‘ಮಿಮಿ’ ಚಿತ್ರಕ್ಕಾಗಿ ದಪ್ಪ ಆಗ್ತಿದ್ದಾಗಲೇ ಅಂಡಾಣು ಫ್ರೀಜ್ ಮಾಡಿಸಿದ್ದೆ: ಕೃತಿ ಸನೋನ್ ರಹಸ್ಯ ಬಯಲು!

ಬೆಂಗಳೂರು/ಮುಂಬೈ: ಬಾಲಿವುಡ್‌ನ ಪ್ರತಿಭಾವಂತ ಹಾಗೂ ನೇರ ನುಡಿಯ ನಟಿ ಕೃತಿ ಸನೋನ್ ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ತಮ್ಮ ವೈಯಕ್ತಿಕ ಜೀವನದ ಅತ್ಯಂತ ಪ್ರಮುಖ ನಿರ್ಧಾರವೊಂದನ್ನು ಬಹಿರಂಗಪಡಿಸಿದ್ದಾರೆ. 2021ರ ಸೂಪರ್ ಹಿಟ್ ಸಿನಿಮಾ ‘ಮಿಮಿ’ ಚಿತ್ರಕ್ಕಾಗಿ ತೂಕ ಹೆಚ್ಚಿಸಿಕೊಳ್ಳುತ್ತಿದ್ದ ಸಮಯದಲ್ಲಿ ತಾವು ತಮ್ಮ ಅಂಡಾಣುಗಳನ್ನು (Eggs) ಫ್ರೀಜ್ ಮಾಡಿಸಿದ್ದಾಗಿ ಕೃತಿ ಮೊದಲ ಬಾರಿಗೆ ಮುಕ್ತವಾಗಿ ಹಂಚಿಕೊಂಡಿದ್ದಾರೆ.

ಬಯೋಲಾಜಿಕಲ್ ಕ್ಲಾಕ್ ಹಾಗೂ ಎಗ್ ಫ್ರೀಸಿಂಗ್ ಬಗ್ಗೆ ಕೃತಿ ಹೇಳಿದ್ದೇನು?

‘ಹ್ಯೂಮನ್ಸ್ ಆಫ್ ಬಾಂಬೆ’ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ನಿರೂಪಕರು ಮದುವೆ ಮತ್ತು ಮಹಿಳೆಯರ ‘ಬಯೋಲಾಜಿಕಲ್ ಕ್ಲಾಕ್’ (Biological Clock) ಬಗ್ಗೆ ಪ್ರಶ್ನಿಸಿದಾಗ ಕೃತಿ ಈ ರಹಸ್ಯವನ್ನು ಬಿಚ್ಚಿಟ್ಟರು.

“ನಾನು ಈ ವಿಷಯವನ್ನು ಮೊದಲ ಬಾರಿಗೆ ಸಾರ್ವಜನಿಕವಾಗಿ ಹೇಳುತ್ತಿದ್ದೇನೆ. ನಾನು ನನ್ನ ಎಗ್ಸ್ ಫ್ರೀಜ್ ಮಾಡಿಸಿದ್ದೇನೆ. ‘ಮಿಮಿ’ ಚಿತ್ರದ ಪಾತ್ರಕ್ಕಾಗಿ ನಾನು ತೂಕ ಹೆಚ್ಚಿಸಿಕೊಳ್ಳಬೇಕಿತ್ತು. ಅದೇ ಸಮಯದಲ್ಲಿ ನಾನು ಬಹಳ ಜಾಣತನದಿಂದ ಈ ನಿರ್ಧಾರ ಕೈಗೊಂಡೆ. ಸಾಮಾನ್ಯವಾಗಿ ಎಗ್ ಫ್ರೀಸಿಂಗ್ ಪ್ರಕ್ರಿಯೆಯಿಂದಾಗಿ ಹಾರ್ಮೋನ್ ಬದಲಾವಣೆಗಳಾಗಿ ದೇಹ ಸ್ವಲ್ಪ ಊದಿಕೊಳ್ಳುತ್ತದೆ (Bloating). ನಾನು ಹೇಗಿದ್ದರೂ ಚಿತ್ರಕ್ಕಾಗಿ ತೂಕ ಹೆಚ್ಚಿಸಿಕೊಳ್ಳುತ್ತಿದ್ದರಿಂದ, ಇದೇ ಸರಿಯಾದ ಸಮಯ ಎಂದು ನಿರ್ಧರಿಸಿದೆ,” ಎಂದು ಕೃತಿ ವಿವರಿಸಿದ್ದಾರೆ.

ತಮಗೆ ಪರಿಚಯಸ್ಥರೊಬ್ಬರು ನೀಡಿದ ಸಲಹೆ ಈ ನಿರ್ಧಾರಕ್ಕೆ ಪ್ರೇರಣೆಯಾಯಿತು ಎಂದ ನಟಿ, “ನಿಮಗೆ ನೀವೇ ಕೊಟ್ಟುಕೊಳ್ಳಬಹುದಾದ ಅತ್ಯುತ್ತಮ ಉಡುಗೊರೆ ಮತ್ತು ಸುರಕ್ಷತೆ ಇದು ಎಂದು ಯಾರೋ ನನಗೆ ಹೇಳಿದ್ದರು. ಅದು ನನ್ನ ಮನಸ್ಸಿನಲ್ಲಿ ಗಾಢವಾಗಿ ಉಳಿದಿತ್ತು. ಹಾಗಾಗಿ ಇದೊಂದು ಸ್ಮಾರ್ಟ್ ನಿರ್ಧಾರವಾಗಿತ್ತು. ವಯಸ್ಸಾಗುತ್ತಿದೆ ಎಂಬ ಕಾರಣಕ್ಕೆ ಅಥವಾ ಸಮಾಜದ ಒತ್ತಡಕ್ಕೆ ಮದುವೆ, ಮಕ್ಕಳ ನಿರ್ಧಾರ ಮಾಡಬಾರದು” ಎಂದು ಹೇಳಿದ್ದಾರೆ.

ಕೃತಿ ವೃತ್ತಿಜೀವನಕ್ಕೆ ಮೈಲಿಗಲ್ಲಾಗಿದ್ದ ‘ಮಿಮಿ’:

ಲಕ್ಷ್ಮಣ್ ಉಟೇಕರ್ ನಿರ್ದೇಶನದ ‘ಮಿಮಿ’ ಸಿನಿಮಾ ಕೃತಿ ಸನೋನ್ ಅವರ ಸಿನಿಮಾ ಜರ್ನಿಯಲ್ಲಿ ಅತ್ಯಂತ ಮಹತ್ವದ ಚಿತ್ರ. ಬಾಡಿಗೆ ತಾಯ್ತನ (Surrogacy) ಮತ್ತು ಮಾತೃತ್ವದ ಭಾವನಾತ್ಮಕ ಕಥೆ ಹೊಂದಿದ್ದ ಈ ಚಿತ್ರದಲ್ಲಿನ ಅತ್ಯುತ್ತಮ ನಟನೆಗಾಗಿ ಕೃತಿಗೆ ಪ್ರತಿಷ್ಠಿತ ‘ರಾಷ್ಟ್ರ ಪ್ರಶಸ್ತಿ’ (National Film Award) ಕೂಡ ಒಲಿದಿತ್ತು. ಈ ಪಾತ್ರಕ್ಕಾಗಿ ಅವರು ಸುಮಾರು 15 ಕೆಜಿಯಷ್ಟು ತೂಕ ಹೆಚ್ಚಿಸಿಕೊಂಡಿದ್ದರು.

ಇತ್ತೀಚೆಗಷ್ಟೇ ಶಾಹಿದ್ ಕಪೂರ್ ಮತ್ತು ರಶ್ಮಿಕಾ ಮಂದಣ್ಣ ನಟನೆಯ ‘ಕಾಕ್‌ಟೇಲ್ 2’ ಸಿನಿಮಾ ಮೂಲಕ ಮತ್ತೊಂದು ಯಶಸ್ಸು ಕಂಡಿರುವ ಕೃತಿ, ಸದ್ಯ ಲಂಡನ್ ಮೂಲದ ಉದ್ಯಮಿ ಕಬೀರ್ ಬಹಿಯಾ ಅವರೊಂದಿಗೆ ಡೇಟಿಂಗ್ ಮಾಡುತ್ತಿದ್ದಾರೆ ಎಂಬ ವದಂತಿಗಳು ಹರಿದಾಡುತ್ತಿವೆ. ಆದರೆ ತಮ್ಮ ಮುಂದಿನ ಸಿನಿಮಾಗಳ ಬಗ್ಗೆ ನಟಿ ಇನ್ನೂ ಅಧಿಕೃತ ಘೋಷಣೆ ಮಾಡಿಲ್ಲ.