ನೆಹರೂ-ಗಾಂಧಿ ಕುಟುಂಬದವರು ಯಾರೂ ಭೇಟಿಗೆ ಬರಬೇಡಿ: ಪರ್ವಿಂದರ್ ಜೋಟಾ ತಂದೆ ಭೀಮ್ ಸಿಂಗ್ ಸ್ಪಷ್ಟನೆ

ಪಂಜಾಬ್: ವೈದ್ಯಕೀಯ ಅಂಗಡಿ ಮಾಲೀಕನಿಂದ ಹತ್ಯೆಗೀಡಾದ ಮಾದಕ ದ್ರವ್ಯ ವಿರೋಧಿ ಕಾರ್ಯಕರ್ತ ಪರ್ವಿಂದರ್ ಜೋಟಾ ಅವರ ತಂದೆ ಭೀಮ್ ಸಿಂಗ್, ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಹಾಗೂ ನೆಹರೂ-ಗಾಂಧಿ ಕುಟುಂಬದ ಯಾರೇ ಸದಸ್ಯರು ಪಂಜಾಬ್‌ನ ಮಾನ್ಸಾದಲ್ಲಿ ನಡೆಯುತ್ತಿರುವ ‘ಜೋಟಾ ಇನ್ಸಾಫ್ ಮೋರ್ಚಾ’ ಪ್ರತಿಭಟನಾ ಸ್ಥಳಕ್ಕೆ ಬರುವುದು ಬೇಡ ಎಂದು ಸ್ಪಷ್ಟವಾಗಿ ನಿರಾಕರಿಸಿದ್ದಾರೆ.

ತಮ್ಮ ಸಿಖ್ ನಂಬಿಕೆ ಹಾಗೂ ಪಂಥದ ಮೇಲಿನ ನಿಷ್ಠೆಯಿಂದಾಗಿ ತಾನು ಈ ನಿರ್ಧಾರ ಕೈಗೊಂಡಿರುವುದಾಗಿ ಅವರು ತಿಳಿಸಿದ್ದಾರೆ.

ಭೇಟಿಗೆ ಸ್ಪಷ್ಟ ನಿರಾಕರಣೆ: ಜೋಟಾ ಇನ್ಸಾಫ್ ಮೋರ್ಚಾಗೆ ವಿವಿಧ ರಾಜಕೀಯ ಪಕ್ಷಗಳ ನಾಯಕರು ಭೇಟಿ ನೀಡಲು ಅವಕಾಶವಿದ್ದರೂ, ನೆಹರೂ-ಗಾಂಧಿ ಕುಟುಂಬ ಹಾಗೂ ಬೇಅಂತ್ ಸಿಂಗ್ ಕುಟುಂಬದವರು ಬರುವುದನ್ನು ಭೀಮ್ ಸಿಂಗ್ ವಿರೋಧಿಸಿದ್ದಾರೆ.

ಧಾರ್ಮಿಕ ನಂಬಿಕೆಯ ಕಾರಣ: ತಮಗೆ ಸಿಖ್ ಪಂಥದಿಂದ ಸಿಕ್ಕಿರುವ ಗೌರವ ಹಾಗೂ ಶ್ರೀ ಅಕಾಲ್ ತಖ್ತ್ ಸಾಹಿಬ್ ಮೇಲಿನ ನಂಬಿಕೆಯಿಂದಾಗಿ ಈ ಕುಟುಂಬಗಳ ಭೇಟಿಯನ್ನು ಒಪ್ಪಿಕೊಳ್ಳಲಾಗದು ಎಂದು ತಿಳಿಸಿದ್ದಾರೆ.

ಟಂಖೈಯಾ ಘೋಷಣೆಯ ಭೀತಿ: ಗಾಂಧಿ ಕುಟುಂಬದವರನ್ನು ಭೇಟಿಯಾದರೆ ತಾವು ಪಂಥದಿಂದ ಬಹಿಷ್ಕರಿಸಲ್ಪಡುವ ಅಥವಾ ಧಾರ್ಮಿಕ ಶಿಕ್ಷೆಗೆ (ಟಂಖೈಯಾ) ಗುರಿಯಾಗುವ ಭಯವಿFದೆಯೆಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಮಾನ್ಸಾದಲ್ಲಿ ಮಾದಕ ವಸ್ತುಗಳ ಮಾರಾಟದ ವಿರುದ್ಧ ಧ್ವನಿ ಎತ್ತಿದ್ದ ಪರ್ವಿಂದರ್ ಜೋಟಾ ಅವರನ್ನು ಅಕ್ಟೋಬರ್ 13ರಂದು ಹತ್ಯೆ ಮಾಡಲಾಗಿದ್ದು, ನ್ಯಾಯಕ್ಕಾಗಿ ಕುಟುಂಬವು ನಿರಂತರ ಹೋರಾಟ ನಡೆಸುತ್ತಿದೆ.