ವಿಶ್ವಸಂಸ್ಥೆಯಲ್ಲಿ ಪಾಕಿಸ್ತಾನಕ್ಕೆ ಭಾರತದ ತಪರಾಕಿ: ‘ಫ್ರಾಂಕೆನ್‌ಸ್ಟೈನ್ ದೇಶ’ ಎಂದು ಕರೆದ ರಾಜತಾಂತ್ರಿಕ ಅನುಪಮಾ ಸಿಂಗ್!

ನ್ಯೂಸ್ ಡೆಸ್ಕ್: ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಮಂಡಳಿ (UNHRC) ಸಭೆಯಲ್ಲಿ ಭಾರತವು ಪಾಕಿಸ್ತಾನದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದೆ. ಭಯೋತ್ಪಾದನೆಯನ್ನು ತನ್ನ ದೇಶದ ಅಧಿಕೃತ ನೀತಿಯನ್ನಾಗಿ ಪೋಷಿಸಿಕೊಂಡು ಬಂದಿರುವ ಪಾಕಿಸ್ತಾನವನ್ನು ಭಾರತವು ‘ಫ್ರಾಂಕೆನ್‌ಸ್ಟೈನ್ ಸ್ಟೇಟ್’ (ತಾನೇ ಸೃಷ್ಟಿಸಿದ ರಾಕ್ಷಸನಿಗೆ ಬಲಿಯಾಗುತ್ತಿರುವ ದೇಶ) ಎಂದು ಬಣ್ಣಿಸಿದೆ.

ವಿಶ್ವಸಂಸ್ಥೆಯಲ್ಲಿನ ಭಾರತದ ಖಾಯಂ ಮಿಷನ್‌ನ ಮೊದಲ ಕಾರ್ಯದರ್ಶಿ ಅನುಪಮಾ ಸಿಂಗ್ ಮಾತನಾಡಿ, “ಭಯೋತ್ಪಾದನೆಯನ್ನು ಸಾಕಿ ಬೆಳೆಸುವ ಪಾಕಿಸ್ತಾನ, ಇಂದು ತಾನು ಸಾಕಿದ ಜಿಹಾದಿ ಶಕ್ತಿಗಳೇ ತನ್ನ ವಿರುದ್ಧ ತಿರುಗಿಬಿದ್ದಾಗ ತಾನು ಸಂತ್ರಸ್ತೆ ಎಂದು ನಾಟಕವಾಡುತ್ತಿದೆ.

ಇದು ಕೇವಲ ಪಾಕಿಸ್ತಾನಕ್ಕೆ ಮಾತ್ರ ಸಾಧ್ಯವಿರುವ ವಿಪರ್ಯಾಸ” ಎಂದು ವ್ಯಂಗ್ಯವಾಡಿದರು. ಭಯೋತ್ಪಾದಕರಿಗೆ ತರಬೇತಿ ಹಾಗೂ ಹಣಕಾಸು ನೆರವು ನೀಡುವುದನ್ನು ಪಾಕ್ ರಕ್ಷಣಾ ಸಚಿವ ಖವಾಜಾ ಆಸಿಫ್ ಅವರೇ ಈ ಹಿಂದೆ ಒಪ್ಪಿಕೊಂಡಿರುವುದನ್ನು ಅವರು ನೆನಪಿಸಿದರು.

PoK ದೌರ್ಜನ್ಯದ ವಿರುದ್ಧ ಆಕ್ರೋಶ:

ಇದೇ ವೇಳೆ ಪಾಕ್ ಆಕ್ರಮಿತ ಕಾಶ್ಮೀರದ (PoK) ರಾವಲಕೋಟ್‌ನಲ್ಲಿ ಇತ್ತೀಚೆಗೆ ಹೆಚ್ಚುತ್ತಿರುವ ಬೆಲೆ ಏರಿಕೆ ಹಾಗೂ ಆರ್ಥಿಕ ಬಿಕ್ಕಟ್ಟಿನ ವಿರುದ್ಧ ನಡೆದ ಪ್ರತಿಭಟನೆಗಳ ಮೇಲಿನ ಪಾಕ್ ಸೇನೆಯ ದೌರ್ಜನ್ಯವನ್ನು ಅನುಪಮಾ ಸಿಂಗ್ ತೀವ್ರವಾಗಿ ಖಂಡಿಸಿದರು. “PoK ಯಲ್ಲಿ ಅಲ್ಲಿನ ಜನರು ಆಹಾರಕ್ಕಾಗಿ (ಬ್ರೆಡ್) ಬೇಡಿಕೆಯಿಟ್ಟರೆ, ಪಾಕ್ ಸರ್ಕಾರ ಅವರಿಗೆ ಬುಲೆಟ್‌ ಹಾಗೂ ಕ್ರೌರ್ಯವನ್ನು ಉಡುಗೊರೆಯಾಗಿ ನೀಡುತ್ತಿದೆ” ಎಂದು ಆಕ್ರೋಶ ಹೊರಹಾಕಿದರು.

ಜಮ್ಮು ಮತ್ತು ಕಾಶ್ಮೀರವು ಭಾರತದ ಅವಿಭಾಜ್ಯ ಅಂಗವಾಗಿದ್ದು, ಪಾಕಿಸ್ತಾನದ ಕಾನೂನುಬಾಹಿರ ಆಕ್ರಮಣದಿಂದ ಆ ಪ್ರದೇಶಗಳನ್ನು ಮರಳಿ ಪಡೆಯುವುದೊಂದೇ ಈಗ ಉಳಿದಿರುವ ಏಕೈಕ ವಿಷಯವಾಗಿದೆ ಎಂದು ಭಾರತ ಸ್ಪಷ್ಟಪಡಿಸಿದೆ.