವಾಮಿ ಮತ್ತು ಆತನ ಪತ್ನಿ ರಿಯಾ ತಾಲುಕ್‌ದಾರ್‌ (25) ನಡುವೆ ಸೆಪ್ಟೆಂಬರ್ 3 ರಂದು ತೀವ್ರ ಜಗಳ ನಡೆದಿತ್ತು. ಪತ್ನಿಗೆ ಅಕ್ರಮ ಸಂಬಂಧವಿದೆ ಎಂಬ ಶಂಕೆಯಿಂದ ಕಡು ಕೋಪಗೊಂಡ ರಾಮಾನುಜ್, ಕೊಡಲಿಯಿಂದ ಆಕೆಯ ಶಿರಚ್ಛೇದನ ಮಾಡಿ, ಆಕೆಯ ಕೈ ಬೆರಳುಗಳನ್ನು ಕತ್ತರಿಸಿದ್ದ. ಆ ಬಳಿಕ ತಲೆಯನ್ನು ಕಪ್ಪು ಪ್ಲಾಸ್ಟಿಕ್ ಚೀಲದಲ್ಲಿ ಸುತ್ತಿ ಮನೆಯ ಫ್ರಿಡ್ಜ್‌ನಲ್ಲಿ ಬಚ್ಚಿಟ್ಟಿದ್ದ. ಮನೆಗೆ ಬೀಗ ಹಾಕಿ ಪರಾರಿಯಾಗಿದ್ದ ಆತನ ಕೃತ್ಯ, ಸೆಪ್ಟೆಂಬರ್ 6 ರಂದು ಮನೆಯಿಂದ ದುರ್ವಾಸನೆ ಬಂದಾಗ ಮತ್ತು ಆತ ಹತಿಯಾಗಾಂವ್ ಠಾಣೆಗೆ ಬಂದು ಶರಣಾದಾಗ ಬೆಳಕಿಗೆ ಬಂದಿತ್ತು.

ಪೋಲಿಸ್ ತನಿಖೆ ಮತ್ತು ಆರೋಪಿಯ ಕ್ರೌರ್ಯ:

ಪೊಲೀಸರು ಕೃತ್ಯಕ್ಕೆ ಬಳಸಿದ ಮಾರಕಾಸ್ತ್ರ, ಫ್ರಿಡ್ಜ್ ಹಾಗೂ ಮದ್ಯದ ಬಾಟಲಿಗಳನ್ನು ವಶಪಡಿಸಿಕೊಂಡಿದ್ದರು. ತನಿಖೆ ವೇಳೆ ಸೆಪ್ಟೆಂಬರ್ 8 ರಂದು ಕೃತ್ಯ ನಡೆದ ಸ್ಥಳಕ್ಕೆ ಕರೆದೊಯ್ದಾಗ, ರಾಮಾನುಜ್ ತಾನು ಮಾಡಿದ ಕೊಲೆಗೆ ಯಾವುದೇ ಪಶ್ಚಾತ್ತಾಪವಿಲ್ಲ ಎಂದು ಮಾಧ್ಯಮಗಳ ಮುಂದೆ ಹೇಳಿಕೆ ನೀಡಿದ್ದ. “ನನ್ನ ಪತ್ನಿಯನ್ನು ಮುಗಿಸಿದ್ದೇನೆ, ಜೈಲಿನಿಂದ ಹೊರಬಂದ ಮೇಲೆ ಆಕೆಯ ಸುಗರ್ ಡ್ಯಾಡಿಯನ್ನು (ಅಕ್ರಮ ಸಂಬಂಧ ಹೊಂದಿದ್ದ ವ್ಯಕ್ತಿ) ಕೊಲ್ಲುತ್ತೇನೆ” ಎಂದು ಬೆದರಿಕೆ ಹಾಕಿದ್ದ.

ದುರಂತ ಅಂತ್ಯ 

ಸೋಮವಾರ (ಸೆಪ್ಟೆಂಬರ್ 14) ಮುಂಜಾನೆ ಗುವಾಹಟಿ ಮೆಡಿಕಲ್ ಕಾಲೇಜು ಮತ್ತು ಆಸ್ಪತ್ರೆಯಲ್ಲಿ (GMCH) ವೈದ್ಯಕೀಯ ತಪಾಸಣೆ ಮುಗಿಸಿ, ಆರೋಪಿಯನ್ನು ಹತಿಯಾಗಾಂವ್ ಪೊಲೀಸ್ ಠಾಣೆಗೆ ಕರೆದೊಯ್ಯಲಾಗುತ್ತಿತ್ತು. ನರಕಾಸುರ ಪಹಾರ್ ಪ್ರದೇಶದ ಬಳಿ ವಾಹನ ಸಾಗುತ್ತಿದ್ದಾಗ, ರಾಮಾನುಜ್ ದಿಢೀರನೆ ಪೊಲೀಸ್ ಸಿಬ್ಬಂದಿಯ ಮೇಲೆ ದಾಳಿ ನಡೆಸಿ, ಚಲಿಸುತ್ತಿದ್ದ ವಾಹನದಿಂದ ಹೊರಗೆ ಜಿಗಿದಿದ್ದಾನೆ. ಆತ ಪ್ರಪಾತಕ್ಕೆ ಬಿದ್ದು ತೀವ್ರವಾಗಿ ಗಾಯಗೊಂಡಿದ್ದ. ತಕ್ಷಣ ಆತನನ್ನು ರಕ್ಷಿಸಿ ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ, ಪರೀಕ್ಷಿಸಿದ ವೈದ್ಯರು ಆತ ಮೃತಪಟ್ಟಿರುವುದಾಗಿ ಘೋಷಿಸಿದರು.