Home ಉದ್ಯೋಗ ವಾರ್ತೆ “ನಿಮ್ಮ ಹಸಿವು ಎಷ್ಟೇ ತಿನ್ನಿಸಿದರೂ ನೀಗುವುದಿಲ್ಲ”: ಉದ್ಯೋಗ ಸೃಷ್ಟಿ, ವೇತನ ಹೆಚ್ಚಳ ಮಾಡದ ಕಾರ್ಪೊರೇಟ್ ಕಂಪನಿಗಳಿಗೆ ಪ್ರಧಾನಿ ಮೋದಿ ತೀವ್ರ ತರಾಟೆ!
ಉದ್ಯೋಗ ವಾರ್ತೆದಾವಣಗೆರೆನವದೆಹಲಿಬೆಂಗಳೂರು

“ನಿಮ್ಮ ಹಸಿವು ಎಷ್ಟೇ ತಿನ್ನಿಸಿದರೂ ನೀಗುವುದಿಲ್ಲ”: ಉದ್ಯೋಗ ಸೃಷ್ಟಿ, ವೇತನ ಹೆಚ್ಚಳ ಮಾಡದ ಕಾರ್ಪೊರೇಟ್ ಕಂಪನಿಗಳಿಗೆ ಪ್ರಧಾನಿ ಮೋದಿ ತೀವ್ರ ತರಾಟೆ!

Share
ಮೋದಿ
Share

ನವದೆಹಲಿ: ಸರ್ಕಾರ ನೀಡಿದ ತೆರಿಗೆ ವಿನಾಯಿತಿಗಳ ಸಂಪೂರ್ಣ ಲಾಭವನ್ನು ಜೇಬಿಗಿಳಿಸಿಕೊಂಡು, ಹೊಸ ಉದ್ಯೋಗಗಳನ್ನು ಸೃಷ್ಟಿಸದೆ ಮತ್ತು ನೌಕರರ ವೇತನವನ್ನು ಹೆಚ್ಚಿಸದೆ ಸುಮ್ಮನೆ ಕುಳಿತಿರುವ ದೇಶದ ಕಾರ್ಪೊರೇಟ್ ವಲಯದ ವಿರುದ್ಧ ಪ್ರಧಾನಮಂತ್ರಿ ನರೇಂದ್ರ ಮೋದಿ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.

ನವದೆಹಲಿಯ ಭಾರತ ಮಂಟಪದಲ್ಲಿ ನಡೆದ ಭಾರತೀಯ ವಾಣಿಜ್ಯ ಮತ್ತು ಕೈಗಾರಿಕಾ ಮಂಡಳಿಗಳ ಒಕ್ಕೂಟದ (FICCI) ಶತಮಾನೋತ್ಸವ ಸಮಾರಂಭದಲ್ಲಿ ದೇಶದ ಅಗ್ರಗಣ್ಯ ಉದ್ಯಮಿಗಳ ಸಮ್ಮುಖದಲ್ಲೇ ಪ್ರಧಾನಿ ಈ ಖಡಕ್ ಎಚ್ಚರಿಕೆ ನೀಡಿದ್ದಾರೆ.

ಉದ್ಯಮಿಗಳನ್ನು ಉದ್ದೇಶಿಸಿ ನೇರವಾಗಿ ಮಾತನಾಡಿದ ಪ್ರಧಾನಿ ಮೋದಿ, “ನೀವು ಚಪ್ಪಾಳೆ ತಟ್ಟುವುದಿಲ್ಲ ಎಂಬುದು ನನಗೆ ಚೆನ್ನಾಗಿ ಗೊತ್ತಿದೆ. ಏಕೆಂದರೆ ನಿಮ್ಮ ಹಸಿವು ಎಷ್ಟಿದೆಯೆಂದರೆ, ಎಷ್ಟೇ ತಿನ್ನಿಸಿದರೂ ನಿಮ್ಮ ಹೊಟ್ಟೆ ತುಂಬುವುದಿಲ್ಲ” ಎಂದು ಕಟುವಾಗಿ ಟೀಕಿಸಿದರು. “ನೀವು ನಿಮ್ಮ ಉದ್ಯೋಗಿಗಳ ಸಂಬಳವನ್ನು ಹೆಚ್ಚಿಸಿದ್ದೀರಾ? ನಿಮ್ಮ ಸಂಸ್ಥೆಗಳಲ್ಲಿ ಉದ್ಯೋಗಿಗಳ ಸಂಖ್ಯೆಯನ್ನು ಹೆಚ್ಚಿಸಿದ್ದೀರಾ? ಇಲ್ಲ. ‘ಮೋದಿ ಜೀ, ನೀವು ನಿಮ್ಮ ಕೆಲಸ ಮಾಡಿ, ನಾವು ಸುಮ್ಮನೆ ನೋಡುತ್ತಿರುತ್ತೇವೆ’ ಎಂಬ ಧೋರಣೆ ನಿಮ್ಮದಾಗಿದೆ. ಇದು ಹೀಗೆಯೇ ಮುಂದುವರಿಯಬೇಕೇ?” ಎಂದು ಪ್ರಧಾನಿ ಖಾರವಾಗಿ ಪ್ರಶ್ನಿಸಿದರು.

ತೆರಿಗೆ ವಿನಾಯಿತಿ ಮತ್ತು ವೇತನ ಸ್ಥಗಿತ: 2014ರಲ್ಲಿ ಶೇ. 30ರಷ್ಟಿದ್ದ ಕಾರ್ಪೊರೇಟ್ ತೆರಿಗೆಯನ್ನು 2019ರಲ್ಲಿ ಶೇ. 22ಕ್ಕೆ ಇಳಿಸಲಾಯಿತು. ಅಲ್ಲದೆ, ಜನರ ಖರೀದಿ ಸಾಮರ್ಥ್ಯ ಹೆಚ್ಚಿಸಲು ವಾರ್ಷಿಕ 12 ಲಕ್ಷ ರೂಪಾಯಿವರೆಗಿನ ಆದಾಯಕ್ಕೆ ತೆರಿಗೆ ವಿನಾಯಿತಿ ನೀಡಲಾಗಿದೆ. ಆದರೂ ಖಾಸಗಿ ವಲಯ ಇದಕ್ಕೆ ಪೂರಕವಾಗಿ ವೇತನ ಹೆಚ್ಚಳ ಅಥವಾ ಉದ್ಯೋಗ ಸೃಷ್ಟಿಗೆ ಮುಂದಾಗಿಲ್ಲ ಎಂದು ಮೋದಿ ಅಸಮಾಧಾನ ವ್ಯಕ್ತಪಡಿಸಿದರು.

ತೆರಿಗೆ ಮರುಪಾವತಿ ಸುಧಾರಣೆ: ಹಿಂದೆ ತೆರಿಗೆ ಮರುಪಾವತಿ ಪಡೆಯಲು 8 ತಿಂಗಳು ಕಾಯಬೇಕಿತ್ತು. ಆದರೆ ಈಗ ವ್ಯವಸ್ಥೆಯನ್ನು ಸರಳಗೊಳಿಸಲಾಗಿದ್ದು, ಕೇವಲ ಒಂದು ವಾರದಲ್ಲಿ ತೆರಿಗೆದಾರರ ಖಾತೆಗೆ ಹಣ ಜಮೆಯಾಗುತ್ತಿದೆ. “ಕನಿಷ್ಠ ಅದಕ್ಕಾದರೂ ಚಪ್ಪಾಳೆ ತಟ್ಟಿ” ಎಂದು ಪ್ರಧಾನಿ ವ್ಯಂಗ್ಯವಾಡಿದರು.

ದಾಖಲೆಯ ಕಾರ್ಪೊರೇಟ್ ಲಾಭ ಮತ್ತು ತೆರಿಗೆ ಅಂತರ: ಮೋತಿಲಾಲ್ ಓಸ್ವಾಲ್ ವರದಿಯ ಪ್ರಕಾರ, 2020-26ರ ಅವಧಿಯಲ್ಲಿ ದೇಶದ ಜಿಡಿಪಿ ಶೇ. 9.5ರ ದರದಲ್ಲಿ ಬೆಳೆದರೆ, ನಿಫ್ಟಿ-500 ಕಂಪನಿಗಳ ಲಾಭ ಶೇ. 28.7ರ ವಾರ್ಷಿಕ ದರದಲ್ಲಿ (CAGR) ವೃದ್ಧಿಯಾಗಿದೆ. ಆರ್‌ಬಿಐ ವರದಿಯಂತೆ ಕಂಪನಿಗಳ ಲಾಭ 2.5 ಲಕ್ಷ ಕೋಟಿಯಿಂದ 7.1 ಲಕ್ಷ ಕೋಟಿ ರೂ.ಗೆ ಏರಿದೆ. ಆದರೆ, ನೇರ ತೆರಿಗೆ ಸಂಗ್ರಹದಲ್ಲಿ ಕಾರ್ಪೊರೇಟ್ ತೆರಿಗೆಗಿಂತ (ಶೇ. 46.6) ಸಾಮಾನ್ಯ ಜನರು ಕಟ್ಟುವ ವೈಯಕ್ತಿಕ ಆದಾಯ ತೆರಿಗೆಯ ಪಾಲೇ (ಶೇ. 53.4) ಹೆಚ್ಚಾಗಿದೆ.

ಔಪಚಾರಿಕ ಉದ್ಯೋಗಗಳ ಕೊರತೆ: ಆರ್ಥಿಕ ಸಮೀಕ್ಷೆ ಮತ್ತು ಎಸ್‌ಬಿಐ ವರದಿಯ ಪ್ರಕಾರ, ಕಾರ್ಪೊರೇಟ್ ಲಾಭ ಶೇ. 22.3ರಷ್ಟು ಹೆಚ್ಚಾದರೂ ಉದ್ಯೋಗ ಸೃಷ್ಟಿ ಕೇವಲ ಶೇ. 1.5ರಷ್ಟು ಮಾತ್ರ ಆಗಿದೆ. ದೇಶದ ಶೇ. 87ರಷ್ಟು ಕಾರ್ಮಿಕರು ಇಂದಿಗೂ ಭದ್ರತೆಯಿಲ್ಲದ ಅಸಂಘಟಿತ ಮತ್ತು ಗಿಗ್ (Gig) ವಲಯದಲ್ಲೇ ದುಡಿಯುತ್ತಿದ್ದಾರೆ.

ಹಿಂದೆ ಸೆಪ್ಟೆಂಬರ್ 2025ರಲ್ಲೂ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು, ಸರ್ಕಾರ ಉದ್ಯಮ ಸ್ನೇಹಿ ನೀತಿಗಳನ್ನು ಜಾರಿಗೊಳಿಸಿದ್ದು, ಈಗ ಉದ್ಯಮಿಗಳು ಬಂಡವಾಳ ಹೂಡಿ ಉತ್ಪಾದನೆ ಮತ್ತು ಉದ್ಯೋಗ ಹೆಚ್ಚಿಸುವ ಸರದಿ ಎಂದು ಕರೆ ನೀಡಿದ್ದರು. ಇದೀಗ ಸ್ವತಃ ಪ್ರಧಾನಿ ಮೋದಿಯವರೇ ಉದ್ಯಮಿಗಳ ವಿರುದ್ಧ ಮೊದಲ ಬಾರಿಗೆ ಬಹಿರಂಗವಾಗಿ ಅಸಮಾಧಾನ ಹೊರಹಾಕಿರುವುದು ದೇಶದ ಆರ್ಥಿಕ ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
Share

Recent Posts

Recent Comments

No comments to show.
Related Articles