ಮೊರ್ಬಿ (ಗುಜರಾತ್): ಕೇವಲ 2,000 ರೂಪಾಯಿ ಮನೆ ಬಾಡಿಗೆ ಹಣವನ್ನು ಪಾವತಿಸಲು ಸಾಧ್ಯವಾಗದ ಕಾರಣಕ್ಕೆ, ಹಸಿದ ತೋಳದಂತಿದ್ದ ಮನೆ ಮಾಲೀಕನಿಗೆ ತನ್ನ ಪತ್ನಿ ಹಾಗೂ ಅಪ್ರಾಪ್ತ ಮಗಳನ್ನೇ ಲೈಂಗಿಕ ದೌರ್ಜನ್ಯಕ್ಕೆ ಒಪ್ಪಿಸಿದ ಘೋರ ಘಟನೆಯೊಂದು ಗುಜರಾತ್ನ ಮೊರ್ಬಿಯಲ್ಲಿ ಬೆಳಕಿಗೆ ಬಂದಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಾರ್ಮಿಕ ಪತಿ ಹಾಗೂ ಭೂಮಾಲೀಕನನ್ನು ಪೊಲೀಸರು ಬಂಧಿಸಿದ್ದಾರೆ.
ಘಟನೆಯ ಹಿನ್ನೆಲೆ:
ಸುಮಾರು ಆರು ತಿಂಗಳ ಹಿಂದೆ ಕೆಲಸ ಹುಡುಕಿಕೊಂಡು ಈ ಬಡ ಕುಟುಂಬ ಮೊರ್ಬಿಗೆ ವಲಸೆ ಬಂದಿತ್ತು. ತಿಂಗಳಿಗೆ 2,000 ರೂಪಾಯಿ ಬಾಡಿಗೆಗೆ ಮನೆ ಪಡೆದಿದ್ದರು. ಆದರೆ, ದಿನ ಕಳೆದಂತೆ ಕುಟುಂಬದ ಆರ್ಥಿಕ ಪರಿಸ್ಥಿತಿ ತೀರಾ ಹದಗೆಟ್ಟ ಹಿನ್ನೆಲೆಯಲ್ಲಿ ಸಕಾಲಕ್ಕೆ ಬಾಡಿಗೆ ಕಟ್ಟಲು ಸಾಧ್ಯವಾಗಿರಲಿಲ್ಲ.
ಕುಟುಂಬದ ಈ ಅಸಹಾಯಕತೆಯನ್ನು ಬಂಡವಾಳ ಮಾಡಿಕೊಂಡ ಭೂಮಾಲೀಕ, ಬಾಡಿಗೆ ಮನ್ನಾ ಮಾಡಲು ಕಾರ್ಮಿಕನ ಪತ್ನಿಯೊಂದಿಗೆ ದೈಹಿಕ ಸಂಬಂಧ ಹೊಂದುವಂತೆ ಬೇಡಿಕೆ ಇಟ್ಟಿದ್ದನು. ಇದಕ್ಕೆ ಪತಿ ಒಪ್ಪಿಗೆ ಸೂಚಿಸಿದ್ದು, ಪರಿಣಾಮವಾಗಿ ಕಾಮುಕ ಭೂಮಾಲೀಕ ಮಹಿಳೆಯ ಮೇಲೆ ನಿರಂತರವಾಗಿ ಅತ್ಯಾಚಾರ ಎಸಗಿದ್ದಾನೆ.
ಮಗಳ ಮೇಲೂ ದೌರ್ಜನ್ಯ:
ಕಾಮದ ಅತಿರೇಕಕ್ಕೊಳಗಾದ ಭೂಮಾಲೀಕನ ಕಣ್ಣು ನಂತರ ಬಾಡಿಗೆದಾರನ ಅಪ್ರಾಪ್ತ ಮಗಳ ಮೇಲೂ ಬಿದ್ದಿದೆ. ಈ ಬಾರಿಯೂ ತಂದೆ ತಡೆಯುವ ಬದಲು ಸಮ್ಮತಿ ನೀಡಿದ್ದಾನೆ. ನರಕಯಾತನೆ ಅನುಭವಿಸಿದ ಬಾಲಕಿಯನ್ನು ಟಂಕಾರಾ ಸೇರಿದಂತೆ ವಿವಿಧ ಪ್ರದೇಶಗಳಿಗೆ ಕರೆದೊಯ್ದು ಭೂಮಾಲೀಕ ಮತ್ತು ಆತನ ಮತ್ತೊಬ್ಬ ಸ್ನೇಹಿತ ಸೇರಿ ಸಾಮೂಹಿಕ ಅತ್ಯಾಚಾರ ಎಸಗಿದ್ದಾರೆ.
ಬೆಳಕಿಗೆ ಬಂದಿದ್ದು ಹೇಗೆ?
ಮಹಿಳೆಯ ತಾಯಿಯ ಕಡೆಯ ಅಜ್ಜಿಗೆ ಈ ಆಘಾತಕಾರಿ ವಿಷಯ ತಿಳಿದಾಗ ಇಡೀ ಪ್ರಕರಣ ಬೆಳಕಿಗೆ ಬಂದಿದೆ. ಮಗಳ ಮತ್ತು ಮೊಮ್ಮಗಳ ಮೇಲಿನ ದೌರ್ಜನ್ಯ ಹಾಗೂ ಜವಾಬ್ದಾರಿಯಿಲ್ಲದ ಜನ್ಮದಾತನ ದ್ರೋಹದಿಂದ ತೀವ್ರ ಆಘಾತಕ್ಕೊಳಗಾದ ಅವರು ತಕ್ಷಣವೇ ಸ್ಥಳೀಯ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
ದೂರಿನ ಆಧಾರದ ಮೇಲೆ ಮೊರ್ಬಿ ಪೊಲೀಸರು ಭಾರತೀಯ ನ್ಯಾಯ ಸಂಹಿತೆ (BNS) ಅಡಿಯಲ್ಲಿ ಕಠಿಣ ಸೆಕ್ಷನ್ಗಳಡಿ ಪ್ರಕರಣ ದಾಖಲಿಸಿಕೊಂಡು, ಇಬ್ಬರು ಆರೋಪಿಗಳನ್ನು ಬಂಧಿಸಿದ್ದಾರೆ. ನ್ಯಾಯಾಲಯವು ಕಾರ್ಮಿಕ ಪತಿಯನ್ನು ಜೈಲಿಗಟ್ಟಿದ್ದರೆ, ಕಾಮುಕ ಭೂಮಾಲೀಕನನ್ನು ಒಂದು ದಿನದ ಪೊಲೀಸ್ ವಶಕ್ಕೆ ಒಪ್ಪಿಸಿದೆ. ತಲೆಮರೆಸಿಕೊಂಡಿರುವ ಮೂರನೇ ಆರೋಪಿಗಾಗಿ ಪೊಲೀಸರು ಬಲೆ ಬೀಸಿದ್ದಾರೆ.
- Bharatiya Nyay Sanhita case
- Crime against women and child
- Gujarat crime news
- Human trafficking Gujarat
- Landlord assault case
- Migrant labor exploitation
- Morbi police arrest
- Morbi rent abuse case
- Rental debt crime
- ಅಪ್ರಾಪ್ತ ಮಗಳ ಮೇಲೆ ಅತ್ಯಾಚಾರ
- ಕಾಮುಕ ಭೂಮಾಲೀಕ
- ಗುಜರಾತ್ ಅಪರಾಧ ಸುದ್ದಿ
- ಬಾಡಿಗೆ ಹಣಕ್ಕಾಗಿ ದೌರ್ಜನ್ಯ
- ಭಾರತೀಯ ನ್ಯಾಯ ಸಂಹಿತೆ ಪ್ರಕರಣ
- ಮಹಿಳೆಯರ ಮೇಲಿನ ದೌರ್ಜನ್ಯ
- ಮೊರ್ಬಿ ಅತ್ಯಾಚಾರ ಪ್ರಕರಣ
- ಮೊರ್ಬಿ ಪೊಲೀಸ್ ಬಂಧನ
- ವಲಸೆ ಕಾರ್ಮಿಕರ ಅಸಹಾಯಕತೆ





Leave a comment