ವೈಯಕ್ತಿಕ ಫೋಟೋಗಳು, ಪ್ರೇಯಸಿಯ ನಿರಾಕರಣೆ: ಮುಂಬೈ ಲೋಕ ಭವನದಲ್ಲಿ ಎಸ್‌ಆರ್‌ಪಿಎಫ್ ಜವಾನ್ ಕೌಸ್ತುಭ್ ಸಾಂಗ್ಲೆ ಗುಂಡು ಹಾರಿಸಿಕೊಂಡು ಆತ್ಮಹತ್ಯೆ!

ಮುಂಬೈ: ಮುಂಬೈನ ಅತ್ಯಂತ ಕಟ್ಟುನಿಟ್ಟಿನ ಭದ್ರತೆ ಹೊಂದಿರುವ ಮಲಬಾರ್ ಹಿಲ್ಸ್‌ನ ಮಹಾರಾಷ್ಟ್ರ ಲೋಕ ಭವನದಲ್ಲಿ ಕರ್ತವ್ಯದಲ್ಲಿದ್ದ ಎಸ್‌ಆರ್‌ಪಿಎಫ್ (SRPF) ಗ್ರೂಪ್-16ರ ಕಾನ್‌ಸ್ಟೆಬಲ್ ಕೌಸ್ತುಭ್ ಸಾಂಗ್ಲೆ ಎಂಬುವವರು ತಮ್ಮದೇ ಸರ್ವಿಸ್ ರೈಫಲ್‌ನಿಂದ ಶೂಟ್ ಮಾಡಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ನಡೆದಿದೆ.

ಸ್ಥಳದಲ್ಲಿ ಸುಸೈಡ್ ನೋಟ್ ಪತ್ತೆಯಾಗಿದ್ದು, ಪ್ರೇಮ ವೈಫಲ್ಯ ಮತ್ತು ಕೌಟುಂಬಿಕ ಹಿನ್ನೆಲೆಯೇ ಇದಕ್ಕೆ ಕಾರಣ ಎಂದು ಮೇಲ್ನೋಟಕ್ಕೆ ತಿಳಿದುಬಂದಿದೆ.

ಘಟನೆಯ ವಿವರ:

ಕೌಸ್ತುಭ್ ಸಾಂಗ್ಲೆ ಸೋಮವಾರ ಸಂಜೆ 6 ರಿಂದ ರಾತ್ರಿ 9 ರವರೆಗೆ ಲೋಕ ಭವನದ ಟವರ್-2 ರಲ್ಲಿ ಕರ್ತವ್ಯದಲ್ಲಿದ್ದರು. ಈ ವೇಳೆ ಅವರು ತಮ್ಮ ಪೋಸ್ಟ್ ಬಳಿಯ ಕೊಠಡಿಯೊಂದಕ್ಕೆ ತೆರಳಿ ಎಸ್‌ಎಲ್‌ಆರ್ (SLR) ರೈಫಲ್‌ನಿಂದ ಶೂಟ್ ಮಾಡಿಕೊಂಡಿದ್ದಾರೆ.

ರಾತ್ರಿ 9 ಗಂಟೆಗೆ ಶಿಫ್ಟ್ ಬದಲಾವಣೆಗೆ ಬಂದ ಮತ್ತೊಬ್ಬ ಸಿಬ್ಬಂದಿ ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಕೌಸ್ತುಭ್ ಅವರನ್ನು ಕಂಡು ಹಿರಿಯ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ.

ಪ್ರೇಮ ವೈಫಲ್ಯದ ಆಯಾಮ:

ತನಿಖೆಯ ಪ್ರಕಾರ, ಕೌಸ್ತುಭ್ ಮೀರಾ-ಭಯಂದರ್ ಪೊಲೀಸ್ ವ್ಯಾಪ್ತಿಯಲ್ಲಿ ಕೆಲಸ ಮಾಡುತ್ತಿದ್ದ ಮಹಿಳಾ ಕಾನ್‌ಸ್ಟೆಬಲ್ ಒಬ್ಬರನ್ನು ಪ್ರೀತಿಸುತ್ತಿದ್ದರು. ಆದರೆ ಆಕೆ ಮದುವೆ ಪ್ರಸ್ತಾಪವನ್ನು ತಿರಸ್ಕರಿಸಿ, ಬೇರೊಬ್ಬ ಪೊಲೀಸ್ ಕಾನ್‌ಸ್ಟೆಬಲ್ ಜೊತೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದಳು.

ಇದರಿಂದ ತೀವ್ರ ನೊಂದಿದ್ದ ಕೌಸ್ತುಭ್, ಆತ್ಮಹತ್ಯೆಗೂ ಮುನ್ನ ಆಕೆಯ ಭಾವಿ ಪತಿಗೆ ತಮ್ಮಿಬ್ಬರ ಹಳೆಯ ಖಾಸಗಿ ಫೋಟೋಗಳನ್ನು ಕಳುಹಿಸಿದ್ದರು ಎನ್ನಲಾಗಿದೆ.

ಈ ಹಿಂದೆ ಕೌಸ್ತುಭ್ ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಬೆದರಿಕೆ ಹಾಕಿದ್ದ ಹಿನ್ನೆಲೆಯಲ್ಲಿ ಮಹಿಳಾ ಸಿಬ್ಬಂದಿ ಭಯಂದರ್ ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಈ ಕುರಿತು ಇಲಾಖೆ ಏನು ಕ್ರಮ ಕೈಗೊಂಡಿತ್ತು ಹಾಗೂ ಸಿಬ್ಬಂದಿಗಳ ಮಾನಸಿಕ ಆರೋಗ್ಯ ತಪಾಸಣೆ ನಿಯಮಿತವಾಗಿ ನಡೆಯುತ್ತಿತ್ತೇ ಎಂಬ ಬಗ್ಗೆ ಮಲಬಾರ್ ಹಿಲ್ಸ್ ಪೊಲೀಸರು ತನಿಖೆ ತೀವ್ರಗೊಳಿಸಿದ್ದಾರೆ.

ಕೌಸ್ತುಭ್ ಅವರ ತಾಯಿ ಚಿಕ್ಕ ವಯಸ್ಸಿನಲ್ಲೇ ನಿಧನರಾಗಿದ್ದರು ಮತ್ತು ಅವರ ಸಹೋದರಿಯೊಬ್ಬರು ಈ ಹಿಂದೆ ಆತ್ಮಹತ್ಯೆ ಮಾಡಿಕೊಂಡಿದ್ದರು ಎಂದು ತಿಳಿದುಬಂದಿದೆ.