ದೆಹಲಿ ಕೆಂಪುಕೋಟೆ ಸ್ಫೋಟ ಪ್ರಕರಣ: ಉಗ್ರನ ಮೊದಲ ಟಾರ್ಗೆಟ್ ಕೆಂಪುಕೋಟೆಯಲ್ಲ, ಜೈನ ದೇವಾಲಯ! ಎನ್​ಐಎ ಚಾರ್ಜ್‌ಶೀಟ್‌ನಲ್ಲಿ ಆಘಾತಕಾರಿ ಮಾಹಿತಿ!

ನವದೆಹಲಿ: 2025ರ ನವೆಂಬರ್ 10ರಂದು ದೇಶದ ರಾಜಧಾನಿ ದೆಹಲಿಯ ಐತಿಹಾಸಿಕ ಕೆಂಪುಕೋಟೆಯ ಬಳಿ ಸಂಭವಿಸಿದ ಭೀಕರ ಕಾರು ಸ್ಫೋಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ರಾಷ್ಟ್ರೀಯ ತನಿಖಾ ಸಂಸ್ಥೆ (NIA) ಸಲ್ಲಿಸಿರುವ ಚಾರ್ಜ್‌ಶೀಟ್‌ನಲ್ಲಿ ಅತ್ಯಂತ ಆಘಾತಕಾರಿ ವಿಷಯಗಳು ಹೊರಬಿದ್ದಿವೆ.

11 ಜನರ ಸಾವಿಗೆ ಕಾರಣವಾದ ಈ ಆತ್ಮಾಹುತಿ ದಾಳಿಯ ಸಂಚುಕೋರ ಉಮರ್ ಉನ್ ನಬಿಯ ಮೂಲ ಟಾರ್ಗೆಟ್ ಕೆಂಪುಕೋಟೆಯಾಗಿರಲಿಲ್ಲ, ಬದಲಿಗೆ ದೆಹಲಿಯ ಪ್ರಸಿದ್ಧ ಜೈನ ದೇವಾಲಯ ‘ಲಾಲ್ ಮಂದಿರ್’ ಆಗಿತ್ತು ಎಂಬ ಸತ್ಯ ತನಿಖೆಯಿಂದ ತಿಳಿದುಬಂದಿದೆ.

ಟ್ರಾಫಿಕ್‌ನಿಂದಾಗಿ ಕೆಂಪುಕೋಟೆಯತ್ತ ಯೂ-ಟರ್ನ್!

ಎನ್‌ಐಎ ತನಿಖಾ ವರದಿಯ ಪ್ರಕಾರ, ನವೆಂಬರ್ 10ರ ಸಾಯಂಕಾಲ 6:37ರ ಸುಮಾರಿಗೆ ಉಗ್ರ ಉಮರ್ ಉನ್ ನಬಿ ಸ್ಫೋಟಕ ತುಂಬಿದ ಐ20 (i20) ಕಾರನ್ನು ಚಲಾಯಿಸಿಕೊಂಡು ಚಾಂದಿನಿ ಚೌಕ್ ಬಳಿಯಿರುವ ಲಾಲ್ ಮಂದಿರ್ (ಜೈನ ದೇವಾಲಯ) ಹತ್ತಿರ ಪಾರ್ಕ್ ಮಾಡಲು ಯತ್ನಿಸಿದ್ದ. ಆದರೆ ಆ ಸಮಯದಲ್ಲಿ ಅತಿಯಾದ ವಾಹನ ದಟ್ಟಣೆ (Traffic) ಮತ್ತು ಪೊಲೀಸರ ಬಿಗಿ ಭದ್ರತೆ ಇದ್ದ ಕಾರಣ, ಆತನಿಗೆ ಅಲ್ಲಿ ಕಾರು ಪಾರ್ಕ್ ಮಾಡಲು ಸಾಧ್ಯವಾಗಲಿಲ್ಲ. ತಕ್ಷಣವೇ ಯೋಜನೆಯನ್ನು ಬದಲಿಸಿದ ಆತ, ಕಾರನ್ನು ಯೂ-ಟರ್ನ್ ತೆಗೆದುಕೊಂಡು ಕೆಂಪುಕೋಟೆಯತ್ತ ಸಾಗಿದನು. ತದನಂತರ ಸಂಜೆ 6:50ರ ವೇಳೆಗೆ ಕೆಂಪುಕೋಟೆಯ ಗೇಟ್ ಸಂಖ್ಯೆ 4ರ ಬಳಿ ಕಾರಿನೊಳಗಿದ್ದುಕೊಂಡೇ ಐಇಡಿ ಸಾಧನವನ್ನು ಸ್ಫೋಟಿಸಿದನು.

ಮೂತ್ರದಿಂದ ಯೂರಿಯಾ ತೆಗೆದು ಬಾಂಬ್ ತಯಾರಿಕೆ!

ಆರೋಪಿ ಉಮರ್ ಉನ್ ನಬಿ ವೃತ್ತಿಯಿಂದ ವೈದ್ಯನಾಗಿದ್ದು, ಹರ್ಯಾಣದ ನೂಹ್‌ನಲ್ಲಿ ಬಾಡಿಗೆ ಕೊಠಡಿಯೊಂದರಲ್ಲಿ ತಂಗಿದ್ದಾಗ ಸ್ಫೋಟಕಗಳನ್ನು ತಯಾರಿಸಿದ್ದನು. ಈತನ ಪೆನ್ ಡ್ರೈವ್‌ನಲ್ಲಿದ್ದ ಪಿಡಿಎಫ್‌ ದಾಖಲೆಗಳನ್ನು ಪರಿಶೀಲಿಸಿದಾಗ ‘ಯೂರಿಯಾ ನೈಟ್ರೇಟ್’ ಬಳಸಿ ಬಾಂಬ್ ಮಾಡುವ ವಿಧಾನ ಪತ್ತೆಯಾಗಿದೆ. ಸಾಕ್ಷಿಯೊಬ್ಬರ ಪ್ರಕಾರ, ಈತ ತನ್ನ ಕೊಠಡಿಯಲ್ಲಿ ಪ್ಲಾಸ್ಟಿಕ್ ಕವರ್‌ಗಳಲ್ಲಿ ಮೂತ್ರವನ್ನು ಸಂಗ್ರಹಿಸಿಡುತ್ತಿದ್ದನು, ಇದರಿಂದ ದುರ್ವಾಸನೆ ಬರುತ್ತಿತ್ತು. ಮೂತ್ರದಿಂದ ಯೂರಿಯಾವನ್ನು ಹೊರತೆಗೆದು ಬಾಂಬ್ ತಯಾರಿಸಲು ಈತ ಈ ವಿಚಿತ್ರ ಮತ್ತು ಭಯಾನಕ ಹಾದಿ ತುಳಿದಿದ್ದ ಎಂಬುದು ಎನ್‌ಐಎ ತನಿಖೆಯಿಂದ ಸಾಬೀತಾಗಿದೆ.

12 ಬಾರಿ ರೆಕ್ಕಿ ನಡೆಸಿದ್ದ ಉಗ್ರ:

ಉಮರ್ ನಬಿ 2023ರಿಂದ 2025ರ ಮಧ್ಯೆ ಒಟ್ಟು 12 ಬಾರಿ ಕೆಂಪುಕೋಟೆಯ ಆವರಣಕ್ಕೆ ಭೇಟಿ ನೀಡಿ ಸತತ ‘ರೆಕ್ಕಿ’ (ಪರಿಶೀಲನೆ) ನಡೆಸಿದ್ದನು. ತನಿಖಾ ಸಂಸ್ಥೆಗಳಿಗೆ ತಮ್ಮ ಡಿಜಿಟಲ್ ಹೆಜ್ಜೆಗುರುತು ಸಿಗದಂತೆ ಮಾಡಲು ಪ್ರತಿ ಬಾರಿ ಸ್ಥಳಕ್ಕೆ ಭೇಟಿ ನೀಡಿದಾಗಲೂ ತಮ್ಮ ಮೊಬೈಲ್ ಫೋನ್‌ಗಳನ್ನು ಸ್ವಿಚ್ ಆಫ್ ಮಾಡುತ್ತಿದ್ದರು. ಕೊನೆಗೆ ಕೃತ್ಯ ಎಸಗುವ ಮುನ್ನ ಆತ ಹೊಸ ಬಟ್ಟೆಗಳನ್ನು ನಗದಾಗಿ ಹಣ ನೀಡಿ ಖರೀದಿಸಿದ್ದನು. ಪ್ರಸ್ತುತ ಎನ್‌ಐಎ ಈ ಎಲ್ಲಾ ಪೋರೆನ್ಸಿಕ್ ಆಧಾರಗಳು ಮತ್ತು ಸಿಸಿಟಿವಿ ದೃಶ್ಯಾವಳಿಗಳನ್ನು ಆಧರಿಸಿ ಚಾರ್ಜ್‌ಶೀಟ್ ಸಿದ್ಧಪಡಿಸಿದೆ.