7 ದಿನಗಳ ಹಿಂದೆ ಕಣ್ಮರೆಯಾಗಿದ್ದ 17 ವರ್ಷದ ಅಪ್ರಾಪ್ತೆ ಶಿರಚ್ಛೇದಿತ ಶವ ಅರಣ್ಯದಲ್ಲಿ ಪತ್ತೆ: ಅಪಘಾತದಲ್ಲಿ ಶಂಕಿತ ಪ್ರೇಮಿ ಸಾವು, ಏನಿದು ಕೇಸ್?

ರಾಜಗಢ (ಮಧ್ಯಪ್ರದೇಶ): ಮಧ್ಯಪ್ರದೇಶದ ರಾಜಗಢ ಜಿಲ್ಲೆಯಲ್ಲಿ ಅತ್ಯಂತ ದಿಗಿಲುಗೊಳಿಸುವ ಮತ್ತು ಭೀಕರ ಘಟನೆಯೊಂದು ಬೆಳಕಿಗೆ ಬಂದಿದೆ. ಕಳೆದ ಸೆಪ್ಟೆಂಬರ್ 30ರಿಂದ ನಾಪತ್ತೆಯಾಗಿದ್ದ 17 ವರ್ಷದ ಅಪ್ರಾಪ್ತ ಬಾಲಕಿಯ ಶಿರಚ್ಛೇದಿತ ಶವ (ತಲೆ ಕಡಿದ ಸ್ಥಿತಿಯಲ್ಲಿ) ಮಲಾವರ್ ಪೊಲೀಸ್ ಠಾಣೆ ವ್ಯಾಪ್ತಿಯ ದಟ್ಟ ಅರಣ್ಯದಲ್ಲಿ ಪತ್ತೆಯಾಗಿದೆ.

ಘಟನೆಯ ವಿವರ:

ಸೆಪ್ಟೆಂಬರ್ 30ರಂದು ಬಾಲಕಿ ನಾಪತ್ತೆಯಾದ ಬಳಿಕ ಆಕೆಯ ಕುಟುಂಬಸ್ಥರು ಜಮೋನ್ಯಾ ಗಣೇಶ್ ನಿವಾಸಿ ‘ಅನುರಾಗ್ ಅಲಿಯಾಸ್ ಅಂಕಿತ್’ ಎಂಬುವವನು ಆಕೆಯನ್ನು ಕರೆದೊಯ್ದಿದ್ದಾನೆ ಎಂದು ಶಂಕಿಸಿ ಪೊಲೀಸ್ ದೂರು ನೀಡಿದ್ದರು. ಪೊಲೀಸರು ಅಪಹರಣ ಪ್ರಕರಣ ದಾಖಲಿಸಿಕೊಂಡು ಅನುರಾಗ್‌ನ ಹುಡುಕಾಟ ಆರಂಭಿಸಿದ್ದರು. ಆದರೆ, ಪೊಲೀಸರು ಆತನನ್ನು ಪತ್ತೆಹಚ್ಚುವಷ್ಟರಲ್ಲಿ, ಮಲಾವರ್ ಬಳಿ ಆತನ ಬೈಕ್ ಲಾರಿಗೆ ಡಿಕ್ಕಿಯಾಗಿ ಸಂಭವಿಸಿದ ರಸ್ತೆ ಅಪಘಾತದಲ್ಲಿ ಅನುರಾಗ್ ಸ್ಥಳದಲ್ಲೇ ಮೃತಪಟ್ಟಿದ್ದನು.

ಡಿಜಿಟಲ್ ಪುರಾವೆಗಳ ಆಧಾರದ ಮೇಲೆ ತನಿಖೆ:

ಮುಖ್ಯ ಶಂಕಿತ ಪ್ರೇಮಿ ಅಪಘಾತದಲ್ಲಿ ಮೃತಪಟ್ಟಿದ್ದರಿಂದ ಪ್ರಕರಣದ ತನಿಖೆ ಕಷ್ಟಕರವಾಯಿತು. ಪೊಲೀಸರು ಮೊಬೈಲ್ ಕರೆ ವಿವರಗಳು (CDR), ಟವರ್ ಲೊಕೇಶನ್, ಸೈಬರ್ ವಿಶ್ಲೇಷಣೆ ಮತ್ತು ಸಿಸಿಟಿವಿ ಫೂಟೇಜ್‌ಗಳನ್ನು ಆಧರಿಸಿ ತನಿಖೆ ಮುಂದುವರಿಸಿದರು. ಸಿಸಿಟಿವಿಯಲ್ಲಿ ಬಾಲಕಿಯನ್ನು ಅನುರಾಗ್ ಕಾಡಿನ ಕಡೆಗೆ ಕರೆದೊಯ್ಯುತ್ತಿರುವುದು ಕಂಡುಬಂದಿತ್ತು.

ಅರಣ್ಯದಲ್ಲಿ ಕ್ರೂರ ಹತ್ಯೆ:

ಸೈಬರ್ ಲೊಕೇಶನ್ ಆಧರಿಸಿ ಅರಣ್ಯ ಪ್ರದೇಶದಲ್ಲಿ ತಲಾಶ್ ನಡೆಸಿದ ಪೊಲೀಸರಿಗೆ ಬಾಲಕಿಯ ತಲೆ ಬೇರ್ಪಟ್ಟ, ಕೊಳೆತ ಸ್ಥಿತಿಯಲ್ಲಿದ್ದ ಮೃತದೇಹ ಸಿಕ್ಕಿದೆ. ಘಟನಾ ಸ್ಥಳದಿಂದ ಹತ್ಯೆಗೆ ಬಳಸಲಾದ ಆರಿ (Saw) ಮತ್ತು ಮರಕ್ಕೆ ನೇತುಹಾಕಲಾಗಿದ್ದ ಹಗ್ಗವನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಸಂಬಂಧಿಯ ಹೇಳಿಕೆಯಿಂದ ಬಯಲಾದ ಸತ್ಯ:

ಅನುರಾಗ್‌ನ ಸಂಬಂಧಿಯೊಬ್ಬರನ್ನು ವಿಚಾರಣೆ ನಡೆಸಿದಾಗ, ಅನುರಾಗ್ ಕಾಡಿನಿಂದ ಹಿಂತಿರುಗಿ ಬಂದು “ನಾನು ಹುಡುಗಿಯನ್ನು ಕೊಲೆ ಮಾಡಿದ್ದೇನೆ, ಈಗ ನಾನು ಹೋಗುತ್ತಿದ್ದೇನೆ” ಎಂದು ಹೇಳಿ ತೆರಳಿದ್ದನು ಎಂದು ತಿಳಿದುಬಂದಿದೆ. ಅದರ ಬೆನ್ನಲ್ಲೇ ಆತ ಅಪಘಾತದಲ್ಲಿ ಸಾವನ್ನಪ್ಪಿದ್ದನು. ಪ್ರಸ್ತುತ ಪೊಲೀಸರು ಕೊಲೆಗೆ ನಿಖರ ಕಾರಣವೇನು ಹಾಗೂ ಹತ್ಯೆಯ ಸಂದರ್ಭ ಹೇಗಿತ್ತು ಎಂಬುದನ್ನು ಅರಿಯಲು ತನಿಖೆಯನ್ನು ತೀವ್ರಗೊಳಿಸಿದ್ದಾರೆ.