ದೇಶಭಕ್ತಿಗೆ ಸಲಾಂ: ಅಮೆಜಾನ್‌ನ 46 ಲಕ್ಷ ರೂ. ಪ್ಯಾಕೇಜ್ ತೊರೆದು ಭಾರತೀಯ ಸೇನೆಗೆ ಸೇರಿದ ಲಖನೌದ ಯುವ ಎಂಜಿನಿಯರ್!

ಲಕ್ನೋ:ದೇಶಸೇವೆಯ ಕನಸು ಮತ್ತು ಸಮವಸ್ತ್ರದ ಮೇಲಿನ ಗೌರವದ ಮುಂದೆ ಬಹುರಾಷ್ಟ್ರೀಯ ಕಂಪನಿಯ ಲಕ್ಷಾಂತರ ರೂಪಾಯಿಗಳ ಸಂಬಳವೂ ಗೌಣ ಎಂಬುದನ್ನು ಲಖನೌ ಮೂಲದ ಯುವ ಎಂಜಿನಿಯರ್ ಒಬ್ಬರು ಸಾಬೀತುಪಡಿಸಿದ್ದಾರೆ.

ಜಾಗತಿಕ ಇ-ಕಾಮರ್ಸ್ ದೈತ್ಯ ಅಮೆಜಾನ್‌ನಲ್ಲಿ (Amazon) ವಾರ್ಷಿಕ ಸುಮಾರು ₹46 ಲಕ್ಷ ಪ್ಯಾಕೇಜ್ ಪಡೆಯುತ್ತಿದ್ದ 27 ವರ್ಷದ ಕ್ಲೌಡ್ ಎಂಜಿನಿಯರ್ ಶಾರ್ದೇಂದು ತಿವಾರಿ, ತಮ್ಮ ಕಾರ್ಪೊರೇಟ್ ವೃತ್ತಿಜೀವನಕ್ಕೆ ವಿದಾಯ ಹೇಳಿ ಭಾರತೀಯ ಸೇನೆಗೆ ಸೇರ್ಪಡೆಗೊಂಡಿದ್ದಾರೆ. ಬಿಹಾರದ ಗಯಾದಲ್ಲಿರುವ ಆಫೀಸರ್ಸ್ ಟ್ರೈನಿಂಗ್ ಅಕಾಡೆಮಿಯಲ್ಲಿ ಕಠಿಣ ತರಬೇತಿ ಪೂರ್ಣಗೊಳಿಸಿರುವ ಅವರು, ಸೇನೆಯಲ್ಲಿ ಲೆಫ್ಟಿನೆಂಟ್ ಅಧಿಕಾರಿಯಾಗಿ ಅಧಿಕೃತವಾಗಿ ಕಾರ್ಯಾರಂಭ ಮಾಡಲು ಸಜ್ಜಾಗಿದ್ದಾರೆ.

ಲಖನೌ ನಿವಾಸಿಯಾದ ಶಾರ್ದೇಂದು ತಿವಾರಿ ಚಂಡೀಗಢದ ಪಂಜಾಬ್ ಎಂಜಿನಿಯರಿಂಗ್ ಕಾಲೇಜಿನಲ್ಲಿ (PEC) ಬಿ.ಇ ಮತ್ತು ಕಂಪ್ಯೂಟರ್ ಸೈನ್ಸ್‌ನಲ್ಲಿ ಎಂ.ಟೆಕ್ ಪದವಿ ಪಡೆದಿದ್ದರು. ಅಮೆಜಾನ್ ಮಾತ್ರವಲ್ಲದೆ ವಿಮಾನ ತಯಾರಿಕಾ ದೈತ್ಯ ಸಂಸ್ಥೆ ‘ಏರ್‌ಬಸ್’ನಿಂದಲೂ ಅತ್ಯುತ್ತಮ ಉದ್ಯೋಗಾವಕಾಶ ಲಭಿಸಿದ್ದರೂ, ದೇಶಸೇವೆಯನ್ನೇ ತಮ್ಮ ಪ್ರಮುಖ ಧ್ಯೇಯವಾಗಿಸಿಕೊಂಡು ಎಲ್ಲಾ ಐಷಾರಾಮಿ ಕೊಡುಗೆಗಳನ್ನು ಅವರು ತಿರಸ್ಕರಿಸಿದರು. ಇವರ ತಂದೆ ಗೌರವ ಕ್ಯಾಪ್ಟನ್ ರಾಜ್ ಕುಮಾರ್ ತಿವಾರಿ ಅವರು ಆರ್ಮಿ ಸರ್ವಿಸ್ ಕಾರ್ಪ್ಸ್‌ನಲ್ಲಿ (ASC) 36 ವರ್ಷಗಳ ಕಾಲ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದು, ತಂದೆಯ ಸ್ಪೂರ್ತಿಯೇ ಶಾರ್ದೇಂದು ಅವರ ಈ ನಿರ್ಧಾರಕ್ಕೆ ಪ್ರಮುಖ ಕಾರಣವಾಗಿದೆ.

ಕಾರ್ಪೊರೇಟ್ ಕೆಲಸಕ್ಕೆ ವಿದಾಯ: ಅಮೆಜಾನ್‌ನಲ್ಲಿ 46 ಲಕ್ಷ ರೂ. ವೇತನ ಹಾಗೂ ಏರ್‌ಬಸ್ ಆಫರ್ ಪಡೆದಿದ್ದರೂ, ದೇಶಸೇವೆಯ ದ್ಯೇಯಕ್ಕಾಗಿ ಎಲ್ಲವನ್ನೂ ತೊರೆದ ಶಾರ್ದೇಂದು ತಿವಾರಿ.

ಒಟಿಎ ಗಯಾದಲ್ಲಿ ತರಬೇತಿ: ಬಿಹಾರದ ಆಫೀಸರ್ಸ್ ಟ್ರೈನಿಂಗ್ ಅಕಾಡೆಮಿಯಲ್ಲಿ ಕಠಿಣ ತರಬೇತಿ ಪೂರ್ಣಗೊಳಿಸಿ ‘ಸೀನಿಯರ್ ಅಂಡರ್ ಆಫೀಸರ್’ (SUO) ಜವಾಬ್ದಾರಿ ನಿರ್ವಹಣೆ.

ಕುಟುಂಬದ ಹಿನ್ನೆಲೆ: ಆರ್ಮಿ ಸರ್ವಿಸ್ ಕಾರ್ಪ್ಸ್‌ನಲ್ಲಿ 36 ವರ್ಷ ಸೇವೆ ಸಲ್ಲಿಸಿ ನಿವೃತ್ತರಾದ ಗೌರವ ಕ್ಯಾಪ್ಟನ್ ರಾಜ್ ಕುಮಾರ್ ತಿವಾರಿ ಅವರ ಪುತ್ರ.

ಕಾರ್ಪೊರೇಟ್ ಪ್ರಪಂಚದ ಆರಾಮದಾಯಕ ಜೀವನ ಹಾಗೂ ಲಕ್ಷಾಂತರ ರೂಪಾಯಿಗಳ ಆದಾಯದ ಭವಿಷ್ಯಕ್ಕಿಂತ ದೇಶದ ಗಡಿ ಕಾಯುವ ಸವಾಲನ್ನೇ ಹೆಮ್ಮೆಯಿಂದ ಆಯ್ಕೆ ಮಾಡಿಕೊಂಡಿರುವ ಶಾರ್ದೇಂದು ತಿವಾರಿ ಅವರ ಈ ಪಯಣ ಇಂದಿನ ಯುವಪೀಳಿಗೆಗೆ ದೊಡ್ಡ ಸ್ಫೂರ್ತಿಯಾಗಿದೆ.