ಥೈಲ್ಯಾಂಡ್‌ನಲ್ಲಿ ಶಾಕಿಂಗ್‌ ಘಟನೆ: ಪ್ರೇಯಸಿ ಜೊತೆ ರಸಲೀಲೆಯಲ್ಲಿ ಸಿಕ್ಕಿಬಿದ್ದ ಬೌದ್ಧ ಸನ್ಯಾಸಿ: 29 ಕೋಟಿ ರೂ. ಮಠದ ಹಣ ಗುಳುಂ!

ಥೈಲ್ಯಾಂಡ್: ಥೈಲ್ಯಾಂಡ್‌ನ ಪ್ರಸಿದ್ಧ ಬೌದ್ಧ ಮಠವೊಂದರಲ್ಲಿ ಭಾರಿ ಅಕ್ರಮ ಮತ್ತು ನೈತಿಕ ಪತನದ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಮಠದ ಅಭಿವೃದ್ಧಿಗೆ ಮತ್ತು ಧಾರ್ಮಿಕ ಕಾರ್ಯಗಳಿಗೆ ಬಂದಿದ್ದ ಕೋಟ್ಯಂತರ ರೂಪಾಯಿ ದೇಣಿಗೆಯನ್ನು ದುರುಪಯೋಗಪಡಿಸಿಕೊಂಡ ಆರೋಪದ ಮೇಲೆ 66 ವರ್ಷದ ಹಿರಿಯ ಬೌದ್ಧ ಸನ್ಯಾಸಿ ಫ್ರಾ ವಾಚಿರಾಯನ್ ವಿ  ಹಾಗೂ ಅವರ 47 ವರ್ಷದ ಮಹಿಳಾ ಸಹಚರಿ ಪುಣ್ಯವೀ ರಂಗ್‌ರುಯಾಂಗ್  ಅವರನ್ನು ಪೊಲೀಸರು ಬಂಧಿಸಿದ್ದಾರೆ.

ಪ್ರಕರಣದ ಮುಖ್ಯ ವಿವರಗಳು:

ದೇಣಿಗೆ ಹಣ ದುರುಪಯೋಗ: ಅಯೋಧ್ಯೆ ಪ್ರಾಂತ್ಯದ ಐತಿಹಾಸಿಕ ವಾಟ್ ಫುಟ್ಟೈಸವಾನ್ ರಾಜಮಠದ ಮಾಜಿ ಪೀಠಾಧಿಪತಿಯಾಗಿದ್ದ ಫ್ರಾ ವಾಚಿರಾಯನ್, ಮಠದ ಜೀರ್ಣೋದ್ಧಾರ ಮತ್ತು ಯಂತ್ರ-ತಾಯತಗಳ  ಮಾರಾಟದಿಂದ ಬಂದಿದ್ದ ಸುಮಾರು 100 ಮಿಲಿಯನ್ ಭಾಟ್ (ಸುಮಾರು 29 ಕೋಟಿ ರೂಪಾಯಿ) ಹಣವನ್ನು ಮಠದ ಅಧಿಕೃತ ಖಾತೆಗೆ ಜಮಾ ಮಾಡದೆ ಸ್ವಂತಕ್ಕೆ ಬಳಸಿಕೊಂಡಿದ್ದಾರೆ.

ಸಿಸಿಟಿವಿ ರಸಲೀಲೆ ದೃಶ್ಯಾವಳಿ: ಹಣಕಾಸು ವಂಚನೆ ಕುರಿತು ತನಿಖೆ ನಡೆಸಲು ಮಠಕ್ಕೆ ಆಗಮಿಸಿದ ಪೊಲೀಸರಿಗೆ ಸನ್ಯಾಸಿಯ ನಿವಾಸದಲ್ಲಿದ್ದ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಆಘಾತಕಾರಿ ಸತ್ಯ ಗೊತ್ತಾಗಿದೆ. ಸನ್ಯಾಸಿ ಮತ್ತು ಆತನ ಪ್ರೇಯಸಿ ಪುಣ್ಯವೀ ನಡುವಿನ ಆಕ್ಷೇಪಾರ್ಹ ದೃಶ್ಯಗಳು ಸಿಸಿಟಿವಿಯಲ್ಲಿ ಸೆರೆಯಾಗಿದ್ದವು.

ಸನ್ಯಾಸಿತ್ವದಿಂದ ವಜಾ: ಘಟನೆ ಹೊರಬೀಳುತ್ತಿದ್ದಂತೆ ಥೈಲ್ಯಾಂಡ್ ಧಾರ್ಮಿಕ ನಿಯಮಾವಳಿಗಳಂತೆ ಅವರನ್ನು ತಕ್ಷಣವೇ ಸನ್ಯಾಸಿತ್ವದಿಂದ ವಜಾಗೊಳಿಸಲಾಗಿದೆ (Defrocked).

ಕೋಟಿ ಕೋಟಿ ಆಸ್ತಿ ಜಪ್ತಿ: ಪೊಲೀಸರು ಸನ್ಯಾಸಿಯ ನಿವಾಸದ ಮೇಲೆ ದಾಳಿ ನಡೆಸಿದಾಗ 16 ಕೆಜಿ ಚಿನ್ನದ ಗಟ್ಟಿಗಳು, ಬೆಲೆಬಾಳುವ ಆಭರಣಗಳು ಹಾಗೂ 28 ಭೂಮಿ ಹಕ್ಕುಪತ್ರಗಳು (Land Title Deeds) ಸೇರಿದಂತೆ ಒಟ್ಟು 215 ಮಿಲಿಯನ್ ಭಾಟ್ (ಸುಮಾರು 50 ಕೋಟಿಗೂ ಹೆಚ್ಚು ರೂ.) ಮೌಲ್ಯದ ಆಸ್ತಿಯನ್ನು ಜಪ್ತಿ ಮಾಡಿದ್ದಾರೆ.

ಹಿನ್ನೆಲೆ:

ವಾಟ್ ಫುಟ್ಟೈಸವಾನ್ ಮಠವು ಥೈಲ್ಯಾಂಡ್ ರಾಜಕಾರಣಿಗಳು, ಉದ್ಯಮಿಗಳು ಹಾಗೂ ಉನ್ನತ ಪೊಲೀಸ್ ಅಧಿಕಾರಿಗಳ ನೆಚ್ಚಿನ ಧಾರ್ಮಿಕ ಕೇಂದ್ರವಾಗಿತ್ತು. ಈ ಹಿಂದೆ ಕೂಡ ಥೈಲ್ಯಾಂಡ್‌ನಲ್ಲಿ ಮಹಿಳೆಯೊಬ್ಬಳು 11ಕ್ಕೂ ಹೆಚ್ಚು ಬೌದ್ಧ ಸನ್ಯಾಸಿಗಳನ್ನು ಬ್ಲ್ಯಾಕ್‌ಮೇಲ್ ಮಾಡಿ ಕೋಟ್ಯಂತರ ಹಣ ದೋಚಿದ ಪ್ರಕರಣ ನಡೆದಿತ್ತು. ಪ್ರಸ್ತುತ ಘಟನೆಯು ದೇಶಾದ್ಯಂತ ಸಾರ್ವಜನಿಕರಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.