
ನ್ಯೂಯಾರ್ಕ್ (ಅಮೆರಿಕ): ಅಮೆರಿಕದ ಉನ್ನತ ರಾಜಕೀಯ ನಾಯಕರು ಹಾಗೂ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಹತ್ಯೆ ಮಾಡಲು ಇರಾನ್ ನಂಟಿನೊಂದಿಗೆ ಸಂಚು ರೂಪಿಸಿದ್ದ ಪಾಕಿಸ್ತಾನಿ ಉದ್ಯಮಿ ಆಸಿಫ್ ಮೆರ್ಚೆಂಟ್ಗೆ (48) ನ್ಯೂಯಾರ್ಕ್ ನ್ಯಾಯಾಲಯವು 27 ವರ್ಷಗಳಿಗೂ ಅಧಿಕ ಕಾಲ ಜೈಲು ಶಿಕ್ಷೆ ವಿಧಿಸಿ ತೀರ್ಪು ನೀಡಿದೆ. ಮಂಗಳವಾರ ನಡೆದ ವಿಚಾರಣೆಯಲ್ಲಿ ಯುಎಸ್ ಜಿಲ್ಲಾ ನ್ಯಾಯಾಧೀಶ ಎರಿಕ್ ಕೊಮಿಟೆ ಈ ಮಹತ್ವದ ತೀರ್ಪು ಪ್ರಕಟಿಸಿದ್ದಾರೆ.
ವಿಚಾರಣೆ ವೇಳೆ ಬಹಿರಂಗಗೊಂಡ ಮಾಹಿತಿಯಂತೆ, ಇರಾನ್ನ ಕ್ರಾಂತಿಕಾರಿ ಗಾರ್ಡ್ನ ಪ್ರೇರಣೆಯಿಂದ ಮೆರ್ಚೆಂಟ್ ಈ ಹತ್ಯಾಕಾಂಡದ ಸಂಚಿನಲ್ಲಿ ಭಾಗಿಯಾಗಿದ್ದನು. ಅಮೆರಿಕದ ಪ್ರಮುಖ ನಾಯಕರಾದ ಡೊನಾಲ್ಡ್ ಟ್ರಂಪ್, ಮಾಜಿ ಅಧ್ಯಕ್ಷ ಜೋ ಬೈಡೆನ್ ಹಾಗೂ ಮಾಜಿ ರಾಯಭಾರಿ ನಿಕಿ ಹ್ಯಾಲೆ ಅವರನ್ನು ಗುರಿಯಾಗಿಸಲು ಸಂಚು ರೂಪಿಸಲಾಗಿತ್ತು. ಆದರೆ ಇರಾನ್ ಸರ್ಕಾರವು ಈ ಆರೋಪವನ್ನು ತಳ್ಳಿಹಾಕಿದೆ.
ಗುಪ್ತಚರ ಬಲೆಗೆ ಬಿದ್ದ ಆರೋಪಿ: ಅಮೆರಿಕಕ್ಕೆ ಪ್ರವೇಶಿಸಿದ ಆಸಿಫ್ ಮೆರ್ಚೆಂಟ್, ತಾನು ಬಾಡಿಗೆ ಹತ್ಯೆಗಳಿಗೆಸಹಾಯ ಮಾಡುವವನೆಂದು ನಂಬಿಸಿ ಎಫ್ಬಿಐ (FBI) ಅಂಡರ್ಕವರ್ ಏಜೆಂಟ್ಗಳನ್ನು ಸಂಪರ್ಕಿಸಿ 5,000 ಡಾಲರ್ಗಳನ್ನು ಮುಂಗಡವಾಗಿ ನೀಡಿದ್ದನು.
ಸಾಕ್ಷ್ಯಾಧಾರಗಳು ಮತ್ತು ಬಂಧನ: ಟ್ರಂಪ್ ಅವರ ಚುನಾವಣಾ ರ್ಯಾಲಿಗಳ ಸ್ಥಳಗಳನ್ನು ಪರಿಶೀಲಿಸಿದ್ದ ಮೆರ್ಚೆಂಟ್, ಹೋಟೆಲ್ ನ್ಯಾಪ್ಕಿನ್ ಮೇಲೆ ದಾಳಿಯ ನಕ್ಷೆ ಬಿಡಿಸಿ ವಿವರಿಸಿದ್ದನು. ಆತನ ಪರಿಚಯಸ್ಥರೊಬ್ಬರು ನೀಡಿದ ಮಾಹಿತಿಯ ಮೇರೆಗೆ ಜುಲೈ 12, 2024 ರಂದು ಪಾಕಿಸ್ತಾನಕ್ಕೆ ಪರಾರಿಯಾಗಲು ಯತ್ನಿಸುತ್ತಿದ್ದಾಗ ಆತನನ್ನು ಬಂಧಿಸಲಾಗಿತ್ತು.
ಇದು ಅತ್ಯಂತ ಗಂಭೀರ ಅಪರಾಧವಾಗಿದ್ದು, ಅಮೆರಿಕದ ಅಧ್ಯಕ್ಷ ಅಥವಾ ಹಿರಿಯ ಅಧಿಕಾರಿಗಳ ಮೇಲಿನ ಗುರಿಪೂರ್ವಕ ಹತ್ಯೆಯ ಸಂಚನ್ನು ಸಹಿಸಲು ಸಾಧ್ಯವಿಲ್ಲ ಎಂದು ನ್ಯಾಯಾಧೀಶರು ಅಭಿಪ್ರಾಯಪಟ್ಟಿದ್ದಾರೆ.
ಆರೋಪಿಯ ಪರ ವಕೀಲರು ಆಸಿಫ್ ಮೆರ್ಚೆಂಟ್ ತನ್ನ ಕುಟುಂಬದ ಮೇಲಿನ ಬೆದರಿಕೆಯಿಂದಾಗಿ ಈ ಕೃತ್ಯಕ್ಕೆ ಮುಂದಾಗಿದ್ದ ಎಂದು ವಾದಿಸಿದರೂ, ಪ್ರಾಸಿಕ್ಯೂಷನ್ ಇದನ್ನು ತಿರಸ್ಕರಿಸಿದ್ದು, ಆತ ಅಮೆರಿಕ ವಿರೋಧಿ ಪೋಸ್ಟ್ಗಳನ್ನು ಹಂಚಿಕೊಂಡಿರುವುದನ್ನು ನ್ಯಾಯಾಲಯದ ಮುಂದೆ ಸಾಬೀತುಪಡಿಸಿದೆ.




