ಆರ್‌ಎಸ್‌ಎಸ್ ಕೆಲಸ ದ್ವೇಷವಲ್ಲ, ‘ಶುದ್ಧ ಸಾತ್ವಿಕ ಪ್ರೇಮ’: ಲಂಡನ್‌ನಲ್ಲಿ ಮೋಹನ್ ಭಾಗವತ್!

ಲಂಡನ್: ಲಂಡನ್‌ನಲ್ಲಿ ನಡೆದ ರಾಷ್ಟ್ರೀಯ ಸ್ವಯಂಸೇವಕ ಸಂಘದ (RSS) ಶತಮಾನೋತ್ಸವದ ಔಟ್ರೀಚ್ ಕಾರ್ಯಕ್ರಮದಲ್ಲಿ ಮಾತನಾಡಿದ ಆರ್‌ಎಸ್‌ಎಸ್ ಮುಖ್ಯಸ್ಥ ಮೋಹನ್ ಭಾಗವತ್, ಸಂಘದ ಬಗ್ಗೆ ಇರುವ ತಪ್ಪು ಅಭಿಪ್ರಾಯಗಳನ್ನು ತಳ್ಳಿಹಾಕಿದ್ದಾರೆ.

ಆರ್‌ಎಸ್‌ಎಸ್ ಸಂಘಟನೆಯು ದ್ವೇಷದ ಮೇಲೆ ಅಲ್ಲ, ಬದಲಿಗೆ ‘ಶುದ್ಧ ಸಾತ್ವಿಕ ಪ್ರೇಮ’ ಮತ್ತು ‘ಅಪ್ನಪನ್’ (ಒಡನಾಟ ಹಾಗೂ ಮನುಕುಲದ ಮೇಲಿನ ಒಲವು) ತತ್ವದ ಮೇಲೆ ರೂಪುಗೊಂಡಿದೆ ಎಂದು ಸ್ಪಷ್ಟಪಡಿಸಿದರು.

100 ವರ್ಷಗಳಿಂದ ಈ ತತ್ವವೇ ಸಂಘದ ಕಾರ್ಯಕ್ಕೆ ಅಡಿಪಾಯವಾಗಿದೆ ಎಂದು ಅವರು ಬ್ರಿಟನ್‌ನಲ್ಲಿ ನಡೆದ ಸಭೆಯಲ್ಲಿ ತಿಳಿಸಿದರು.

‘ಶುದ್ಧ ಸಾತ್ವಿಕ ಪ್ರೇಮ’ವೇ ನಮ್ಮ ಮೂಲಾಧಾರ: ಕಾರ್ಯಕ್ರಮದಲ್ಲಿ ಮಾತನಾಡಿದ ಮೋಹನ್ ಭಾಗವತ್, “ಕೆಲವರು ನಮ್ಮ ಕೆಲಸದ ಹಿಂದೆ ತೀವ್ರವಾದ ದ್ವೇಷವಿದೆ ಎಂದು ಹೇಳುವುದನ್ನು ನಾನು ಕೇಳಿದ್ದೇನೆ. ಆದರೆ ವಾಸ್ತವವಾಗಿ ಇದು ಸಂಪೂರ್ಣ ವಿರುದ್ಧವಾಗಿದೆ. ‘ಶುದ್ಧ ಸಾತ್ವಿಕ ಪ್ರೇಮ’ವೇ ನಮ್ಮ ಕಾರ್ಯದ ನಿಜವಾದ ಆಧಾರವಾಗಿದೆ” ಎಂದು ತಿಳಿಸಿದರು. ಸಂಘದ ನಿತ್ಯ ಗೀತೆಯಲ್ಲೂ ಇದೇ ತತ್ವವನ್ನು ಸಾರಲಾಗಿದೆ ಎಂದ ಅವರು, ಕಳೆದ 100 ವರ್ಷಗಳಿಂದ ಸಂಘದ ಸ್ವಯಂಸೇವಕರ ನಡವಳಿಕೆ ಹಾಗೂ ಸಂಘದ ವಾತಾವರಣದಲ್ಲಿ ಇದೇ ಶುದ್ಧ ಪ್ರೇಮವು ಹಾಸುಹೊಕ್ಕಾಗಿದೆ ಎಂದು ಹೇಳಿದರು.

ಅಪ್ನಪನ್ ಮತ್ತು ಹಿಂದೂ ನಾಗರಿಕತೆಯ ತತ್ವ: ಹಿಂದೂ ಚಿಂತನೆಯ ಮೂಲದಲ್ಲಿ ‘ಅಪ್ನಪನ್’ ಅಂದರೆ ಒಡನಾಟ, ಮನುಕುಲದ ಮೇಲಿನ ಒಲವು ಮತ್ತು ಎಲ್ಲರನ್ನೂ ಸ್ವೀಕರಿಸುವ ಭಾವನೆ ಇದೆ ಎಂದು ಭಾಗವತ್ ವಿವರಿಸಿದರು. ಹಿಂದೂ ಎಂದರೆ ಯಾವುದೇ ನಿರ್ದಿಷ್ಟ ಪೂಜಾ ವಿಧಾನ ಅಥವಾ ಜೀವನಶೈಲಿಯಲ್ಲ; ಬದಲಿಗೆ ಸಮಸ್ತ ವೈವಿಧ್ಯತೆಗಳನ್ನು ಗೌರವಿಸುವ ಮತ್ತು ಒಪ್ಪಿಕೊಳ್ಳುವ ಒಂದು ವಿಶಾಲ ಸ್ವಭಾವ ಎಂದು ಅವರು ಅಭಿಪ್ರಾಯಪಟ್ಟರು.

ಜಾಗತಿಕ ಮಟ್ಟದಲ್ಲಿ ಯುದ್ಧಗಳು ಮತ್ತು ಆರ್ಥಿಕ-ತಾಂತ್ರಿಕ ಬಿಕ್ಕಟ್ಟುಗಳು ಎದುರಾಗಿರುವ ಈ ಸಂದರ್ಭದಲ್ಲಿ, ಅಸ್ತಿತ್ವ ಒಂದೇ ಎಂಬ ನಂಬಿಕೆಯೇ ಹಿಂದೂ ಚಿಂತನೆಯ ಪ್ರಮುಖ ಕೊಡುಗೆಯಾಗಿದೆ ಎಂದು ಅವರು ಪ್ರತಿಪಾದಿಸಿದರು. ಬೇರೆ ಬೇರೆ ಮಾರ್ಗಗಳು ಅಥವಾ ನಂಬಿಕೆಗಳನ್ನು ಅನುಸರಿಸಿದ ಮಾತ್ರಕ್ಕೆ ನಾವು ಪರಸ್ಪರ ಬೇರೆಯಾಗಬೇಕಿಲ್ಲ; ಒಟ್ಟಾಗಿ ಬಾಳಬಹುದು ಮತ್ತು ಒಟ್ಟಾಗಿ ಕೆಲಸ ಮಾಡಬಹುದು ಎಂಬುದೇ ಹಿಂದೂ ಜೀವನದ ತತ್ವ ಎಂದು ಮೋಹನ್ ಭಾಗವತ್ ಸ್ಪಷ್ಟಪಡಿಸಿದರು.