ಇನ್‌ಸ್ಟಾಗ್ರಾಮ್ ಮೂಲಕ ಆಹ್ವಾನ, ರಹಸ್ಯ ರೇವ್ ಪಾರ್ಟಿ: ಮೂವರಿಗೆ ಗಾಂಜಾ ಪಾಸಿಟಿವ್ ದೃಢ, 108 ವಿದ್ಯಾರ್ಥಿಗಳು ಭಾಗಿ!

ಹೈದರಾಬಾದ್: ತೆಲಂಗಾಣದ ಹೈದರಾಬಾದ್ ಹೊರವಲಯದಲ್ಲಿ ಯಾವುದೇ ಅನುಮತಿಯಿಲ್ಲದೆ ಆಯೋಜಿಸಲಾಗಿದ್ದ ವಿದ್ಯಾರ್ಥಿಗಳ ರಹಸ್ಯ ಪಾರ್ಟಿ ಮೇಲೆ ಸ್ಪೆಷಲ್ ಆಪರೇಷನ್ ಟೀಮ್ ಮತ್ತು ಸ್ಥಳೀಯ ಪೊಲೀಸರು ಜಂಟಿಯಾಗಿ ಹಠಾತ್ ದಾಳಿ ನಡೆಸಿದ್ದಾರೆ. ಈ ಪಾರ್ಟಿಯಲ್ಲಿ ಸುಮಾರು 108 ವಿದ್ಯಾರ್ಥಿಗಳು ಪಾಲ್ಗೊಂಡಿರುವುದು ಪತ್ತೆಯಾಗಿದ್ದು, ಡ್ರಗ್ ಪರೀಕ್ಷೆಯಲ್ಲಿ ಮೂವರಿಗೆ ಗಾಂಜಾ ಸೇವಿಸಿರುವುದು ದೃಢಪಟ್ಟಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಚೇವಳ್ಳ ಪೊಲೀಸ್ ಠಾಣಾ ವ್ಯಾಪ್ತಿಯ ಕಮ್ಮೆಟ ಗ್ರಾಮದ ಹೊರವಲಯದಲ್ಲಿರುವ ಎಲ್‌ಜಿ ಫಾರ್ಮ್‌ಹೌಸ್‌ನಲ್ಲಿ ಈ ಪಾರ್ಟಿ ಆಯೋಜಿಸಲಾಗಿತ್ತು. ಪ್ರಮುಖ ಆರೋಪಿ ಮನ್ನನ್ ಎಂಬಾತ ತನ್ನ ಇನ್‌ಸ್ಟಾಗ್ರಾಮ್ ಖಾತೆ ಮೂಲಕ ಆಹ್ವಾನ ನೀಡಿದ್ದು, ಪಾರ್ಟಿ ನಡೆಯುವ ಸ್ಥಳವನ್ನು ಗೌಪ್ಯವಾಗಿಟ್ಟುಕೊಂಡು ಕೊನೆ ಕ್ಷಣದಲ್ಲಿ ಲೊಕೇಶನ್ ಕಳುಹಿಸಿದ್ದನು. ಭಾಗವಹಿಸುವವರಿಂದ ತಲಾ ₹1,000 ದಿಂದ ₹2,000 ವರೆಗೆ ಪ್ರವೇಶ ಶುಲ್ಕ ವಸೂಲಿ ಮಾಡಲಾಗಿದ್ದು, ಐಬಿಎಸ್ ಐಎಫ್‌ಎಚ್‌ಇ  ವಿಶ್ವವಿದ್ಯಾಲಯದ ಬಿಬಿಎ ಹಾಗೂ ಇಂಜಿನಿಯರಿಂಗ್ ವಿದ್ಯಾರ್ಥಿಗಳು ಹೆಚ್ಚಿನ ಸಂಖ್ಯೆಯಲ್ಲಿದ್ದರು.

ಅನುಮತಿ ರಹಿತ ರಹಸ್ಯ ಪಾರ್ಟಿ: ಯಾವುದೇ ಅಧಿಕೃತ ಪರವಾನಗಿ ಪಡೆಯದೆ ಹೈದರಾಬಾದ್ ಸುತ್ತಮುತ್ತಲಿನ ವಿದ್ಯಾರ್ಥಿಗಳನ್ನು ಸೇರಿಸಿ ಫಾರ್ಮ್‌ಹೌಸ್‌ನಲ್ಲಿ ಪಾರ್ಟಿ ನಡೆಸಲಾಗಿದೆ.

ಡ್ರಗ್ ಪರೀಕ್ಷೆ ದೃಢ: ಪಾರ್ಟಿಯಲ್ಲಿದ್ದ 108 ವಿದ್ಯಾರ್ಥಿಗಳಿಗೆ ವೈದ್ಯಕೀಯ ಪರೀಕ್ಷೆ ನಡೆಸಲಾಗಿದ್ದು, ಆಯೋಜಕ ಮನ್ನನ್ ಸೇರಿದಂತೆ ಮೂವರಿಗೆ ಗಾಂಜಾ ಸೇವಿಸಿರುವುದು (ಪಾಸಿಟಿವ್) ದೃಢಪಟ್ಟಿದೆ.

ಭಾರಿ ಪ್ರಮಾಣದ ಮದ್ಯ ವಶ: ಸ್ಥಳದಲ್ಲಿ ಭಾರಿ ಪ್ರಮಾಣದ ಮದ್ಯದ ಬಾಟಲಿಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ಪಾರ್ಟಿಗೆ ಗಾಂಜಾ ಪೂರೈಸಿದವರ ಬಗ್ಗೆ ತನಿಖೆ ಮುಂದುವರಿದಿದೆ.

ಸರ್ಕಾರದ ಕಠಿಣ ಕ್ರಮದ ನಡುವೆ ಘಟನೆ: ತೆಲಂಗಾಣ ಸರ್ಕಾರವು ಮಾದಕ ವಸ್ತುಗಳ ವಿರುದ್ಧ ‘ಈಗಲ್ ಫೋರ್ಸ್’ ರಚಿಸಿ ಕಠಿಣ ಕ್ರಮಕೈಗೊಳ್ಳುತ್ತಿರುವ ಬೆನ್ನಲ್ಲೇ ಈ ಘಟನೆ ಬೆಳಕಿಗೆ ಬಂದಿರುವುದು ತೀವ್ರ ಚರ್ಚೆಗೆ ಗ್ರಾಸವಾಗಿದೆ.