ಮಗನ ಸಾವಿಗೆ ನ್ಯಾಯಕ್ಕಾಗಿ 500 ಕಿ.ಮೀ ಪ್ರಯಾಣ: ಸಚಿವಾಲಯದ ಮುಂದೆ ತಾಯಿಯ ಕಣ್ಣೀರಿನ ಧರಣಿ!

ಗುವಾಹಟಿ: ಮಗನ ಅನುಮಾನಾಸ್ಪದ ಸಾವಿಗೆ ಸೂಕ್ತ ನ್ಯಾಯ ಸಿಗದಿರುವುದನ್ನು ಖಂಡಿಸಿ, ವಿಧವೆ ತಾಯಿಯೊಬ್ಬರು ಸುಮಾರು 500 ಕಿಲೋಮೀಟರ್‌ ಒಂಟಿಯಾಗಿ ಪ್ರಯಾಣಿಸಿ ರಾಜ್ಯ ಸಚಿವಾಲಯದ (ಜನತಾ ಭವನ) ಮುಂದೆ ಪ್ರತಿಭಟನೆ ನಡೆಸಿದ ಘಟನೆ ಅಸ್ಸಾಂನಲ್ಲಿ ನಡೆದಿದೆ.

ಧೇಮಾಜಿ ಜಿಲ್ಲೆಯ ಗೋಗಾಮುಖ್ ನಿವಾಸಿ ಜೆರಿನಾ ಬೋರಾ ಪ್ರತಿಭಟನೆ ನಡೆಸಿದ ತಾಯಿಯಾಗಿದ್ದು, ತಮ್ಮ ಮಗ ರಾಕೇಶ್ ಬೋರಾ ಅವರ ಫೋಟೋ ಹಿಡಿದು ಜನತಾ ಭವನದ ಮುಂದೆ ಕಣ್ಣೀರಿಡುತ್ತಾ ನ್ಯಾಯಕ್ಕಾಗಿ ಆಗ್ರಹಿಸಿದರು.

ಪ್ರಕರಣದ ಹಿನ್ನೆಲೆ:

ಫೆಬ್ರವರಿ 28 ರಂದು ಬೋಗಿನಾಡಿಯ ಕೊಲಪಾನಿ ಎಂಬಲ್ಲಿ ರಾಕೇಶ್ ಬೋರಾ ಮೃತಪಟ್ಟಿದ್ದರು. ಪೊಲೀಸರು ಇದನ್ನು ರಸ್ತೆ ಅಪಘಾತವೆಂದು ಪ್ರಕರಣ ದಾಖಲಿಸಿಕೊಂಡಿದ್ದರು. ಆದರೆ, ತಮ್ಮ ಮಗನನ್ನು ಕೊಲೆ ಮಾಡಲಾಗಿದೆ ಎಂದು ತಾಯಿ ಜೆರಿನಾ ಆರೋಪಿಸಿದ್ದಾರೆ. ಮಗನ ದೇಹದ ಮೇಲೆ ತೀವ್ರ ಗಾಯದ ಗುರುತುಗಳಿದ್ದವು, ಆದರೆ ಆತ ಚಲಾಯಿಸುತ್ತಿದ್ದ ಸ್ಕೂಟರ್‌ಗೆ ಯಾವುದೇ ಹಾನಿಯಾಗಿರಲಿಲ್ಲ. ಹೀಗಾಗಿ ಇದು ಅಪಘಾತವಲ್ಲ, ಕೊಲೆ ಎಂದು ಕುಟುಂಬಸ್ಥರು ಶಂಕಿಸಿದ್ದಾರೆ.

ಪೊಲೀಸ್ ತನಿಖೆಗೆ ಅಸಮಾಧಾನ:

ಸ್ಥಳೀಯ ಪೊಲೀಸರು ಹಾಗೂ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳನ್ನು (SP) ಭೇಟಿಯಾಗಿ ಮನವಿ ಮಾಡಿದರೂ ಯಾವುದೇ ಸೂಕ್ತ ಕ್ರಮ ಕೈಗೊಂಡಿಲ್ಲ. ಈ ಕೊಲೆ ಪ್ರಕರಣದಲ್ಲಿ ಪದ್ಮೇಶ್ವರ್ ಗೊಗೊಯ್, ದೀಪು ಗೊಗೊಯ್, ಶರತ್ ಸೋನೋವಾಲ್ ಮತ್ತು ರೂಬುಲ್ ತಮುಲಿ ಎಂಬುವವರ ಪಾತ್ರವಿದ್ದು, ಪ್ರಭಾವಕ್ಕೆ ಒಳಗಾಗಿ ಪೊಲೀಸರು ಅವರ ವಿರುದ್ಧ ತನಿಖೆ ನಡೆಸುತ್ತಿಲ್ಲ ಎಂದು ಜೆರಿನಾ ಆರೋಪಿಸಿದ್ದಾರೆ.

“ನನ್ನ ಗಂಡ ಎರಡು ವರ್ಷಗಳ ಹಿಂದೆಯಷ್ಟೇ ತೀರಿಕೊಂಡಿದ್ದರು. ನನಗಿದ್ದ ಒಬ್ಬನೇ ಮಗನನ್ನು ಕಳೆದುಕೊಂಡಿದ್ದೇನೆ. ಆತನಿಗೆ ನ್ಯಾಯ ಸಿಗುವವರೆಗೂ ನನ್ನ ಹೋರಾಟ ನಿಲ್ಲುವುದಿಲ್ಲ” ಎಂದು ಕಣ್ಣೀರಿಟ್ಟರು.

ಈ ಪ್ರಕರಣದಲ್ಲಿ ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ಅವರು ತಕ್ಷಣ ಮಧ್ಯಪ್ರವೇಶಿಸಿ ಮರುತನಿಖೆಗೆ ಆದೇಶಿಸಬೇಕು. ಅಗತ್ಯಬಿದ್ದರೆ ಸಿಬಿಐ (CBI) ತನಿಖೆಗೆ ವಹಿಸಬೇಕು ಎಂದು ಅವರು ಆಗ್ರಹಿಸಿದ್ದಾರೆ.