ಪತಿಗೆ ಬೈಕ್ ಕೊಡಿಸಲು ಓವರ್ ಟೈಂ ಡ್ಯೂಟಿ ಮಾಡ್ತಿದ್ದ ಹೆಂಡತಿ ಮೇಲೆ ಅನುಮಾನ: ಆಫೀಸ್‌ನಲ್ಲಿ ಸಿಸಿಟಿವಿ ಇಟ್ಟ ಗಂಡ, ಫುಟೇಜ್ ನೋಡಿ ಕಣ್ಣೀರಿಟ್ಟಿದ್ದೇಕೆ?

ನವದೆಹಲಿ: ಸಾಮಾನ್ಯವಾಗಿ ದಾಂಪತ್ಯ ಜೀವನದಲ್ಲಿ ಸಣ್ಣ ಅನುಮಾನವೂ ದೊಡ್ಡ ಬಿರುಕನ್ನು ಉಂಟುಮಾಡುತ್ತದೆ. ಆದರೆ, ಇಲ್ಲೊಂದು ಅಪರೂಪದ ಘಟನೆಯಲ್ಲಿ ಪತಿಯ ಅನುಮಾನ ಕೊನೆಗೆ ಆತನ ಕಣ್ಣೀರ ಪಶ್ಚಾತ್ತಾಪವಾಗಿ ಬದಲಾಗಿದೆ. ಪ್ರತಿದಿನ ಕೆಲಸ ಮುಗಿಸಿ ಮನೆಗೆ ತಡವಾಗಿ ಬರುತ್ತಿದ್ದ ಪತ್ನಿಯ ನಡತೆಯ ಮೇಲೆ ಅನುಮಾನಗೊಂಡ ಪತಿಯೊಬ್ಬ, ಆಕೆಯ ಕಚೇರಿಯಲ್ಲಿ ರಹಸ್ಯವಾಗಿ ಸಿಸಿಟಿವಿ ಕ್ಯಾಮೆರಾ ಅಳವಡಿಸಿ ಸತ್ಯ ತಿಳಿಯಲು ಯತ್ನಿಸಿದ್ದಾನೆ. ಆದರೆ, ಅಲ್ಲಿ ಸೆರೆಯಾದ ದೃಶ್ಯಗಳನ್ನು ಕಂಡ ಪತಿಗೆ ತನ್ನ ತಪ್ಪಿನ ಅರಿವಾಗಿ ಎದೆ ಒಡೆದುಹೋದಂತಾಗಿದೆ.

ಸಿಸಿಟಿವಿ ಕ್ಯಾಮೆರಾ ಇಟ್ಟಿದ್ದ ಗಂಡ:

ಕೆಲವು ದಿನಗಳಿಂದ ಹೆಂಡತಿ ಆಫೀಸ್‌ನಿಂದ ಮನೆಗೆ ಬರಲು ತಡವಾಗುತ್ತಿದ್ದುದು ಪತಿಯಲ್ಲಿ ತೀವ್ರ ಆತಂಕ ಹಾಗೂ ಅನುಮಾನವನ್ನು ಮೂಡಿಸಿತ್ತು. ದಿನವೂ ಇಷ್ಟು ತಡವಾಗಿ ಏಕೆ ಬರುತ್ತಿದ್ದಾಳೆ ಎಂಬ ಆಲೋಚನೆಯೇ ಆತನನ್ನು ಮಾನಸಿಕವಾಗಿ ಕುಂದಿಸಿತ್ತು. ಈ ವಿಷಯವನ್ನು ತಡೆಯಲಾಗದೆ, ಪತಿ ತನ್ನ ಹೆಂಡತಿಯೊಂದಿಗೆ ಕೆಲಸ ಮಾಡುವ ಮಹಿಳಾ ಸಹೋದ್ಯೋಗಿಯ ಸಹಾಯದಿಂದ ಯಾರಿಗೂ ತಿಳಿಯದಂತೆ ಆಕೆಯ ಆಫೀಸ್ ರೂಮ್‌ನಲ್ಲಿ ರಹಸ್ಯವಾಗಿ ಸಿಸಿಟಿವಿ ಕ್ಯಾಮೆರಾವನ್ನು ಅಳವಡಿಸಿದ್ದನು.

ಫುಟೇಜ್ ನೋಡಿ ಶಾಕ್ ಆದ ಪತಿ:

ಪತ್ನಿಯ ಮೇಲಿನ ನಿಗಾವಹಿಸಿ, ಆ ಸಿಸಿಟಿವಿ ಫುಟೇಜ್ ಅನ್ನು ತನ್ನ ಮೊಬೈಲ್‌ನಲ್ಲಿ ಪರಿಶೀಲಿಸಿದಾಗ ಪತಿಗೆ ತನ್ನ ಕಾಲುಗಳ ಕೆಳಗಿದ್ದ ಭೂಮಿಯೇ ಕುಸಿದಂತಾಯಿತು. ಹೆಂಡತಿಯ ಮೇಲಿದ್ದ ಅನುಮಾನಗಳೆಲ್ಲವೂ ಒಂದೇ ಕ್ಷಣದಲ್ಲಿ ಪಟಾಪಂಚಾಲಾದವು. ಆಕೆ ಆಫೀಸ್‌ನಲ್ಲಿ ಅಷ್ಟು ಹೊತ್ತು ತಡವಾಗಿರಲು ಅಸಲು ಕಾರಣ ಬೇರೆಯೇ ಇತ್ತು.

ಪತಿಯ ಬಳಿಯಿದ್ದ ಹಳೆಯ ಬೈಕ್ ಬದಲಿಸಿ, ಆತನಿಗೆ ಇಷ್ಟವಾದ ಹೊಸ ಬೈಕ್ ಅನ್ನು ಸರ್‌ಪ್ರೈಸ್ ಆಗಿ ಕೊಡಿಸಬೇಕೆಂಬುದು ಆಕೆಯ ದೀರ್ಘಕಾಲದ ಕನಸಾಗಿತ್ತು. ಆ ಕನಸನ್ನು ನನಸು ಮಾಡಲು ಬೇಕಾದ ಹಣವನ್ನು ಜೋಡಿಸಲು, ಆಕೆ ಯಾರಿಗೂ ಹೇಳದೆ ಪ್ರತಿದಿನ ಕಚೇರಿಯಲ್ಲಿ ಹೆಚ್ಚುವರಿ ಗಂಟೆಗಳ ಕಾಲ (ಓವರ್‌ಟೈಮ್) ಕಷ್ಟಪಟ್ಟು ಕೆಲಸ ಮಾಡುತ್ತಿದ್ದಳು. ಆದರೆ ಪತ್ನಿ ಕಳ್ಳಾಟ ಗೊತ್ತಾಗುತ್ತಿದ್ದಂತೆ ಪತಿ ಕಣ್ಣೀರಿಟ್ಟ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ಆದರೆ ಎಲ್ಲಿಯದ್ದು ಎಂಬುದು ಮಾತ್ರ ಸ್ಪಷ್ಟವಾಗಿಲ್ಲ.

ಮನಕಲಕುವ ಸತ್ಯ ಹಾಗೂ ಪಶ್ಚಾತ್ತಾಪ:

ತನ್ನ ಪತಿಯ ಕನಸಿಗಾಗಿ ಹೆಂಡತಿ ಪಡುತ್ತಿದ್ದ ಶ್ರಮ ಹಾಗೂ ಪ್ರೀತಿಯ ಸತ್ಯ ಹೊರಬರುತ್ತಿದ್ದಂತೆ, ಅನುಮಾನ ವ್ಯಕ್ತಪಡಿಸಿದ್ದ ಪತಿ ತೀವ್ರ ಪಶ್ಚಾತ್ತಾಪದಿಂದ ಕಣ್ಣೀರಿಟ್ಟಿದ್ದಾನೆ. ಅನುಮಾನವು ಮಾನವನ ನಂಬಿಕೆಯನ್ನು ಹೇಗೆ ಅಳಿಸಿಹಾಕುತ್ತದೆ ಮತ್ತು ಅಸಲಿ ಪ್ರೀತಿ ಹಾಗೂ ತ್ಯಾಗದ ಮುಂದೆ ಅಪನಂಬಿಕೆಗಳು ಹೇಗೆ ನುಚ್ಚುನೂರಾಗುತ್ತವೆ ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ. ಪತಿಯ ಮೇಲಿನ ಪತ್ನಿಯ ಪ್ರೀತಿಯನ್ನು ಸಾರುವ ಈ ಭಾವನಾತ್ಮಕ ಘಟನೆ ಇದೀಗ ಸಾರ್ವಜನಿಕ ವಲಯದಲ್ಲಿ ತೀವ್ರ ಚರ್ಚೆಗೆ ಹಾಗೂ ಗಂಭೀರ ಆಲೋಚನೆಗೆ ಗ್ರಾಸವಾಗಿದೆ.