ಬಾಲಿವುಡ್‌ನ ಪಾಕಿಸ್ತಾನ ಪ್ರೇಮ ಹಾಗೂ ನಕಲಿ ಕಾಳಜಿ ಬಯಲು: ನಾಸಿರುದ್ದೀನ್ ಶಾಗೆ ಕಂಗನಾ ತಿರುಗೇಟು!

ನವದೆಹಲಿ: ಹಿರಿಯ ನಟ ನಾಸಿರುದ್ದೀನ್ ಶಾ ಅವರನ್ನು ‘ಲೋಮ್ಡಿ’ (ನರಿ) ಎಂದು ಕರೆದಿರುವುದನ್ನು ಸಮರ್ಥಿಸಿಕೊಂಡಿರುವ ಬಿಜೆಪಿ ಸಂಸದೆ ಹಾಗೂ ನಟಿ ಕಂಗನಾ ರಣಾವತ್, ಬಾಲಿವುಡ್‌ಗೆ ಪಾಕಿಸ್ತಾನದ ಮೇಲೆ ಇರುವ ‘ಅತಿಯಾದ ಪ್ರೇಮ’ ಮತ್ತು ಚಿತ್ರರಂಗದ ದ್ವಿಮುಖ ನೀತಿಯನ್ನು ತೀವ್ರವಾಗಿ ತೊಳೆಯಲಿದ್ದಾರೆ.

ವಿದ್ಯಾರ್ಥಿ ಪ್ರತಿಭಟನೆಗಳ ಕುರಿತು ಬಾಲಿವುಡ್‌ ತಾರೆಯರ ಮೌನವನ್ನು ಪ್ರಶ್ನಿಸಿದ್ದ ನಾಸಿರುದ್ದೀನ್ ಶಾ, “ಬಾಯಿಯಲ್ಲಿ ಮೂಳೆ ಇರುವ ನಾಯಿ ಬೊಗಳಲು ಸಾಧ್ಯವಿಲ್ಲ” ಎಂದು ವ್ಯಂಗ್ಯವಾಡಿದ್ದರು. ಈ ಹೇಳಿಕೆಗೆ ತಿರುಗೇಟು ನೀಡಿದ್ದ ಕಂಗನಾ, “ಇಂದಿನ ಕಾಲದಲ್ಲಿ ನಾಯಿ ಎನಿಸಿಕೊಳ್ಳುವುದು ಮೆಚ್ಚುಗೆಯ ವಿಷಯ, ಏಕೆಂದರೆ ನಿಷ್ಠೆ ಮತ್ತು ಮುಗ್ಧತೆ ಅಪರೂಪವಾಗಿದೆ. ನಾಸಿರುದ್ದೀನ್ ಅವರಂತೆ ನರಿಯಾಗುವುದಕ್ಕಿಂತ ನಾಯಿಯಾಗಿರುವುದೇ ಲೇಸು” ಎಂದು ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿದ್ದರು.

ಮಾಧ್ಯಮ ಸಂಸ್ಥೆ ANI ಜೊತೆ ಮಾತನಾಡಿದ ಕಂಗನಾ, “ಚಲನಚಿತ್ರಗಳು, ಸಂದರ್ಶನಗಳು ಅಥವಾ ಹೇಳಿಕೆಗಳು – ಬಾಲಿವುಡ್‌ನ ಈ ಪಾಕಿಸ್ತಾನಿ ಪ್ರೇಮ ಕಥೆ ಯಾವಾಗ ಕೊನೆಗೊಳ್ಳುತ್ತದೆ? ವಿಭಜನೆಯಾಗಿ ಇಷ್ಟೊಂದು ವರ್ಷಗಳಾದರೂ ಅವರ ಆಸಕ್ತಿ ಮುಗಿಯುತ್ತಿಲ್ಲ ಏಕೆ?” ಎಂದು ಪ್ರಶ್ನಿಸಿದ್ದಾರೆ.

ಜೊತೆಗೆ, ಜಾರ್ಖಂಡ್‌ನಲ್ಲಿ ಉದ್ಯೋಗಾಕಾಂಕ್ಷಿಗಳ ಮೇಲಿನ ಪೊಲೀಸ್ ಲಾಠಿಚಾರ್ಜ್ ಮತ್ತು ಅಶ್ರುವಾಯು ಪ್ರಯೋಗದ ಬಗ್ಗೆ ಪ್ರಸ್ತಾಪಿಸಿದ ಅವರು, ದೆಹಲಿಯ ಪ್ರತಿಭಟನೆಗಳ ವೇಳೆ ‘ಮೊಸಳೆ ಕಣ್ಣೀರು’ ಸುರಿಸಿದ್ದ ಬಾಲಿವುಡ್ ಕಲಾವಿದರು, ಜಾರ್ಖಂಡ್ ವಿದ್ಯಾರ್ಥಿಗಳ ಸಂಕಷ್ಟದ ಬಗ್ಗೆ ಏಕೆ ಮೌನವಾಗಿದ್ದಾರೆ ಎಂದು ಬಾಲಿವುಡ್‌ನ ದ್ವಿಮುಖ ನೀತಿಯನ್ನು ತೀವ್ರವಾಗಿ ಖಂಡಿಸಿದ್ದಾರೆ.