ಇಯರ್‌ಫೋನ್ ಧರಿಸಿ ರೈಲು ಹಳಿ ದಾಟುತ್ತಿದ್ದ 17 ವರ್ಷದ ಬಾಲಕ ರೈಲು ಡಿಕ್ಕಿ ಹೊಡೆದು ಸಾವು!

ಹೈದರಾಬಾದ್: ತೆಲಂಗಾಣದ ಸಿಕಂದರಬಾದ್‌ನ ಬೋಲಾರಂ ರೈಲು ನಿಲ್ದಾಣದ ಬಳಿ ರೈಲು ಹಳಿ ದಾಟುತ್ತಿದ್ದ ವೇಳೆ ರೈಲು ರಿದು 17 ವರ್ಷದ ಬಾಲಕ ದಾರುಣವಾಗಿ ಸಾವನ್ನಪ್ಪಿರುವ ಘಟನೆ ನಡೆದಿದೆ.

ಮೃತನನ್ನು ಸಿಕಂದರಬಾದ್‌ನ ಅಲ್ವಾಲ್‌ನ ತುರ್ಕಪಲ್ಲಿ ಗ್ರಾಮದ ನಿವಾಸಿ ತೋಳುಚುರಿ ವಿವೇಕ್ ಎಂದು ಗುರುತಿಸಲಾಗಿದೆ. ಘಟನಾ ಸ್ಥಳದಲ್ಲಿ ಬಿಳಿ ಬಣ್ಣದ ಇಯರ್‌ಫೋನ್ ಪತ್ತೆಯಾಗಿದ್ದು, ಬಾಲಕ ಇಯರ್‌ಫೋನ್ ಧರಿಸಿ ಹಾಡು ಕೇಳುತ್ತಾ ಹಳಿ ದಾಟುತ್ತಿದ್ದಾಗ ಈ ದುರ್ಘಟನೆ ಸಂಭವಿಸಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಘಟನೆ ಕುರಿತು ಮಾಹಿತಿ ಪಡೆದ ತಕ್ಷಣ ರೈಲ್ವೆ ರಕ್ಷಣಾ ಪಡೆ (RPF) ಮತ್ತು ಸರ್ಕಾರಿ ರೈಲ್ವೆ ಪೊಲೀಸರು (GRP) ಸ್ಥಳಕ್ಕೆ ಧಾವಿಸಿ ಪರಿಶೀಲನೆ ನಡೆಸಿದ್ದಾರೆ. ಮೃತನ ಬಳಿಯಿದ್ದ ಐಫೋನ್ 16 ಪ್ರೊ ಮ್ಯಾಕ್ಸ್ (iPhone 16 Pro Max) ಮೊಬೈಲ್ ಅನ್ನು ವಶಪಡಿಸಿಕೊಳ್ಳಲಾಗಿದೆ. ಬಾಲಕನ ತಂದೆ ಕೃಷ್ಣಮೂರ್ತಿ ಅವರು ಮೃತದೇಹವನ್ನು ಗುರುತಿಸಿದ್ದು, ಸಾವಿನ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ ಹಿನ್ನೆಲೆಯಲ್ಲಿ ಪೊಲೀಸರು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದ್ದಾರೆ. ಸಿಸಿಟಿವಿಯಲ್ಲಿ ಬಾಲಕ ಇಯರ್‌ಫೋನ್ ಧರಿಸಿ ರೈಲು ಹಳಿಗಳ ಮೇಲೆ ಅನಧಿಕೃತವಾಗಿ ನಡೆದುಕೊಂಡು ಹೋಗುತ್ತಿರುವುದು ಸ್ಪಷ್ಟವಾಗಿದೆ.

ಘಟನೆಯ ಹಿನ್ನೆಲೆ: ಸಿಕಂದರಬಾದ್ ನ ಬೋಲಾರಂ ರೈಲು ನಿಲ್ದಾಣದ ಬಳಿ ರೈಲು ಹರಿದು 17 ವರ್ಷದ ತೋಳುಚುರಿ ವಿವೇಕ್ ಸಾವು.

ಪ್ರಮುಖ ಸಾಕ್ಷ್ಯ: ಬಾಲಕನ ಬಳಿ ಐಫೋನ್ 16 ಪ್ರೊ ಮ್ಯಾಕ್ಸ್ ಪತ್ತೆ, ಸ್ಥಳದಲ್ಲಿ ಬಿಳಿ ಬಣ್ಣದ ಇಯರ್‌ಫೋನ್‌ಗಳು ದೊರೆತಿವೆ.

ಪೊಲೀಸ್ ಎಚ್ಚರಿಕೆ: ರೈಲು ಹಳಿಗಳ ಮೇಲೆ ನಡೆಯುವುದು ಅಪರಾಧ ಹಾಗೂ ಅಪಾಯಕಾರಿ ಎಂದು ಹೈದರಾಬಾದ್ ಪೊಲೀಸರಿಂದ ಎಚ್ಚರಿಕೆ.

ಅನಧಿಕೃತವಾಗಿ ರೈಲು ಹಳಿಗಳನ್ನು ದಾಟುವುದು ಮತ್ತು ಇಯರ್‌ಫೋನ್ ಬಳಕೆಯೇ ಈ ಅಪಘಾತಕ್ಕೆ ಪ್ರಮುಖ ಕಾರಣ ಎಂದು ರೈಲ್ವೆ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಬಿಎನ್‌ಎಸ್‌ಎಸ್ (BNSS) ಸೆಕ್ಷನ್ 194 ರ ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದ್ದು, ರೈಲು ಹಳಿಗಳ ಬಳಿ ಯುವಕರು ಮತ್ತು ಸಾರ್ವಜನಿಕರು ಮೊಬೈಲ್ ಅಥವಾ ಇಯರ್‌ಫೋನ್ ಬಳಸದಂತೆ ಎಚ್ಚರಿಕೆ ನೀಡಲಾಗಿದೆ.