‘ಕೊಡಲಿ ಹಿಡಿಯಬೇಡಿ, ಪುಸ್ತಕ ಹಿಡಿಯಿರಿ’, 15 ವರ್ಷಗಳಿಂದ ಬ್ರಾಹ್ಮಣ ಶಾಸಕರಿದ್ದರೂ ಬಡತನ ಏಕೆ?: ಮುಸ್ಲಿಂರಿಗೆ ಜನ ಸುರಾಜ್ ನಾಯಕ ಪ್ರಶಾಂತ್ ಕಿಶೋರ್ ಪ್ರಶ್ನೆ

ದರ್ಭಾಂಗ (ಬಿಹಾರ): ಜನ ಸುರಾಜ್ ಪಕ್ಷದ ಸಂಸ್ಥಾಪಕ ಹಾಗೂ ಶಾಸಕ ಪ್ರಶಾಂತ್ ಕಿಶೋರ್ ಬಿಹಾರದ ಮಿಥಿಲಾಂಚಲ ಪ್ರದೇಶದ ಬ್ರಾಹ್ಮಣ ಸಮುದಾಯವನ್ನು ಉದ್ದೇಶಿಸಿ ನೀಡಿರುವ ಹೇಳಿಕೆಗಳು ರಾಜಕೀಯ ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿವೆ.

ಬ್ರಾಹ್ಮಣ ನಾಯಕರು ಮತ್ತು ಶಾಸಕ-ಸಂಸದರನ್ನು ವರ್ಷಗಳಿಂದ ಗೆಲ್ಲಿಸುತ್ತಿದ್ದರೂ ಸಮುದಾಯದ ಯುವಕರು 10 ರಿಂದ 20 ಸಾವಿರ ರೂಪಾಯಿ ಕೆಲಸಕ್ಕಾಗಿ ಪರದಾಡುತ್ತಿರುವುದೇಕೆ ಎಂದು ಅವರು ಪ್ರಶ್ನಿಸಿದ್ದಾರೆ. ಅಲ್ಲದೆ, ಹಿಂದೆ ಬ್ರಾಹ್ಮಣ ನಾಯಕರಿಗೆ ಬೆಂಬಲವಾಗಿ ನಿಲ್ಲುತ್ತಿದ್ದ ಮುಸ್ಲಿಂ ಮತದಾರರು ಬಿಜೆಪಿ ಜತೆಗಿನ ಮೈತ್ರಿ ಹಾಗೂ ಆಡಂಬರದ ರಾಜಕೀಯದಿಂದಾಗಿ ದೂರವಾದರು ಎಂದು ಕಿಶೋರ್ ನೆನಪಿಸಿದ್ದಾರೆ.

ಪರಶುರಾಮರ ಹೆಸರನ್ನು ಉಲ್ಲೇಖಿಸಿದ ಅವರು, ಬ್ರಾಹ್ಮಣರ ನಿಜವಾದ ಶಕ್ತಿ ಕೊಡಲಿ ಹಿಡಿಯುವುದರಲ್ಲಿಲ್ಲ, ಬದಲಿಗೆ ಪುಸ್ತಕ, ಶಿಕ್ಷಣ ಮತ್ತು ಜ್ಞಾನಾರ್ಜನೆಯಲ್ಲಿದೆ ಎಂದು ಕಿವಿಮಾತು ಹೇಳಿದ್ದಾರೆ.

ಉದ್ಯೋಗ ಮತ್ತು ಶೈಕ್ಷಣಿಕ ಕುಸಿತ: ಒಂದು ಕಾಲದಲ್ಲಿ ಪಂಡಿತರ ಭೂಮಿಯಾಗಿದ್ದ ಮಿಥಿಲಾ ಇಂದು ಕಾರ್ಮಿಕರ ನಾಡಾಗಿದೆ. ಬ್ರಾಹ್ಮಣ ಶಾಸಕರಿದ್ದರೂ ಯುವಕರಿಗೆ ಉದ್ಯೋಗ ಭದ್ರತೆ ಸಿಗದಿರುವುದರ ಬಗ್ಗೆ ಜಾಗೃತರಾಗಬೇಕು ಎಂದು ಪ್ರಶಾಂತ್ ಕಿಶೋರ್ ಹೇಳಿದ್ದಾರೆ.

ಮುಸ್ಲಿಂ ಮತಗಳ ಧ್ರುವೀಕರಣ: ಬಿಹಾರದಲ್ಲಿ 18% ಇರುವ ಮುಸ್ಲಿಂ ಸಮುದಾಯ ಹಿಂದೆ ಬ್ರಾಹ್ಮಣ ನಾಯಕರನ್ನು ಬೆಂಬಲಿಸುತ್ತಿತ್ತು. ಆದರೆ ಬಿಜೆಪಿ ಜತೆಗಿನ ಬ್ರಾಹ್ಮಣ ಸಮುದಾಯದ ಮೈತ್ರಿ ಹಾಗೂ ಸೋಷಿಯಲ್ ಮೀಡಿಯಾ ನಿಂದನೆಗಳಿಂದ ಆ ಬೆಂಬಲ ಕೈತಪ್ಪಿದೆ ಎಂದು ವಿಶ್ಲೇಷಿಸಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಪರ-ವಿರೋಧ ಚರ್ಚೆ: ಪ್ರಶಾಂತ್ ಕಿಶೋರ್ ಅವರ ಈ ‘ಕಹಿ ಸತ್ಯ’ದ ಹೇಳಿಕೆಗಳಿಗೆ ಅನೇಕರು ಪ್ರಶಂಸೆ ವ್ಯಕ್ತಪಡಿಸಿದ್ದರೆ, ಇನ್ನು ಕೆಲವರು ಬ್ರಾಹ್ಮಣ ಸಮುದಾಯವನ್ನು ಅಪಮಾನಿಸಲಾಗಿದೆ ಎಂದು ಟೀಕಿಸಿದ್ದಾರೆ.

ದರ್ಭಾಂಗ ಮತ್ತು ಬಂಕಿಪುರದಲ್ಲಿ ಇತ್ತೀಚೆಗೆ ತಮ್ಮ ಪಕ್ಷ ಸಾಧಿಸಿದ ಚುನಾವಣಾ ಯಶಸ್ಸಿನ ಬೆನ್ನಲ್ಲೇ ಪ್ರಶಾಂತ್ ಕಿಶೋರ್ ಜಾತೀಯ ರಾಜಕಾರಣದ ಚೌಕಟ್ಟನ್ನು ಪ್ರಶ್ನಿಸಿದ್ದು, ಮುಂಬರುವ ಬಿಹಾರ ರಾಜಕೀಯದಲ್ಲಿ ಹೊಸ ಅಲೆ ಎಬ್ಬಿಸಿದೆ.