ಐಫೆಲ್ ಟವರ್ ಬಂದ್: ಹಿಂದೂ ಧರ್ಮಗುರುಗಳ ಭೇಟಿಯ ವೇಳೆ ಮಹಿಳಾ ಸಿಬ್ಬಂದಿ ‘ಮರೆಮಾಚಿದ’ ಆರೋಪ, ಸ್ಥಳೀಯರ ತೀವ್ರ ವಿರೋಧ!

ಪ್ಯಾರಿಸ್‌: ವಿಶ್ವವಿಖ್ಯಾತ ಐಫೆಲ್ ಟವರ್‌ನಲ್ಲಿ ಇತ್ತೀಚೆಗೆ ನಡೆದ ಒಂದು ವಿವಾದವು ದೊಡ್ಡ ಮಟ್ಟದ ಸುದ್ದಿಗೆ ಗ್ರಾಸವಾಗಿದೆ. ಬಿಎಪಿಎಸ್ ಹಿಂದೂ ಧರ್ಮಗುರುಗಳು ಮತ್ತು ಭಕ್ತರ ನಿಯೋಗದ ಖಾಸಗಿ ಭೇಟಿಯ ಸಂದರ್ಭದಲ್ಲಿ, ಮಹಿಳಾ ಉದ್ಯೋಗಿಗಳನ್ನು ಕರ್ತವ್ಯದಿಂದ ದೂರವಿರಿಸಿ, ಅವರನ್ನು ಬೇರೆಡೆಗೆ ಸ್ಥಳಾಂತರಿಸಲಾಗಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಈ ಘಟನೆಯನ್ನು ಖಂಡಿಸಿ ಐಫೆಲ್ ಟವರ್ ಸಿಬ್ಬಂದಿ ಮುಷ್ಕರ ನಡೆಸಿದ ಹಿನ್ನೆಲೆಯಲ್ಲಿ ಸ್ಮಾರಕವನ್ನು ತಾತ್ಕಾಲಿಕವಾಗಿ ಮುಚ್ಚಲಾಗಿತ್ತು.

ಘಟನೆಯ ಹಿನ್ನೆಲೆ ಏನು?

ಫ್ರಾನ್ಸ್‌ನ ಪ್ಯಾರಿಸ್ ಉಪನಗರದಲ್ಲಿ ನೂತನವಾಗಿ ನಿರ್ಮಿಸಲಾದ ಬೃಹತ್ ಹಿಂದೂ ದೇವಾಲಯದ ಲೋಕಾರ್ಪಣೆ ಸಮಾರಂಭಕ್ಕಾಗಿ ಬಿಎಪಿಎಸ್ ಸಂಘಟನೆಯ ಸುಮಾರು 100 ಜನರ ನಿಯೋಗ ಫ್ರಾನ್ಸ್‌ಗೆ ಭೇಟಿ ನೀಡಿತ್ತು. ಈ ವೇಳೆ ಭೇಟಿ ನೀಡಿದ ಸಂದರ್ಭದಲ್ಲಿ ಮಹಿಳಾ ಉದ್ಯೋಗಿಗಳೊಂದಿಗೆ ಪರಸ್ಪರ ಸಂವಾದ ಅಥವಾ ವಹಿವಾಟುಗಳನ್ನು ಕಡಿಮೆ ಮಾಡುವಂತೆ ಮತ್ತು ಮಹಿಳಾ ಸಿಬ್ಬಂದಿಯನ್ನು “ಕಾಣದಂತೆ” ಮಾಡುವಂತೆ ಸೂಚನೆ ನೀಡಲಾಗಿತ್ತು ಎಂದು ಸಿಬ್ಬಂದಿ ಆರೋಪಿಸಿದ್ದಾರೆ.

ಕೆಲವು ಮಹಿಳಾ ಉದ್ಯೋಗಿಗಳನ್ನು ಅವರ ಸ್ಥಳದಿಂದ ಬೇರೆಡೆಗೆ ಕಳುಹಿಸಲಾಗಿದ್ದು, ಅವರ ಜಾಗದಲ್ಲಿ ಪುರುಷ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ ಎಂದು ಸಿಬ್ಬಂದಿಯ ಒಕ್ಕೂಟ ಆಕ್ರೋಶ ವ್ಯಕ್ತಪಡಿಸಿದೆ.

ಎಸ್‌ಇಟಿಇ (ಮತ್ತು ಬಿಎಪಿಎಸ್ ಪ್ರತಿಕ್ರಿಯೆ

ಐಫೆಲ್ ಟವರ್ ಅನ್ನು ನಿರ್ವಹಿಸುವ ಎಸ್‌ಇಟಿಇ ಕಂಪನಿಯು ಈ ಕುರಿತು ಸ್ಪಷ್ಟನೆ ನೀಡಿದ್ದು, ಹಿಂದೂ ನಿಯೋಗವು ಮಹಿಳೆಯರೊಂದಿಗೆ ಸಂವಾದವನ್ನು ಮಿತಿಗೊಳಿಸುವಂತೆ ವಿನಂತಿಸಿತ್ತು ಎಂಬುದು ನಿಜ ಎಂದಿದೆ. ಆದರೆ, “ಈ ರೀತಿಯ ವಿನಂತಿಗಳನ್ನು ಅಥವಾ ಷರತ್ತುಗಳನ್ನು ಒಪ್ಪಿಕೊಳ್ಳಬಾರದಿತ್ತು. ಇದು ಕಂಪನಿಯ ಮೌಲ್ಯಗಳಿಗೆ ಮತ್ತು ಗಂಡು-ಹೆಣ್ಣಿನ ಸಮಾನತೆಯ ತತ್ವಕ್ಕೆ ವಿರುದ್ಧವಾಗಿದೆ” ಎಂದು ಸಂಸ್ಥೆಯ ಅಧ್ಯಕ್ಷ ಏರಿಯಲ್ ವೀಲ್ ತಿಳಿಸಿದ್ದಾರೆ.

ಮತ್ತೊಂದೆಡೆ, ಬಿಎಪಿಎಸ್ ಸಂಘಟನೆಯು ಈ ಬಗ್ಗೆ ಸ್ಪಷ್ಟನೆ ನೀಡಿ, “ದೊಡ್ಡ ನಿಯೋಗವಿರುವ ಕಾರಣ ಇತರ ಪ್ರವಾಸಿಗರಿಗೆ ತೊಂದರೆಯಾಗಬಾರದು ಎಂದು ಮುಂಜಾನೆ ಭೇಟಿಯನ್ನು ಆಯೋಜಿಸಲಾಗಿತ್ತು. ಯಾರೊಬ್ಬರಿಗೂ ಪ್ರವೇಶ ನಿರಾಕರಿಸಲಾಗಿಲ್ಲ. ಆದಾಗ್ಯೂ, ಈ ಪರಿಸ್ಥಿತಿಯಿಂದ ಯಾರಿಗಾದರೂ ನೋವಾಗಿದ್ದರೆ ಅಥವಾ ಅನಾನುಕೂಲವಾಗಿದ್ದರೆ ನಾವು ಪ್ರಾಮಾಣಿಕ ಕ್ಷಮೆ ಯಾಚಿಸುತ್ತೇವೆ” ಎಂದು ತಿಳಿಸಿದೆ.

ಫ್ರೆಂಚ್ ರಾಜಕಾರಣಿಗಳ ಖಂಡನೆ

ಈ ಘಟನೆಯು ಫ್ರಾನ್ಸ್‌ನಲ್ಲಿ ತೀವ್ರ ರಾಜಕೀಯ ಚರ್ಚೆಗೆ ಕಾರಣವಾಗಿದೆ. ಫ್ರಾನ್ಸ್‌ನ ಸಮಾನತೆ ಸಚಿವೆ ಅರೋರೆ ಬರ್ಗೆ (Aurore Berge) ಪ್ರತಿಕ್ರಿಯಿಸಿ, “ಫ್ರಾನ್ಸ್‌ನಲ್ಲಿ ಮಹಿಳೆಯರನ್ನು ಮರೆಮಾಚುವಂತೆ ನಾವು ಕೇಳುವುದಿಲ್ಲ. ಯಾವುದೇ ಧರ್ಮ ಅಥವಾ ಸಿದ್ಧಾಂತವು ಗಣರಾಜ್ಯದ ಕಾನೂನುಗಳಿಗಿಂತ ಮೇಲಲ್ಲ” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಪ್ಯಾರಿಸ್ ಮೇಯರ್ ಎಮ್ಯುನೆಲ್ ಗ್ರೆಗೊಯಿರ್ ಸೇರಿದಂತೆ ಹಲವು ರಾಜಕೀಯ ನಾಯಕರು ಈ ಬಗ್ಗೆ ಉನ್ನತ ಮಟ್ಟದ ತನಿಖೆಗೆ ಆದೇಶಿಸಿದ್ದಾರೆ.