ವಾರಾಣಸಿ ಈಗ ವಿಶ್ವದ 2ನೇ ಸಸ್ಯಾಹಾರಿ ನಗರವೇ? ಮಾಂಸದ ಅಂಗಡಿಗಳ ಸ್ಥಳಾಂತರಕ್ಕೆ ಪಾಲಿಕೆ ಮಹತ್ವದ ನಿರ್ಧಾರ!

ವಾರಾಣಸಿ: ಪವಿತ್ರ ಯಾತ್ರಾ ಸ್ಥಳವಾದ ಉತ್ತರ ಪ್ರದೇಶದ ವಾರಾಣಸಿಯನ್ನು (ಕಾಶಿ) ವಿಶ್ವದ ಎರಡನೇ ‘ಸಸ್ಯಾಹಾರಿ ನಗರ’ವನ್ನಾಗಿ ಮಾಡಲು ಸಿದ್ಧತೆಗಳು ನಡೆಯುತ್ತಿವೆಯೇ ಎಂಬ ಚರ್ಚೆ ದೇಶಾದ್ಯಂತ ಜೋರಾಗಿದೆ. ಇದಕ್ಕೆ ಮುಖ್ಯ ಕಾರಣ ವಾರಾಣಸಿ ಮಹಾನಗರ ಪಾಲಿಕೆ (VMC) ನಗರ ವ್ಯಾಪ್ತಿಯಲ್ಲಿರುವ ಎಲ್ಲಾ ಮಾಂಸ, ಮೀನು ಮತ್ತು ಕೋಳಿ ಮಾರಾಟ ಮಳಿಗೆಗಳನ್ನು ನಗರದ ಹೊರವಲಯಕ್ಕೆ ಸ್ಥಳಾಂತರಿಸಲು ಕೈಗೊಂಡಿರುವ ದೃಢ ನಿರ್ಧಾರ.

ಮುಂದಿನ ಆರು ತಿಂಗಳ ಅವಧಿಯಲ್ಲಿ, ಅಂದರೆ ಈ ವರ್ಷದ ದೀಪಾವಳಿ ಮತ್ತು ಪವಿತ್ರ ಶ್ರಾವಣ ಮಾಸದ ವೇಳೆಗೆ ನಗರದೊಳಗಿನ ಸುಮಾರು 350 ರಿಂದ 400 ಮಾಂಸದ ಅಂಗಡಿಗಳನ್ನು ಸಂಪೂರ್ಣವಾಗಿ ತೆರವುಗೊಳಿಸಲು ಪಾಲಿಕೆ ಗಡುವು ವಿಧಿಸಿದೆ.

ಏನಿದು ಪಾಲಿಕೆಯ ಯೋಜನೆ?

ವಾರಾಣಸಿ ಮೇಯರ್ ಅಶೋಕ್ ತಿವಾರಿ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ಈ ನಿರ್ಧಾರಕ್ಕೆ ಅನುಮೋದನೆ ನೀಡಲಾಗಿದ್ದು, ನಗರದ ಪ್ರಮುಖ ಐದು ಹೊರವಲಯದ ಪ್ರದೇಶಗಳಾದ ರಾಮನಗರ, ಸುಜಾಬಾದ್, ಗಣೇಶ್ಪುರ, ಆವಲೇಶ್ಪುರ ಮತ್ತು ಶಿವಪುರಗಳಿಗೆ ಈ ಅಂಗಡಿಗಳನ್ನು ಶಿಫ್ಟ್ ಮಾಡಲು ಜಾಗ ಗುರುತಿಸಲಾಗಿದೆ. ನಗರದಲ್ಲಿ ಸ್ವಚ್ಛತೆ ಕಾಪಾಡುವುದು, ಟ್ರಾಫಿಕ್ ದಟ್ಟಣೆ ನಿಯಂತ್ರಿಸುವುದು ಮತ್ತು ಕಾಶಿಯ ಧಾರ್ಮಿಕ ಪವಿತ್ರತೆಯನ್ನು ರಕ್ಷಿಸುವುದು ಪಾಲಿಕೆಯ ಮುಖ್ಯ ಉದ್ದೇಶವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಇದು ಸಂಪೂರ್ಣ ನಿಷೇಧವೇ? ಸಸ್ಯಾಹಾರಿ ನಗರವೇ?

ಇಲ್ಲ, ವಾರಾಣಸಿ ಸಂಪೂರ್ಣವಾಗಿ ಸಸ್ಯಾಹಾರಿ ನಗರವಾಗುತ್ತಿಲ್ಲ. ಸದ್ಯಕ್ಕೆ ಗುಜರಾತ್‌ನ ‘ಪಾಲಿಟಾಣ’ (Palitana) ಮಾತ್ರ ವಿಶ್ವದ ಏಕೈಕ ಸಂಪೂರ್ಣ ಸಸ್ಯಾಹಾರಿ ನಗರವಾಗಿದ್ದು, ಅಲ್ಲಿ ಮಾಂಸ ಮಾರಾಟ ಮತ್ತು ಸೇವನೆಯನ್ನು ಕಾನೂನುಬದ್ಧವಾಗಿ ಸಂಪೂರ್ಣ ನಿಷೇಧಿಸಲಾಗಿದೆ. ಆದರೆ ವಾರಾಣಸಿಯಲ್ಲಿ ಮಾಂಸ ಸೇವನೆಯನ್ನು ನಿಷೇಧಿಸಿಲ್ಲ; ಕೇವಲ ಮಾರಾಟದ ಮಳಿಗೆಗಳನ್ನು ನಗರದ ಹೊರಗಿನ ಗಡಿಗಳಿಗೆ ಸ್ಥಳಾಂತರಿಸಲಾಗುತ್ತಿದೆ ಅಷ್ಟೇ. ಮಾಂಸ ಪ್ರಿಯರು ಇನ್ಮುಂದೆ ನಗರದ ಹೊರವಲಯಕ್ಕೆ ಹೋಗಿ ಖರೀದಿ ಮಾಡಬೇಕಾಗುತ್ತದೆ.

ಸ್ಥಳೀಯರ ಪರ-ವಿರೋಧ ಚರ್ಚೆ:

ಪಾಲಿಕೆಯ ಈ ಕ್ರಮಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. “ನಗರದಲ್ಲಿ ಮಾಂಸದ ಅಂಗಡಿಗಳನ್ನು ಸ್ಥಳಾಂತರಿಸುವ ಸರ್ಕಾರ, ಮಹಿಳೆಯರು ಮತ್ತು ಪ್ರವಾಸಿಗರಿಗೆ ಮುಜುಗರ ಉಂಟುಮಾಡುವ ಮದ್ಯ ಹಾಗೂ ಭಾಂಗ್ (ಗಾಂಜಾ) ಅಂಗಡಿಗಳನ್ನು ಯಾಕೆ ಮುಚ್ಚುತ್ತಿಲ್ಲ?” ಎಂದು ಸ್ಥಳೀಯ ನಿವಾಸಿಗಳು ಪ್ರಶ್ನಿಸಿದ್ದಾರೆ. ಅಲ್ಲದೆ, ಮುಸ್ಲಿಂ, ಬಂಗಾಳಿ ಹಾಗೂ ಠಾಕೂರ್ ಸಮುದಾಯದವರ ದೈನಂದಿನ ಆಹಾರ ಪದ್ಧತಿ ಹಾಗೂ ವ್ಯಾಪಾರಿಗಳ ಜೀವನೋಪಾಯದ ಮೇಲೆಯೂ ಇದು ತೀವ್ರ ಪರಿಣಾಮ ಬೀರಲಿದೆ ಎಂದು ಆತಂಕ ವ್ಯಕ್ತಪಡಿಸಲಾಗಿದೆ.