ಪಾನ್ ಮಸಾಲಾ ಪ್ರಿಯರೇ ಎಚ್ಚರ! ಪ್ಯಾಕಿಂಗ್ ನಿಯಮ ಬದಲಿಸಿದ ಕೇಂದ್ರ ಸರ್ಕಾರ, ಕಾಗದ, ಟಿನ್, ಗ್ಲಾಸ್ ಕಂಟೇನರ್ ಕಡ್ಡಾಯ!

ನವದೆಹಲಿ: ಭಾರತೀಯ ಆಹಾರ ಭದ್ರತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಪಾನ್ ಮಸಾಲಾ ಪ್ಯಾಕಿಂಗ್‌ನಲ್ಲಿ ಬಳಸಲಾಗುವ ಪ್ಲಾಸ್ಟಿಕ್ ಕವರ್‌ಗಳ ಮೇಲೆ ಕಟ್ಟುನಿಟ್ಟಿನ ನಿಷೇಧ ಹೇರಿದೆ.

ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದ ಅಡಿಯಲ್ಲಿ ಬರುವ FSSAI, ಹೊಸ ನಿಯಮಗಳ ಪ್ರಕಾರ ಪಾನ್ ಮಸಾಲಾ ತಯಾರಕರು ಇನ್ಮುಂದೆ ಪ್ಲಾಸ್ಟಿಕ್ ರಹಿತ ಕಾಗದ, ಪೇಪರ್‌ಬೋರ್ಡ್, ಸೆಲ್ಯುಲೋಸ್, ನೈಸರ್ಗಿಕ ವಸ್ತುಗಳು, ಟಿನ್ ಅಥವಾ ಗ್ಲಾಸ್ ಬಾಟಲಿಗಳನ್ನು ಮಾತ್ರ ಪ್ಯಾಕಿಂಗ್‌ಗೆ ಬಳಸಬೇಕೆಂದು ಆದೇಶಿಸಿದೆ.

ಆಹಾರ ಭದ್ರತೆ ಮತ್ತು ಗುಣಮಟ್ಟ (ಪ್ಯಾಕೇಜಿಂಗ್) ತಿದ್ದುಪಡಿ ನಿಯಮಾವಳಿಗಳು, 2026ರ ಅಡಿಯಲ್ಲಿ ಈ ಹೊಸ ನಿಯಮವನ್ನು ಗೆಜೆಟ್ ನೋಟಿಫಿಕೇಶನ್ ಮೂಲಕ ಹೊರಡಿಸಲಾಗಿದೆ. ಈ ನಿಯಮದ ಪ್ರಕಾರ, ಪಾಲಿಥಿನ್, ಪಾಲಿಪ್ರೊಪಿಲೀನ್, PVC ಅಥವಾ ಯಾವುದೇ ಸಿಂಥೆಟಿಕ್ ಲ್ಯಾಮಿನೇಟ್‌ಗಳನ್ನು ಒಳಗೊಂಡ ಕವರ್‌ಗಳನ್ನು ಬಳಸುವಂತಿಲ್ಲ. ಅಷ್ಟೇ ಅಲ್ಲದೆ, ಕಾಗದದ ಒಳಭಾಗದಲ್ಲಿ ಅಲ್ಯೂಮಿನಿಯಂ ಫಾಯಿಲ್ ಅಥವಾ ಮೆಟಲೈಸ್ಡ್ ಲೇಯರ್‌ಗಳನ್ನು ಹೊಂದಿರುವ ಪ್ಯಾಕಿಂಗ್‌ ಕೂಡ ಸಂಪೂರ್ಣವಾಗಿ ನಿಷೇಧಕ್ಕೊಳಗಾಗಿದೆ.

ಈ ಹೊಸ ಆದೇಶವು ತಕ್ಷಣದಿಂದಲೇ ಜಾರಿಗೆ ಬಂದಿದ್ದು, ಸಾರ್ವಜನಿಕರ ಸಲಹೆ ಮತ್ತು ಆಕ್ಷೇಪಣೆಗಳನ್ನು ಪರಿಶೀಲಿಸಿದ ನಂತರವೇ ಅಂತಿಮ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು FSSAI ತಿಳಿಸಿದೆ. ಗಮನಿಸಬೇಕಾದ ಅಂಶವೆಂದರೆ, ಇದು ಪಾನ್ ಮಸಾಲಾ ಉತ್ಪನ್ನದ ಮೇಲಿನ ನಿಷೇಧವಲ್ಲ, ಬದಲಿಗೆ ಪರಿಸರಕ್ಕೆ ಹಾನಿಯುಂಟು ಮಾಡುವ ಪ್ಲಾಸ್ಟಿಕ್ ಪ್ಯಾಕೇಜಿಂಗ್ ಮೇಲಿನ ನಿಷೇಧವಾಗಿದೆ.