ಅಮೆರಿಕದಲ್ಲಿ ಆತಂಕ: ಸರೋವರದಲ್ಲಿ ಈಜಾಡಿ ‘ಮಿದುಳು ತಿನ್ನುವ ಅಮೀಬಾ’ ಸೋಂಕಿಗೆ ಜನುಮದಿನದ ಮಾರನೇ ದಿನವೇ 8 ವರ್ಷದ ಬಾಲಕಿ ಬಲಿ!

ವಾಷಿಂಗ್ಟನ್: ಅಮೆರಿಕದ ಲೂಸಿಯಾನದಲ್ಲಿ ಅತ್ಯಂತ ಆಘಾತಕಾರಿ ಘಟನೆಯೊಂದು ನಡೆದಿದ್ದು, ಸರೋವರದಲ್ಲಿ ಈಜಾಡಿದ 8 ವರ್ಷದ ಬಾಲಕಿಯೊಬ್ಬಳು ಅಪರೂಪದ ಹಾಗೂ ಭೀಕರ ‘ಮಿದುಳು ತಿನ್ನುವ ಅಮೀಬಾ’ (Brain-Eating Amoeba) ಸೋಂಕಿಗೆ ಒಳಗಾಗಿ ಮೃತಪಟ್ಟಿದ್ದಾಳೆ.

ಮೃತರನ್ನು 8 ವರ್ಷದ ಲಿಲಿಯನ್ ಸ್ಮಾರ್ಟ್ ಎಂದು ಗುರುತಿಸಲಾಗಿದೆ. ಆಕೆಯ 8ನೇ ಜನ್ಮದಿನದ ಮರುದಿನವೇ ಈ ಕರುಣಾಜನಕ ದುರಂತ ಸಂಭವಿಸಿದ್ದು, ಕುಟುಂಬಸ್ಥರು ತೀವ್ರ ಶೋಕದಲ್ಲಿದ್ದಾರೆ.

ಈಜಾಡಿದಾಗ ಮೂಗಿನ ಮೂಲಕ ಹೊಕ್ಕ ಅಮೀಬಾ

ಆಗಸ್ಟ್ 15 ರಂದು ಬಾಲಕಿಯನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಅಧಿಕಾರಿಗಳ ಪ್ರಕಾರ, ಲೂಸಿಯಾನದ ಕ್ಲೇಬೋರ್ನ್ ಸರೋವರದಲ್ಲಿ (Lake Claiborne) ಈಜಾಡುವಾಗ ಬಾಲಕಿಯ ಮೂಗಿನ ಮೂಲಕ ಈ ಅಪಾಯಕಾರಿ ‘ನೇಗ್ಲೇರಿಯಾ ಫೌಲೇರಿ’ (Naegleria fowleri) ಎಂಬ ಅಮೀಬಾ ದೇಹವನ್ನು ಪ್ರವೇಶಿಸಿದೆ. ಮೂಗಿನಿಂದ ನೇರವಾಗಿ ಮಿದುಳಿಗೆ ತಲುಪಿದ ಈ ಅಮೀಬಾ, ಮಿದುಳಿನ ಅಂಗಾಂಶಗಳನ್ನು ಹಾನಿಗೊಳಿಸಿ ತೀವ್ರ ಊತವನ್ನು ಉಂಟುಮಾಡಿದೆ.

ಲೂಸಿಯಾನ ಆರೋಗ್ಯ ಇಲಾಖೆಯು ಆಗಸ್ಟ್ 19 ರಂದು ಈ ಅಪರೂಪದ ‘ಪ್ರೈಮರಿ ಅಮೀಬಿಕ್ ಮೆನಿಂಗೊಎನ್ಸೆಫಾಲಿಟಿಸ್’ (PAM) ಸೋಂಕನ್ನು ಧೃಡಪಡಿಸಿತ್ತು.

‘ನೇಗ್ಲೇರಿಯಾ ಫೌಲೇರಿ’ ಎಂದರೆ ಏನು?

ವಾಸಸ್ಥಾನ: ಇದು ಬೆಚ್ಚಗಿನ ಸಿಹಿ ನೀರು (ಸರೋವರ, ನದಿ, ಬಿಸಿ ನೀರಿನ ಬುಗ್ಗೆಗಳು) ಮತ್ತು ಮಣ್ಣಿನಲ್ಲಿ ಕಂಡುಬರುವ ಏಕಕೋಶೀಯ ಜೀವಿ.

ಸೋಂಕು ಹರಡುವಿಕೆ: ಕಲುಷಿತ ನೀರು ಮೂಗಿನ ಒಳಗೆ ಹೋದಾಗ ಮಾತ್ರ ಈ ಸೋಂಕು ಸಂಭವಿಸುತ್ತದೆ.

ಯಾವುದರಿಂದ ಹರಡುವುದಿಲ್ಲ: ಈ ನೀರನ್ನು ಕುಡಿಯುವುದರಿಂದಾಗಲಿ ಅಥವಾ ಕ್ಲೋರಿನ್ ಹಾಕಿ ಸರಿಯಾಗಿ ನಿರ್ವಹಿಸಿದ ಈಜುಕೊಳಗಳು ಹಾಗೂ ಉಪ್ಪು ನೀರಿನಲ್ಲಿದ್ದಾಗ ಈ ಸೋಂಕು ಹರಡುವುದಿಲ್ಲ. ವ್ಯಕ್ತಿಯಿಂದ ವ್ಯಕ್ತಿಗೆ ಇದು ಹರಡುವುದಿಲ್ಲ.

ಲಕ್ಷಣಗಳು ಮತ್ತು ತಡೆಗಟ್ಟುವಿಕೆ

ಈ ಸೋಂಕಿನ ಲಕ್ಷಣಗಳು ಸೋಂಕು ತಗಲಿದ 1 ರಿಂದ 12 ದಿನಗಳಲ್ಲಿ ಕಾಣಿಸಿಕೊಳ್ಳುತ್ತವೆ:

ಪ್ರಾರಂಭಿಕ ಲಕ್ಷಣಗಳು: ತೀವ್ರ ತಲೆನೋವು, ಜ್ವರ, ವಾಂತಿ ಮತ್ತು ವಾಕರಿಕೆ.

ತೀವ್ರ ಲಕ್ಷಣಗಳು: ಕುತ್ತಿಗೆ ಬಿಗಿಯಾಗುವುದು, ಮೂರ್ಛೆ ತಪ್ಪುವುದು, ಗೊಂದಲ ಹಾಗೂ ಕೋಮಾ ಸ್ಥಿತಿ.

ಈ ಸೋಂಕು ಅತ್ಯಂತ ಅಪರೂಪವಾದರೂ ಶೇ. 97 ಕ್ಕಿಂತ ಹೆಚ್ಚು ಮರಣ ಪ್ರಮಾಣವನ್ನು ಹೊಂದಿದೆ. ಸಿಹಿ ನೀರಿನ ಕೆರೆ ಅಥವಾ ನದಿಗಳಲ್ಲಿ ಈಜುವಾಗ ಮೂಗಿಗೆ ಕ್ಲಿಪ್ ಧರಿಸುವುದು ಅಥವಾ ತಲೆಯನ್ನು ನೀರಿನ ಮೇಲಿಡುವುದು ಸೂಕ್ತ ಎಂದು ತಜ್ಞರು ಎಚ್ಚರಿಸಿದ್ದಾರೆ