‘ನಾವು ಶೇ. 4 ರಷ್ಟು ಹಿಂದೂಗಳನ್ನು ಸಹಿಸುತ್ತಿದ್ದೇವೆ’: ಪಾಕ್ ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿ ವಿವಾದಾತ್ಮಕ ಹೇಳಿಕೆ, ಇಲ್ಲಿದೆ ಅಸಲಿ ಲೆಕ್ಕ!

ನವದೆಹಲಿ: ಪಾಕಿಸ್ತಾನದ ಸ್ವಾತಂತ್ರ್ಯ ದಿನಾಚರಣೆ (ಆಗಸ್ಟ್ 14) ಸಮಾರಂಭದಲ್ಲಿ ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿ ನೀಡಿದ ಹೇಳಿಕೆ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ಪಾಕಿಸ್ತಾನದಲ್ಲಿ ಶೇಕಡಾ 3 ರಿಂದ 4 ರಷ್ಟಿರುವ ಹಿಂದೂ ಅಲ್ಪಸಂಖ್ಯಾತರನ್ನು ನಾವು “ಸಹಿಸಿಕೊಳ್ಳುತ್ತಿದ್ದೇವೆ” ಮತ್ತು ಅವರು ಇಲ್ಲೇ ಸ್ವತಂತ್ರವಾಗಿ ವಾಸಿಸುತ್ತಿದ್ದಾರೆ ಎಂದು ಜರ್ದಾರಿ ಹೇಳಿಕೆ ನೀಡಿದ್ದಾರೆ.

ಆದರೆ ಪಾಕಿಸ್ತಾನದ ಅಧಿಕೃತ 2023ರ ಜನಗಣತಿಯ ಪ್ರಕಾರ, ದೇಶದಲ್ಲಿ ಹಿಂದೂಗಳ ಜನಸಂಖ್ಯೆ 52.1 ಲಕ್ಷ (ಶೇ 2.17) ಮಾತ್ರ ಇದೆ, ಇದು ಜರ್ದಾರಿ ಅವರ ಹೇಳಿಕೆಗಿಂತ ಕಡಿಮೆಯಾಗಿದೆ. ಜರ್ದಾರಿ ಅವರ ಈ “ಸಹಿಸಿಕೊಳ್ಳುತ್ತಿದ್ದೇವೆ” ಎಂಬ ಪದದ ಬಳಕೆಯು ಅಲ್ಪಸಂಖ್ಯಾತರಿಗೆ ಸಮಾನ ಹಕ್ಕುಗಳನ್ನು ನೀಡುವ ಬದಲು ಅವರನ್ನು ಎರಡನೇ ದರ್ಜೆಯ ಪ್ರಜೆಗಳಂತೆ ಬಿಂಬಿಸುತ್ತದೆ ಎಂದು ಭಾರತದ ಕಾನೂನು ತಜ್ಞರು ಮತ್ತು ಮಾನವ ಹಕ್ಕುಗಳ ಸಂಸ್ಥೆಗಳು ತೀವ್ರ ಅಸಮಾಧಾನ ವ್ಯಕ್ತಪಡಿಸಿವೆ.

ಸಿಂಧ್ ಮತ್ತು ಪಂಜಾಬ್ ಪ್ರಾಂತ್ಯಗಳಲ್ಲಿ ಬಲವಂತದ ಮತಾಂತರ, ಅಪಹರಣ ಮತ್ತು ಧರ್ಮದೂಷಣೆ ಕಾಯ್ದೆಯಡಿ ಅಲ್ಪಸಂಖ್ಯಾತರ ಮೇಲಿನ ದೌರ್ಜನ್ಯಗಳು ಮುಂದುವರಿದಿದ್ದು, ಪಾಕಿಸ್ತಾನದ ನೈಜ ಪರಿಸ್ಥಿತಿಯನ್ನು ಈ ವರದಿಗಳು ಬಿಚ್ಚಿಡುತ್ತವೆ