ಜಿಮ್‌ಗೆ ಹೋಗದೆ 25 ಕೆಜಿ ತೂಕ ಇಳಿಸಿದ ಯುವತಿ: ಇಲ್ಲಿದೆ ಮನೆಯಲ್ಲೇ ಮಾಡುವ ಸಿಂಪಲ್ ವರ್ಕೌಟ್ ರೂಟಿನ್!

ನವದೆಹಲಿ: ದೇಹದ ತೂಕ ಇಳಿಸಿಕೊಳ್ಳಲು ಮತ್ತು ಫಿಟ್‌ನೆಸ್ ಕಾಯ್ದುಕೊಳ್ಳಲು ಜಿಮ್‌ಗೆ ಹೋಗಿ ಬೆವರು ಹರಿಸಲೇಬೇಕು ಎಂದೇನೂ ಇಲ್ಲ. ಸೂಕ್ತ ಜೀವನಶೈಲಿ ಹಾಗೂ ಮನೆಯಲ್ಲೇ ಮಾಡುವ ಕೆಲವೇ ಸರಳ ವ್ಯಾಯಾಮಗಳ ಮೂಲಕವೂ ಅಚ್ಚರಿ ಮೂಡಿಸುವ ರೀತಿಯಲ್ಲಿ ತೂಕ ಇಳಿಸಿಕೊಳ್ಳಬಹುದು ಎಂಬುದನ್ನು ಯೋಗ ತರಬೇತುದಾರೆ ಹಾಗೂ ಕಂಟೆಂಟ್ ಕ್ರಿಯೇಟರ್ ಸಾಕ್ಷಿ ಯಾದವ್ ನಿರೂಪಿಸಿದ್ದಾರೆ.

ಸಾಕ್ಷಿ ಯಾದವ್ ಅವರು ಕೇವಲ 6 ತಿಂಗಳ ಅವಧಿಯಲ್ಲಿ ಯಾವುದೇ ಜಿಮ್‌ಗೆ ಹೋಗದೆ, ತಮ್ಮ ತೂಕವನ್ನು 80 ಕೆಜಿಯಿಂದ 55 ಕೆಜಿಗೆ ಇಳಿಸಿಕೊಳ್ಳುವ ಮೂಲಕ ಬರೋಬ್ಬರಿ 25 ಕೆಜಿ ತೂಕ ಕಳೆದುಕೊಂಡಿದ್ದಾರೆ.

ತಮ್ಮ ಈ ಫಿಟ್‌ನೆಸ್ ಪಯಣದ ಕುರಿತು ಇನ್‌ಸ್ಟಾಗ್ರಾಮ್‌ನಲ್ಲಿ ವಿಡಿಯೋ ಹಂಚಿಕೊಂಡಿರುವ ಅವರು, ತಮ್ಮ ಕೆಳ ಭಾಗದ ಕೊಬ್ಬು ಕರಗಿಸಲು ತಾವು ಅನುಸರಿಸಿದ ‘ಬಾಡಿವೇಟ್ ವರ್ಕೌಟ್’ ಕುರಿತು ಮಾಹಿತಿ ನೀಡಿದ್ದಾರೆ.

ಲೋಯರ್ ಬಾಡಿ ವರ್ಕೌಟ್ ರೂಟಿನ್:

ಸಾಕ್ಷಿ ಅವರ ಪ್ರಕಾರ, ಯಾವುದೇ ಉಪಕರಣಗಳ ಅಗತ್ಯವಿಲ್ಲದೇ ಮನೆಯಲ್ಲೇ ಮಾಡಬಹುದಾದ ನಾಲ್ಕು ಪ್ರಮುಖ ವ್ಯಾಯಾಮಗಳು ಇಲ್ಲಿವೆ:

ಜಂಪಿಂಗ್ ಜ್ಯಾಕ್ಸ್ : 30 ಬಾರಿ (4 ಸೆಟ್‌ಗಳು).

ಹೈ ನೀಸ್: 30 ಬಾರಿ (4 ಸೆಟ್‌ಗಳು).

ಸ್ಕ್ವಾಟ್ಸ್ : 25 ಬಾರಿ (3 ಸೆಟ್‌ಗಳು). ಇದರ ಜೊತೆಗೆ ಸುಧಾರಿತ ಹಂತದ ‘ಸ್ಕ್ವಾಟ್ ಪಲ್ಸ್’ (30×3) ಮತ್ತು ‘ಸ್ಕ್ವಾಟ್ ಜಂಪ್ಸ್’ (20×3).

ಲಂಜಸ್: 20 ಬಾರಿ (3 ಸೆಟ್‌ಗಳು) ಅಥವಾ ‘ಜಂಪಿಂಗ್ ಲಂಜಸ್’ (15×3) ಹಾಗೂ ‘ಸ್ಕ್ವಾಟ್ ವಾಕ್ಸ್’.

ದೇಹದ ಆರೋಗ್ಯಕ್ಕೆ ಬಾಡಿವೇಟ್ ವರ್ಕೌಟ್:

ಸ್ಕ್ವಾಟ್ಸ್ ಮತ್ತು ಲಂಜಸ್‌ನಂತಹ ವ್ಯಾಯಾಮಗಳು ಕೆಳಬದಿಯ ಸ್ನಾಯುಗಳನ್ನು ಬಲಪಡಿಸಿದರೆ, ಜಂಪಿಂಗ್ ಜ್ಯಾಕ್ಸ್‌ನಂತಹ ಚಟುವಟಿಕೆಗಳು ಕಾರ್ಡಿಯೋ ಸಾಮರ್ಥ್ಯವನ್ನು ಹೆಚ್ಚಿಸುತ್ತವೆ. ಸರಿಯಾದ ಪೋಷಕಾಂಶಯುಕ್ತ ಆಹಾರ ಹಾಗೂ ನಿಯಮಿತ ದೈಹಿಕ ಚಟುವಟಿಕೆಯು ತೂಕ ನಿಯಂತ್ರಣಕ್ಕೆ ನೆರವಾಗುತ್ತದೆ.

ಗಮನಿಸಬೇಕಾದ ಅಂಶ:

ಯಾವುದೇ ಒಂದೇ ರೀತಿಯ ವ್ಯಾಯಾಮ ಪ್ರತಿಯೊಬ್ಬರ ದೇಹಕ್ಕೂ ಒಂದೇ ರೀತಿ ಕೆಲಸ ಮಾಡುವುದಿಲ್ಲ. ತೂಕ ಇಳಿಕೆಯು ವ್ಯಕ್ತಿಯ ಆಹಾರ ಪದ್ಧತಿ, ನಿದ್ರೆ, ಮೆಟಬಾಲಿಸಮ್ ಮತ್ತು ದೈಹಿಕ ಸ್ಥಿತಿಯನ್ನು ಅವಲಂಬಿಸಿರುತ್ತದೆ. ಹೀಗಾಗಿ ಹೊಸ ವರ್ಕೌಟ್ ಆರಂಭಿಸುವ ಮುನ್ನ ಸರಿಯಾದ ಶೈಲಿ  ತಿಳಿದುಕೊಳ್ಳುವುದು ಮತ್ತು ಆರೋಗ್ಯ ತಜ್ಞರ ಸಲಹೆ ಪಡೆಯುವುದು ಸೂಕ್ತ.