ಸಿಲ್ವರ್‌ಸ್ಟೋನ್‌ನಲ್ಲಿ ಅಜಿತ್ – ತ್ರಿಷಾ ಜೊತೆ ವೈರಲ್ ಆದ ವಿಜಯ್ ಫೋಟೋ; “ಇದಾ ಬಂಡವಾಳ ಹೂಡಿಕೆ ತರೋ ಮಾರ್ಗ?” ಎಂದು ವಿಪಕ್ಷಗಳ ಪ್ರಹಾರ!

ಲಂಡನ್: ತಮಿಳುನಾಡು ಮುಖ್ಯಮಂತ್ರಿ ಜೋಸೆಫ್ ವಿಜಯ್ ಅವರ ಲಂಡನ್ ಪ್ರವಾಸ ಮತ್ತು ಸಿಲ್ವರ್‌ಸ್ಟೋನ್ ರೇಸಿಂಗ್ ಟ್ರ್ಯಾಕ್‌ನಲ್ಲಿ ರೇಸ್ ವೀಕ್ಷಿಸಿದರು. ತಮಿಳುನಾಡು ಖ್ಯಾತ ನಟ ಅಜಿತ್ ಅವರನ್ನು ಭೇಟಿ ಮಾಡಿದ್ದರು.

ಲಂಡನ್ ಪ್ರವಾಸದ ವಿವಾದದ ಹಿನ್ನೆಲೆ

ತಮಿಳುನಾಡು ಮುಖ್ಯಮಂತ್ರಿಯಾಗಿ ಅಧಿಕಾರ ವಹಿಸಿಕೊಂಡ ನಂತರ ಜೋಸೆಫ್ ವಿಜಯ್ ಅವರು ನಾಲ್ಕು ದಿನಗಳ ಅಧಿಕೃತ ಪ್ರವಾಸಕ್ಕಾಗಿ ಲಂಡನ್‌ಗೆ ತೆರಳಿದ್ದರು. ರಾಜ್ಯಕ್ಕೆ ವಿದೇಶಿ ಹೂಡಿಕೆಗಳನ್ನು ಆಕರ್ಷಿಸಲು ಮತ್ತು ಪ್ರಮುಖ ಉದ್ಯಮಿಗಳೊಂದಿಗೆ ಸಭೆ ನಡೆಸಿ ಅಭಿವೃದ್ಧಿ ಯೋಜನೆಯನ್ನು ಚರ್ಚಿಸುವುದು ಈ ಪ್ರವಾಸದ ಮುಖ್ಯ ಉದ್ದೇಶ ಎಂದು ತಿಳಿಸಲಾಗಿತ್ತು.

ಆದರೆ ಪ್ರವಾಸದ ವೇಳೆ ಸಿಲ್ವರ್‌ಸ್ಟೋನ್ ಸಿರ್ಕುಟ್ (Silverstone Circuit) ನ ರೇಸಿಂಗ್ ಈವೆಂಟ್‌ನಿಂದ ಕೆಲ ಚಿತ್ರಗಳು ಹಾಗೂ ವೀಡಿಯೊಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ನಂತರ ವಿರೋಧ ಪಕ್ಷಗಳ ತೀವ್ರ ವಾಗ್ದಾಳಿ ಆರಂಭವಾಯಿತು.

ರೇಸಿಂಗ್ ಕಣದಲ್ಲಿ ಮುಖ್ಯಮಂತ್ರಿ

ಲೆ ಮ್ಯಾನ್ಸ್ ಕಪ್ (Le Mans Cup) ರೇಸಿಂಗ್‌ನಲ್ಲಿ ಭಾಗವಹಿಸುತ್ತಿದ್ದ ನಟ ಅಜಿತ್ ಕುಮಾರ್ ಅವರನ್ನು ಭೇಟಿಯಾಗಲು ಸಿಎಚ್ ವಿಜಯ್ ಸಿಲ್ವರ್‌ಸ್ಟೋನ್ ಟ್ರ್ಯಾಕ್‌ಗೆ ಭೇಟಿ ನೀಡಿದ್ದರು.

ಅವರ ಜೊತೆ ನಟಿ ತ್ರಿಷಾ ಕೃಷ್ಣನ್ ಕೂಡ ಕಾಣಿಸಿಕೊಂಡಿದ್ದರು.

ಪ್ರವಾಸದ ವೇಳೆ ಸಿಎಂ ವಿಜಯ್ ತಮ್ಮ ‘ಆತ್ಮೀಯ ಸಹೋದರ’ ಅಜಿತ್ ಕುಮಾರ್ ಅವರಿಗೆ ಸಣ್ಣ ಮಾದರಿಯ ರೇಸಿಂಗ್ ಕಾರನ್ನು ಕೊಡುಗೆಯಾಗಿ ನೀಡಿ, ಅವರನ್ನು ಅಪ್ಪಿಕೊಂಡಿರುವ ಫೋಟೋಗಳು ಜಾಲತಾಣಗಳಲ್ಲಿ ಹಂಚಿಕೊಳ್ಳಲ್ಪಟ್ಟವು.

ವಿರೋಧ ಪಕ್ಷಗಳ ತೀವ್ರ ಟೀಕೆ ಮತ್ತು ಚಾಟಿ

ರೇಸಿಂಗ್ ಕಣದ ಫೋಟೋಗಳು ಹೊರಬೀಳುತ್ತಿದ್ದಂತೆ ತಮಿಳುನಾಡಿನ ಪ್ರಮುಖ ವಿಪಕ್ಷಗಳು ಸರ್ಕಾರದ ನಡೆಗೆ ತೀವ್ರ ವಿರೋಧ ವ್ಯಕ್ತಪಡಿಸಿವೆ:

 ಎಐಎಡಿಎಂಕೆ (AIADMK) ವ್ಯಂಗ್ಯ: ಎಐಎಡಿಎಂಕೆ ಪ್ರಧಾನ ಕಾರ್ಯದರ್ಶಿ ಎಡಪ್ಪಾಡಿ ಕೆ. ಪಳನಿಸ್ವಾಮಿ (EPS) ಆರಂಭದಲ್ಲಿ ವಿಜಯ್ ಅವರ ಹೂಡಿಕೆ ಪ್ರವಾಸವನ್ನು ಸ್ವಾಗತಿಸಿದ್ದರು. ಆದರೆ ರೇಸಿಂಗ್ ಟ್ರ್ಯಾಕ್ ಫೋಟೋಗಳನ್ನು ನೋಡಿ ವ್ಯಂಗ್ಯವಾಗಿ ಪ್ರತಿಕ್ರಿಯಿಸಿ, “ಸಿಎಂ ಮಾಧ್ಯಮಗಳಲ್ಲಿ ತೋರಿಸುತ್ತಿರುವ ರೀತಿ ನೋಡಿದರೆ, ಅವರು ಲಂಡನ್‌ನಲ್ಲಿ ಬಂಡವಾಳ ಆಕರ್ಷಿಸುತ್ತಿರುವ ಶೈಲಿ ಅತ್ಯಂತ ವಿಭಿನ್ನವಾಗಿದೆ!” ಎಂದು ಟೀಕಿಸಿದರು.

 ಬಿಜೆಪಿ ಪ್ರಶ್ನೆಗಳ ಸುರಿಮಳೆ: ತಮಿಳುನಾಡು ಬಿಜೆಪಿ ರಾಜ್ಯಾಧ್ಯಕ್ಷ ನೈನಾರ್ ನಾಗೇಂದ್ರನ್ ಹಲವಾರು ಗಂಭೀರ ಪ್ರಶ್ನೆಗಳನ್ನು ಎತ್ತಿದ್ದಾರೆ:

ಈ ಲಂಡನ್ ಭೇಟಿ ವೈಯಕ್ತಿಕವೋ ಅಥವಾ ಸರ್ಕಾರದ ಅಧಿಕೃತ ಪ್ರವಾಸವೋ?

ಪ್ರವಾಸಕ್ಕೆ ರಾಜ್ಯ ಸರ್ಕಾರದ ಬೊಕ್ಕಸದಿಂದ ಸಾರ್ವಜನಿಕರ ಹಣ ಬಳಸಲಾಗಿದೆಯೇ?

ನಾಲ್ಕು ದಿನಗಳ ಕಡಿಮೆ ಅವಧಿಯಲ್ಲಿ ಎಷ್ಟು ಉದ್ಯಮಿಗಳ ಜೊತೆ ಸಭೆ ನಡೆಸಲಾಗಿದೆ ಮತ್ತು ತಮಿಳುನಾಡಿಗೆ ಎಷ್ಟು ಕೋಟಿ ಬಂಡವಾಳದ ಭರವಸೆ ಸಿಕ್ಕಿದೆ?

ಪ್ರವಾಸದಲ್ಲಿ ಅವರ ಜೊತೆ ತೆರಳಿದ ಇತರೆ ವ್ಯಕ್ತಿಗಳು ಯಾರು ಎಂಬುದರ ಬಗ್ಗೆ ಸ್ಪಷ್ಟನೆ ಬೇಕು ಎಂದು ಅವರು ಆಗ್ರಹಿಸಿದ್ದಾರೆ.

ಡಿಎಂಕೆ (DMK) ಆಕ್ರೋಶ: ಡಿಎಂಕೆ ನಾಯಕ ಉದಯನಿಧಿ ಸ್ಟಾಲಿನ್ ವಿಜಯ್ ಸರ್ಕಾರದ ಆಡಳಿತದ ವೈಫಲ್ಯಗಳನ್ನು ಉಲ್ಲೇಖಿಸಿ ವಾಗ್ದಾಳಿ ನಡೆಸಿದರು:

ರಾಜ್ಯದಲ್ಲಿ ನಿರಂತರ ವಿದ್ಯುತ್ ಅಭಾವ, ಲೋಡ್‌ಶೆಡ್ಡಿಂಗ್ ಮತ್ತು ಕಾನೂನು ಸುವ್ಯವಸ್ಥೆಯ ಸಮಸ್ಯೆಗಳು ತಾಂಡವವಾಡುತ್ತಿವೆ.

ಪ್ರಜೆಗಳ ಮೂಲಭೂತ ಸಮಸ್ಯೆಗಳನ್ನು ಬಗೆಹರಿಸುವುದನ್ನು ಬಿಟ್ಟು ಸಿಎಂ ವಿದೇಶದಲ್ಲಿ ಮೋಜು ಮಾಡುತ್ತಿದ್ದಾರೆ.

“ತಮಿಳುನಾಡಿನ ರಾಜಕೀಯ ಇತಿಹಾಸದಲ್ಲೇ ಇಂತಹ ಜವಾಬ್ದಾರಿರಹಿತ ಹಾಗೂ ಅನಾಗರಿಕ ಆಡಳಿತವನ್ನು ನಾವೆಂದೂ ನೋಡಿರಲಿಲ್ಲ” ಎಂದು ಕಿಡಿಕಾರಿದರು.

ವಿದೇಶಿ ಪ್ರವಾಸ ಮುಗಿಸಿ ತಮಿಳುನಾಡಿಗೆ ಮರಳಿದ ತಕ್ಷಣವೇ ಸಿಎಂ ಜೋಸೆಫ್ ವಿಜಯ್ ಅವರು ಲಂಡನ್‌ನಲ್ಲಿ ನಡೆದ ಹೂಡಿಕೆ ಸಭೆಗಳು ಹಾಗೂ ಒಪ್ಪಂದಗಳ ಕುರಿತು ಶ್ವೇತಪತ್ರ ಅಥವಾ ಅಧಿಕೃತ ವಿವರಣೆಯನ್ನು ನೀಡಬೇಕೆಂದು ವಿರೋಧ ಪಕ್ಷಗಳು ಬಿಗಿಪಟ್ಟು ಹಿಡಿದಿವೆ.