ಐಪಿಎಲ್ ಖರೀದಿಸಲು ದಾವೂದ್ ಇಬ್ರಾಹಿಂ ಪ್ಲಾನ್ ಮಾಡಿದ್ದನೇ? ಲಲಿತ್ ಮೋದಿ ಸ್ಫೋಟಕ ಹೇಳಿಕೆ!

ಮುಂಬೈ: ಮಾಜಿ ಐಪಿಎಲ್ ಕಮಿಷನರ್ ಲಲಿತ್ ಮೋದಿ ಅವರು ಕ್ರಿಕೆಟ್ ಆಡಳಿತದಿಂದ ಶಾಶ್ವತವಾಗಿ ದೂರ ಸರಿಯಲು ಅಂಡರ್‌ವರ್ಲ್ಡ್ ಡಾನ್ ದಾವೂದ್ ಇಬ್ರಾಹಿಂ ಮತ್ತು ಆತನ ‘ಡಿ-ಕಂಪನಿ’ ಗ್ಯಾಂಗ್ ನೀಡಿದ ಜೀವ ಬೆದರಿಕೆಗಳೇ ಮುಖ್ಯ ಕಾರಣ ಎಂದು ಸ್ಫೋಟಕ ಆರೋಪ ಮಾಡಿದ್ದಾರೆ.

ಲಂಡನ್‌ನಲ್ಲಿ ನಡೆದ ಮುಖಾಮುಖಿ:

2012ರಲ್ಲಿ ಲಂಡನ್‌ನಲ್ಲಿ ತಡರಾತ್ರಿ ನಡೆದ ಸಭೆಯೊಂದರಲ್ಲಿ ಮಧ್ಯವರ್ತಿಯೊಬ್ಬ ಸ್ಯಾಟಲೈಟ್ ಫೋನ್ ಮೂಲಕ ದಾವೂದ್ ಇಬ್ರಾಹಿಂಗೆ ಕರೆ ಮಾಡಿ ಸ್ಪೀಕರ್‌ನಲ್ಲಿ ಹಾಕಿದ್ದನು. ಆಗ ದಾವೂದ್, “ಅಭಿ ಸೇ ತುಮ್ಹಾರಾ ಸಬ್ ಕಾಮ್ ಖತಮ್” (ಇಂದಿನಿಂದ ನಿನ್ನ ಎಲ್ಲಾ ಕೆಲಸ ಮುಗಿಯಿತು) ಎಂದು ಬೆದರಿಕೆ ಹಾಕಿದ್ದಾಗಿ ಮೋದಿ ತಿಳಿಸಿದ್ದಾರೆ.

ಐಪಿಎಲ್ ಫ್ರಾಂಚೈಸಿಗಾಗಿ ಒತ್ತಡ:

ಬೆದರಿಕೆಯ ಬೆನ್ನಲ್ಲೇ ಭೂಗತ ಜಗತ್ತು ತನಗೆ ಹಣಕಾಸಿನ ನಷ್ಟ ಪರಿಹಾರ ನೀಡಬೇಕು ಮತ್ತು ಐಪಿಎಲ್ ಫ್ರಾಂಚೈಸಿಯೊಂದರ ನಿಯಂತ್ರಣವನ್ನು ತಮಗೆ ಒಪ್ಪಿಸಬೇಕು ಎಂದು ವಾರಕ್ಕೊಮ್ಮೆ ಕರೆ ಮಾಡಿ ಕಿರುಕುಳ ನೀಡುತ್ತಿತ್ತು ಎಂದು ಆರೋಪಿಸಿದ್ದಾರೆ.

ಬೆಟ್ಟಿಂಗ್ ಮಾರುಕಟ್ಟೆಗೆ ಹೊಡೆತ:

2009ರಲ್ಲಿ ಭಾರತದ ಸಾರ್ವತ್ರಿಕ ಚುನಾವಣೆಗಳ ಕಾರಣದಿಂದ ಐಪಿಎಲ್ ಟೂರ್ನಿಯನ್ನು ದಿಢೀರ್ ಆಗಿ ದಕ್ಷಿಣ ಆಫ್ರಿಕಾಕ್ಕೆ ಸ್ಥಳಾಂತರಿಸಲಾಗಿತ್ತು. ಇದರಿಂದಾಗಿ ಐಪಿಎಲ್ ರದ್ದಾಗುತ್ತದೆ ಎಂದು ನಂಬಿ ಬೆಟ್ಟಿಂಗ್ ಕಟ್ಟಿದ್ದ ಭೂಗತ ಬುಕ್ಕಿಗಳಿಗೆ ಭಾರಿ ನಷ್ಟವಾಗಿತ್ತು. ಈ ನಷ್ಟಕ್ಕೆ ಲಲಿತ್ ಮೋದಿ ಅವರೇ ಕಾರಣ ಎಂದು ಗ್ಯಾಂಗ್ ಕೋಪಿಸಿಕೊಂಡಿತ್ತು.

ಕೊಲೆ ಯತ್ನಗಳ ಆರೋಪ:

ಮುಂಬೈ ನಿವಾಸದ ಹೊರಗೆ ನಡೆದ ಶೂಟೌಟ್, ಜೋಹಾನ್ಸ್‌ಬರ್ಗ್ ಮತ್ತು ಕ್ರೊಯೇಷಿಯಾ ಗಡಿಯಲ್ಲಿ ನಡೆದ ಕೊಲೆ ಸಂಚುಗಳು ಹಾಗೂ ಲಂಡನ್‌ನಲ್ಲಿ ತನ್ನ ಮಗನ ಅಪಹರಣದ ಯತ್ನ ಸೇರಿದಂತೆ ತನ್ನ ಮೇಲೆ ಹಲವು ಬಾರಿ ಹಲ್ಲೆಗೆ ಸ್ಕೆಚ್ ಹಾಕಲಾಗಿತ್ತು ಎಂದು ಮೋದಿ ಹೇಳಿದ್ದಾರೆ.

ಕ್ರಿಕೆಟ್ ತೊರೆಯುವ ಒಪ್ಪಂದ:

ಕೊನೆಗೆ ತಾನು ಕ್ರಿಕೆಟ್ ಆಡಳಿತದಿಂದ ಸಂಪೂರ್ಣವಾಗಿ ನಿವೃತ್ತಿ ಹೊಂದುತ್ತೇನೆ ಎಂದು ಮಾತು ಕೊಟ್ಟ ನಂತರವೇ ದಾವೂದ್ ಗ್ಯಾಂಗ್ ತನ್ನನ್ನು ಹಿಟ್‌ಲಿಸ್ಟ್‌ನಿಂದ ಕೈಬಿಟ್ಟಿತು ಎಂದು ಮೋದಿ ಬಹಿರಂಗಪಡಿಸಿದ್ದಾರೆ.

ಹಿನ್ನೆಲೆ:

2010ರಲ್ಲಿ ಹಣಕಾಸು ಅಕ್ರಮಗಳು ಮತ್ತು ಅವ್ಯವಸ್ಥೆಯ ಆರೋಪದ ಮೇಲೆ ಬಿಸಿಸಿಐ (BCCI) ಲಲಿತ್ ಮೋದಿ ಅವರನ್ನು ಅಮಾನತುಗೊಳಿಸಿತ್ತು. ತದನಂತರ 2013ರಲ್ಲಿ ಅವರಿಗೆ ಆಜೀವ ನಿಷೇಧ ಹೇರಲಾಗಿತ್ತು. ಮೋದಿ ಅವರು 2010 ರಿಂದ ಲಂಡನ್‌ನಲ್ಲಿ ನೆಲೆಸಿದ್ದು, ಭಾರತೀಯ ತನಿಖಾ ಸಂಸ್ಥೆಗಳು ಅವರ ವಿರುದ್ಧ ತನಿಖೆ ನಡೆಸುತ್ತಿವೆ. ಆದರೆ ತಾನು ದೇಶ ತೊರೆಯಲು ಭೂಗತ ಜಗತ್ತಿನ ಭಯವೇ ಕಾರಣ ಎಂದು ಮೋದಿ ವಾದಿಸುತ್ತಿದ್ದಾರೆ.