ಕಾಫಿ ಡೇಟ್‌ನಲ್ಲೇ ಉದ್ಯಮಿ ಕೊಲೆಗೆ ಹೆಣೆದರು ಸ್ಕೆಚ್: 4,400 ಕರೆಗಳು, ಒಂದು ಹುಡಿ ಧರಿಸಿದ ರಹಸ್ಯ ವ್ಯಕ್ತಿ, ಪುಣೆ ಕೊಲೆ ರಹಸ್ಯ ಬಯಲಾಗಿದ್ದೇ ರೋಚಕ!

ಪುಣೆ/ಲೋನಾವಾಲಾ: ಮಹಾರಾಷ್ಟ್ರದ ಪುಣೆ ಸಮೀಪದ ಐತಿಹಾಸಿಕ ಲೋಹಗಢ್ ಕೋಟೆಯಲ್ಲಿ ಜೂನ್ 18 ರಂದು ನಡೆದಿದ್ದ 25 ವರ್ಷದ ಯುವ ಉದ್ಯಮಿ ಕೇತನ್ ಅಗರ್ವಾಲ್ ಅವರ ನಿಗೂಢ ಸಾವು ಇದೀಗ ಭೀಕರ ಕೊಲೆ ಪ್ರಕರಣವಾಗಿ ಮಾರ್ಪಟ್ಟಿದೆ.

ಗಾಳಿಯ ವೇಗಕ್ಕೆ ಸಿಲುಕಿ ಕಾಲು ಜಾರಿ ಬಿದ್ದಿದ್ದಾರೆ ಎಂದು ಬಿಂಬಿಸಲಾಗಿದ್ದ ಈ ಘಟನೆಯ ಹಿಂದೆ, ಸ್ವತಃ ಅವರ ನಿಶ್ಚಿತ ವಧು (Fiancée) ಸಿಯಾ ಗೋಯಲ್ ಮತ್ತು ಆಕೆಯ ಪ್ರಿಯಕರ ಚೇತನ್ ಚೌಧರಿ ಸೇರಿ ನಡೆಸಿದ ವ್ಯವಸ್ಥಿತ ಕೊಲೆ ಸಂಚು ಇರುವುದು ಪೊಲೀಸರ ತನಿಖೆಯಿಂದ ಬಹಿರಂಗಗೊಂಡಿದೆ.

ಕಾಫಿ ಶಾಪ್‌ನಲ್ಲಿ ಹೆಣೆದಿದ್ದ ಕೊಲೆ ಸ್ಕೆಚ್:

ಪೊಲೀಸ್ ತನಿಖೆಯ ಪ್ರಕಾರ, ಜೂನ್ 18 ರಂದು ಕೇತನ್ ಅವರನ್ನು ಕೊಲೆ ಮಾಡುವ ಮುನ್ನಾದಿನ, ಅಂದರೆ ಜೂನ್ 17 ರಂದು ಸಿಯಾ ಗೋಯಲ್ ಹಾಗೂ ಆಕೆಯ ಪ್ರಿಯಕರ ಚೇತನ್ ಪುಣೆಯ ಕೆಫೆಯೊಂದರಲ್ಲಿ ಭೇಟಿಯಾಗಿದ್ದರು. ಸಿಸಿಟಿವಿ ಕ್ಯಾಮೆರಾದಲ್ಲಿ ಇವರಿಬ್ಬರು ಸಂಜೆ 4:35 ರಿಂದ 5:30 ರವರೆಗೆ ಒಟ್ಟಿಗೆ ಕುಳಿತು ಮಾತನಾಡುತ್ತಿರುವುದು ಪತ್ತೆಯಾಗಿದೆ. ಈ ಒಂದು ಗಂಟೆಯ ಅವಧಿಯಲ್ಲೇ ಕೇತನ್‌ನನ್ನು ಲೋಹಗಢ್ ಕೋಟೆಯ ಯಾವ ಜಾಗದಿಂದ ಕೆಳಗೆ ತಳ್ಳಬೇಕು ಎಂಬುದನ್ನು ಯೂಟ್ಯೂಬ್ ವಿಡಿಯೋಗಳ ಮೂಲಕ ರಿಸರ್ಚ್ ಮಾಡಿ ಇಬ್ಬರೂ ಸ್ಕೆಚ್ ಹಾಕಿದ್ದರು ಎನ್ನಲಾಗಿದೆ.

ಅಪಘಾತದ ಕಥೆ ಕಟ್ಟಿದ ವಧು:

ಕೇತನ್ ಅಗರ್ವಾಲ್ ಪ್ರಮುಖ ರಿಯಲ್ ಎಸ್ಟೇಟ್ ಸಂಸ್ಥೆಯಾದ ‘ಸಕ್ಸಸ್ ಗ್ರೂಪ್’ನ ನಿರ್ದೇಶಕರಾಗಿದ್ದರು. ನವೆಂಬರ್‌ನಲ್ಲಿ ರಾಜಸ್ಥಾನದ ಉದಯಪುರದಲ್ಲಿ ಇವರಿಬ್ಬರ ಅದ್ಧೂರಿ ವಿವಾಹ ನಿಶ್ಚಯವಾಗಿತ್ತು. ಆದರೆ ಈ ಮದುವೆ ಇಷ್ಟವಿಲ್ಲದ ಸಿಯಾ, ಕೇತನ್‌ನನ್ನು ಮುಗಿಸಲು ಪ್ಲಾನ್ ಮಾಡಿದ್ದಳು. ಜೂನ್ 18 ರಂದು ಚಾರಣದ ನೆಪದಲ್ಲಿ ಲೋಹಗಢಕ್ಕೆ ಕರೆದೊಯ್ದು, ನಿರ್ಜನ ಪ್ರದೇಶದಲ್ಲಿ ಪ್ರಪಾತಕ್ಕೆ ತಳ್ಳಲಾಗಿತ್ತು. ಬಳಿಕ ಪೊಲೀಸರಿಗೆ, ಫೋಟೋ ಕ್ಲಿಕ್ಕಿಸುವಾಗ ಕೇತನ್ ಕಾಲು ಜಾರಿ ಬಿದ್ದರು ಎಂದು ಸಿಯಾ ಸುಳ್ಳು ಕಥೆ ಕಟ್ಟಿದ್ದಳು.

ಪೊಲೀಸರಿಗೆ ಅನುಮಾನ ತಂದ ಆ ಒಂದು ತಪ್ಪು ಮತ್ತು ಡಿಜಿಟಲ್ ಸಾಕ್ಷ್ಯ:

ಕೇತನ್ ಕುಟುಂಬಸ್ಥರು ಮೊದಲಿಗೆ ಇದನ್ನು ಅಪಘಾತವೆಂದೇ ಭಾವಿಸಿದ್ದರು. ಆದರೆ ಪೊಲೀಸರು ತಾಂತ್ರಿಕ ತನಿಖೆ ನಡೆಸಿದಾಗ ಸಿಯಾಳ ಸುಳ್ಳುಗಳು ಬಯಲಾದವು:

ಬದಲಾದ ಹೇಳಿಕೆ: ಮೊದಲು ಫೋಟೋ ತೆಗೆಯುವಾಗ ಬಿದ್ದರು ಎಂದಿದ್ದ ಸಿಯಾ, ನಂತರ ನೀರು ಕೊಡುವಾಗ ಜಾರಿದರು ಎಂದು ಹೇಳಿಕೆ ಬದಲಿಸಿದಳು.

ಮೊಬೈಲ್‌ನಲ್ಲಿ ಇಲ್ಲದ ಫೋಟೋ: ಫೋಟೋ ತೆಗೆಯುವಾಗ ಬಿದ್ದರು ಎಂದಿದ್ದರೂ ಕೇತನ್ ಮೊಬೈಲ್‌ನಲ್ಲಿ ಅಂದಿನ ಒಂದೂ ಫೋಟೋ ಇರಲಿಲ್ಲ.

ಹುಡಿ ಧರಿಸಿದ ರಹಸ್ಯ ವ್ಯಕ್ತಿ: ಕೋಟೆಯ ಸಿಸಿಟಿವಿ ಪರಿಶೀಲಿಸಿದಾಗ ಸಿಯಾ ಹಾಗೂ ಕೇತನ್ ಹಿಂದೆ ಹುಡಿ (Hoodie) ಧರಿಸಿದ ವ್ಯಕ್ತಿಯೊಬ್ಬ ಓಡಾಡುತ್ತಿರುವುದು ಕಂಡುಬಂದಿತು. ಆತನೇ ಪ್ರಿಯಕರ ಚೇತನ್ ಚೌಧರಿ. ಸಿಯಾ ಆತನಿಗೆ ಕೈ ಸನ್ಜ್ಞೆ ಮಾಡುತ್ತಿರುವುದೂ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

4,400 ಕರೆಗಳ ರಹಸ್ಯ: ಆರೋಪಿಗಳಿಬ್ಬರ ಕಾಲ್ ರೆಕಾರ್ಡ್ಸ್ ಪರಿಶೀಲಿಸಿದಾಗ ಕಳೆದ 6 ತಿಂಗಳಲ್ಲಿ ಇವರಿಬ್ಬರು ಬರೋಬ್ಬರಿ 2,000ಕ್ಕೂ ಹೆಚ್ಚು ಬಾರಿ (ಸುಮಾರು 238 ಗಂಟೆಗಳು) ಫೋನ್ನಲ್ಲಿ ಮಾತನಾಡಿದ್ದು ಪತ್ತೆಯಾಗಿದೆ.

ಪ್ರಸ್ತುತ ಪುಣೆ ಗ್ರಾಮಾಂತರ ಪೊಲೀಸರು ಸಿಯಾ ಗೋಯಲ್ ಮತ್ತು ಚೇತನ್ ಚೌಧರಿಯನ್ನು ಬಂಧಿಸಿದ್ದು, ಜೂನ್ 29 ರವರೆಗೆ ಪೊಲೀಸ್ ಕಸ್ಟಡಿಗೆ ಒಪ್ಪಿಸಲಾಗಿದೆ. ಉದ್ಯಮಿಯ ಕೊಲೆಗೆ ಸಂಬಂಧಿಸಿದಂತೆ ಹೆಚ್ಚಿನ ಡಿಜಿಟಲ್ ಹಾಗೂ ವಿಧಿವಿಜ್ಞಾನ (Forensic) ಪುರಾವೆಗಳನ್ನು ಕಲೆಹಾಕಲಾಗುತ್ತಿದೆ.